Elşən Həsənov: “Onların bundan başqa yolu qalmayıb”
Ermənistanın eks-prezidenti Robert Köçəryan həbsxanadan “168 saat” qəzetinə verdiyi müsahibədə deyib ki, baş nazir Nikol Paşinyanın Dağlıq Qarabağın adından danışıqlar aparmaqdan yaxasını kənara çəkməsi ona çox şübhəli görünür.
Köçəryan indiki hakimiyyətin Qarabağı qaytarmaq niyyətində olduğunu istisna etmir və hədələyir ki, harada olmasından asılı olmayaraq, buna imkan verməyəcək: “Paşinyan hansı izahatla maskalansa da, danışıqlar şübhəsiz ki, gedir. Şübhələri isə danışıqların özü yox, baş nazirin bundan yaxasını kənara çəkmək səyləri yaradır”.
Onun sözlərinə görə, indiki hakimiyyətin Qarabağ nizamlanmasına dair mövqeyi məlum deyil, çünki bu mövqe indiyədək səslənməyib və məhz bu məqam narahatlıq yaradır: “Mövqeyini formalaşdırmadan uğurlu danışıqları necə aparmaq olar? Danışıqlar oturub söhbət etmək deyil, əldə edilmiş uğurları möhkəmləndirmək alətidir. Qarabağ nizamlanmasında bir sıra prinsipial məqamlar var və hakimiyyət danışıqları başlamazdan əvvəl onların barəsində dəqiq yanaşmalara malik olmalıdır”.
Ermənistanın eks-prezidentinin və bu ölkəni 20 il idarə etmiş kriminal-hərbi rejimin əsas simalarından birinin fikrincə, Azərbaycan Prezidenti İlham Əliyev Nikol Paşinyanı “asanlıqla aldadıb”. Çünki Düşənbədə keçirilmiş “lift danışıqları” 2016-cı ilin aprel müharibəsindən sonra çətinliklə əldə edilmiş Vyana və Sankt-Peterburq razılaşmalarını “dəfn edib”.
Köçəryan deyir ki, erməni tərəfi güzəştlər baxımından Azərbaycanda və həmsədrlərdə münaqişənin həllinə dair “yüksək ümidlər” yaradıb. Ona görə də Minsk Qrupunun növbəti təklifi “xoş olmaya bilər”.
Köçəryanın fikrincə, ictimaiyyət Paşinyanın Qarabağa dair hər addımını izləməli və onun ziddiyyətli bəyanatlarına inanmamalıdır.
Göründüyü kimi, Köçəryan bu müsahibəsində əsasən Paşinyanın Qarabağla bağlı danışıqlardakı mövqeyini tənqid edib və ən əsası da onun mövqe ortaya qoymadığını dilə gətirib. Azərbaycan tərəfi də Paşinyanı konkret olmamaqda və mövqesizlikdə dəfələrlə günahlandırıb. İndi, görünür, bizim iradlarımızla Ermənistanda da razılaşmağa başlayıblar. Köçəryanın bildirdiyi iradlardan daha hansı nəticəni çıxara bilərik?
Ekspert Elşən Həsənov qəzetimizə bildirdi ki, Köçəryan müsahibəsində yalnız irad bildirməyib: “Eks-prezident, eyni zamanda, Paşinyanı hədələyib. Dağlıq Qarabağla bağlı mövqe ortaya qoymamaqda onu günahlandırıb. Düzdür, bu irad məsələsində bizimlə onun fikirləri arasında bənzərlik ola bilər, ancaq mahiyyət tamamilə başqadır. Biz Paşinyanı konstruktivlik ortaya qoymadığı səbəbindən mövqesizlikdə günahlandırırıq. Köçəryan isə onun Qarabağ məsələsində hansısa güzəştə gedə biləcəyindən narahatdır. Buna görə ortaya mövqe qoymasını istəyir. Köçəryanın fikirlərindən bu nəticəyə gəlirik ki, o, Paşinyandan Azərbaycana daha sərt cavab verməsini istəyir. Bütün bunlar göstərir ki, Ermənistan siyasətində Qarabağ kartı bir şantaj vasitəsinə çevrilib. Paşinyan doğrudan da çıxılmaz durumda qalıb. Güzəştə getməyəcəyi təqdirdə ölkəsi aclıq və səfalətdən qurtula bilməyəcək və o, verdiyi vədlərin heç birini həyata keçirə bilməyəcək. Güzəştə gedəcəyi təqdirdə isə keçmiş kriminal rejimin təzyiqləri ilə üzləşməli olacaq. Köçəryanın fikirləri bir daha təsdiq edir ki, devrilmiş kriminal rejim Qarabağ kartından istifadə edərək revanş götürməyə çalışır. Bu günlərdə Ermənistanın eks-prezidenti Levon Ter-Petrosyan da belə cəhdlər haqda danışaraq, demişdi ki, keçmiş kriminal rejim ölkədə xaos yaradıb Paşinyanın hökumətini devirsə, Qarabağ da əldən gedəcək, Ermənistanın özü də. Ancaq Ermənistanda hakimiyyətdə kimin olmasına baxmayaraq, zaman Qarabağ məsələsinin həllini tələb edir. Artıq beynəlxalq qurumlar, vasitəçi ölkələr də tərəflərdən konkret mövqe tələb edirlər. Azərbaycanın mövqeyi bəllidir, Ermənistan isə hələ də yayınmağa çalışır. Ermənistanda kimin nə deməsindən asılı olmayaraq, hakimiyyət konkret addımlar atmalıdır ki, münaqişə həll edilsin. Belə olmayacağı təqdirdə, Azərbaycan öz gücünə ərazilərini işğaldan azad etmək yolunu seçməyə məcbur qalacaq. Yaxşı olardı ki, erməni siyasilər bir-birini Qarabağ kartı ilə hədələməklə yox, onun həlli ilə bağlı polemikalara girişsinlər. Onların bundan başqa yolu qalmayıb”.
Məhəmmədəli QƏRİBLİ
