Sadiq Qarayev: “... ideoloji “kəşfiyyat məlumatları” əldə etmək üçün məktəblərində şagirdlərə ədəbiyyatımızı, nağıllarımızı öyrədirlər” Sevinc Nuruqızı: “Ermənistanın özünü beynəlxalq aləmə “multikultural dövlət” kimi təqdim etmək cəhdlərindən irəli gəlir”
Öz məkrli siyasəti ilə həmişə Azərbaycana zərər vuran Ermənistan özünü dünyaya “süddən çıxmış ağ qaşıq” kimi təqdim etmək istəyir. Guya bu ölkə humanistdir və başqa ölkələrə, xalqlara humanizm (?) prinsipləri ilə yanaşır.
Erməni saytlarında yayılan məlumata görə, Ermənistanın orta məktəblərində şagirdlərə Azərbaycan nağılları və Azərbaycan yazıçılarının əsərləri tədris edilir. Ermənistan KİV-ləri məlumatlı mənbəyə istinadən yazırlar ki, şagirdlərə “Bizim həyətin tarixi” adlı Azərbaycan nağıllarından ibarət kitablar paylanıb. Onlar qeyd edirlər ki, sözügedən kitabda Azərbaycan nağılları və bizim müəlliflərin əsərləri yer alıb. Məlumatlı mənbənin verdiyi bilgiyə görə, həmin vəsait şagirdlərə Qızıl Xaç Cəmiyyəti tərəfindən verilib. “Ən maraqlısı isə budur ki, həmin kitablar Ermənistanın Elm və Təhsil Nazirliyi tərəfindən rəsmən təsdiqlənib” - deyə qeyd edilir.
Azərbaycan Yazıçılar Birliyinin üzvü, yazıçı Sadiq Qarayev mövzunu “Bakı-Xəbər”ə şərh edərkən bildirdi ki, ermənilər bunu xüsusi məqsədlərlə edirlər. Onların əsas hədəfi Azərbaycan xalqının psixologiyasını, dünyagörüşünü, mədəniyyətini, ədəbiyyatını şagirdlərə indidən təlqin etmək və bununla da bizimlə apardıqları ideoloji müharibənin yeni istiqamətlərini müəyyən etməkdir. Ermənistanın bunu xoş məqsədlərlə etmədiyini deyən S.Qarayevin fikrincə, onların əsas istəyi müasir Azərbaycanı dərindən öyrənməkdir. “Bu məsələyə yalnız bir istiqamətdə yanaşmaq olmaz. Onların birinci məqsədi odur ki, guya ermənilərin humanist xalq olduğu və Ermənistanda multikulturalizm mühiti təsəvvürü yaratmaqdır. Beynəlxalq ictimaiyyətə demək istəyirlər ki, biz Azərbaycanla düşmənçilik (?) etmirik, hətta onların nağıllarını, yazıçılarının əsərlərini də orta məktəbimizdə tədris edirik, şagirdlərə öyrədirik. Onlar bununla beynəlxalq rəyi çaşdırmaq istəyirlər. Əslində isə burada başqa səbəblər var. Ola bilsin, onlar bizim yazıçıların elə əsərlərini seçiblər ki, orada xalqımızın hansısa zəif bir nöqtəsi, zəif cəhəti, tənbəlliyini ifadə edən məqamlar var. Fikrimcə, ermənilərin əsas məqsədləri budur ki, bizim xalqın düşüncə tərzini, dünyagörüşünü, səviyyəsini, mədəniyyətini şagirdlərə, gənclərə indidən öyrətsinlər. Onlar bizə düşmən kimi baxır və bu baxımdan da ideoloji “kəşfiyyat məlumatları” əldə etmək üçün məktəblərində şagirdlərə ədəbiyyatımızı, nağıllarımızı öyrədirlər. Çünki ədəbiyyatımızda həm düşüncə tərzimiz, həm dünyagörüşümüz əks olunub. Bizim nağıllar, yazıçılarımızın əsərləri Ermənistan məktəblərində ona görə tədris edilib öyrədilir ki, bugünkü şagirdlər xalqımızı “qara qutu” kimi görməsinlər, biz onların beynində tam açılmış bir mənzərə olaq. Yəni bizim haqqımızda hər şeyi bilsinlər. Xüsusən də onlar bizim mənəvi dünyamızı öyrənmək niyyətindədirlər” - deyən S.Qarayev hesab edir ki, ədəbiyyatımızı öyrənməklə onlar özlərinin bizə qarşı hədəflərini müəyyən edirlər. Onun sözlərinə görə, bu gün nəinki Ermənistanda, hətta bütün dünyada Azərbaycanı xüsusi öyrənən qurumlar var. Bunun xoş niyyətlə edilmədiyini xatırladan S.Qarayevin fikrincə, onlar bizim mədəniyyəti öyrənməklə milli ideoloji düşüncəmizi öyrənmək istəyindədirlər. “Ermənilər uşaqlarına bizi öyrədir. Bizim yazıçıların əsərlərində yer-yurd, dağ, çay adları, təbiətimizin relyefi, insanların xarakteri, düşüncəsi var. Həm nağıllarımızda, həm də yazıçılarımızın əsərlərində özümüzlə bağlı çoxlu məlumat var. Onlar bizi ona görə öyrənirlər ki, bizimlə bağlı önləyici məlumatları olsun. Yoxsa ermənilər heç bir vaxt məqsədsiz şəkildə bizim nağılları və yazıçıların əsərlərini tədris etməzlər” -deyə S.Qarayev vurğuladı.
Tanınmış uşaq yazıçısı Sevinc Nuruqızının fikrincə də Ermənistanda Azərbaycan nağıllarının və yazıçılarımızın əsərlərinin erməni şagirdlərə öyrədilməsinin kökündə xüsusi məqsəd dayanır. “Biz ermənilərin xislətinə yaxşı bələdik. Yaranışdan humanizm düşməni olan ermənilər məqsədsiz şəkildə bizim nağılları, əsərləri təbliğ etməzlər. Bu gün Azərbaycan dünyada gerçək bir multikulturalizm məkanı kimi qəbul edilir. Bizdə müxtəlif xalqların ədəbiyyatı, mədəniyyəti həm orta, həm də ali məktəblərdə öyrədilir. Monoetnik dövlət olan Ermənistanda isə multikulturalizmdən əsər-əlamət yoxdur. Bu gün Ermənistan məktəblərində şagirdlərə “Bizim həyətin tarixi” adlı Azərbaycan nağıllarından və yazıçılarının əsərlərindən ibarət kitabın tədris edilməsi bu dövlətin özünü beynəlxalq aləmə “multikultural dövlət” kimi təqdim etmək cəhdlərindən irəli gəlir” - deyə S.Nuruqızı bildirdi.
İradə SARIYEVA
