Prezident İlham Əliyev “Məhkum edilmiş bir sıra şəxslərin əfv olunması haqqında” sərəncam imzalayıb.
Sərəncamla 399 nəfər azad edilir. Sərəncam ümumilikdə 431 nəfərə şamil olunur. Sərəncamda məhkum olunmuş bir sıra şəxslərin, onların ailə üzvlərinin, insan hüquqları üzrə müvəkkilin, insan hüquqlarının müdafiəsi təşkilatlarının Azərbaycan Respublikası Prezidentinə ünvanlanmış əfv haqqında müraciətlərinə baxıldığı, məhkumların şəxsiyyətinin, səhhətinin, ailə vəziyyətinin, cəza çəkdikləri müddətdə davranışlarının nəzərə alınaraq, humanizm prinsiplərinə əsaslandığı qeyd edilib.
Sərəncama əsasən, azadlıqdan məhrum etmə cəzasına məhkum olunmuş 399 nəfər cəzasının çəkilməmiş hissəsindən azad edilib. Bundan başqa, ömürlük azadlıqdan məhrum etmə cəzasına məhkum edilmiş üç nəfərdən birinin cəzası 25, iki nəfərinki isə 20 il müddətə azadlıqdan məhrum etmə cəzası ilə əvəzlənib. Azadlıqdan məhrum etmə cəzasına məhkum olunan və cəzasının çəkilməsi təxirə salınmış bir nəfər cəzadan azad edilib. Həmçinin azadlıqdan məhrumetmə cəzasına şərti olaraq məhkum edilmiş 11 nəfər cəzadan azad olunub. Eləcə də azadlığın məhdudlaşdırılması cəzasına məhkum edilmiş bir nəfər cəzasının çəkilməmiş hissəsindən azad edilib. Üç nəfər islah işləri cəzasından, bir nəfər ictimai işlər cəzasından, 12 nəfər isə cərimə cəzasından azad edilib.
Bütövlükdə məlum sərəncam dövlət başçısının humanist siyasətinin növbəti təzahürüdür. Zaman-zaman ölkə başçısı bununla bağlı humanist qərarlar qəbul edib. Nəticədə indiyə qədər minlərlə məhkum edilmiş şəxs azadlığa qovuşub. Bu gün imzalanan Sərəncam 2003-cü ildən bəri dövlət başçısının imzaladığı sayca 33-cü əfv sənədidir. Ümumilikdə 16 il ərzində imzalanan fərman və sərəncamlarla 4.500-dən çox şəxs azadlığa buraxılmaqla, 5 minə yaxın məhkum əfv edilib.
O baxımdan ölkə başçısının son əfv sərəncamını ekspertlər necə dəyərləndirir?
Şərqşünas Seyid Camal Əzimbəylinin sözlərinə görə, məlum qərar Prezident İlham Əliyevin nə qədər böyük humanist dövlət başçısı olduğunu bir daha göstərdi: “Ona görə də ölkə başçısının məlum sərəncamını alqışlayıram. Sözügedən sərəncam sayəsində xeyli sayda ailə sevinəcək və bu onlar üçün ikiqat bayram olacaq. Çünki yüzlərlə ailə Novruz bayramını daha böyük sevinclə, gülər üzlə keçirəcək. Yüzlərlə insan bayram ərəfəsində doğmalarına, qohumlarına qovuşacaqlar. Ona görə də həmin ailələrin sevincinin həddi-hüdudu yoxdur. Hesab edirəm ki, sərəncam dövlət başçısının artıq illərdir həyata keçirdiyi humanist siyasətin növbəti təzahürüdür. Hansı ki, ölkə başçısı bunu heç vaxt əsirgəməyib. Cənab İlham Əliyevin fəaliyyətində humanizmin və insansevərliyin əsas prinsip olması danılmaz reallıqdır. Çünki ölkə başçısı bu günə qədər bir neçə dəfə bənzər humanist qərarlar qəbul edib. O üzdən, imzalanan əfv sərəncamını dəstəkləyir və alqışlayıram. Eyni zamanda hesab edirəm ki, ölkə başçısının sözügedən humanist addımı cəmiyyətdə də böyük rəğbətlə qarşılanacaq”.
Vidadi ORDAHALLI
