Rauf Zeyni: “Sumqayıt hadisələrini SSRİ DTK-sı ilə Erməni Milli Assambleyası bir yerdə təşkil etmişdi”
Hər il fefral ayının sonu yaxınlaşdıqca, erməni təbliğatının daha bir yalanı işə düşür. Söhbət 1988-ci ildə ermənilərin iddia etdiyi Sumqayıt hadisələrindən gedir. Əslində, o dövrün istintaq materialları və digər faktlardan görünür ki, həmin vaxt Sumqayıtda baş verən hadisələrin təşkilatçısı və icraçıları ermənilər olub.
Prosesə Qriqoryan familiyalı erməni başçılıq edib. Maraqlıdır ki, ermənilərin Sumqayıtla bağlı sərsəm təbliğatına ABŞ-dan olan bəzi ermənipərəst konqresmenlər də dəstək verirlər. Onlardan biri - Frenk Polloni (kiçik) çıxış edərək həmin hadisələrə görə Azərbaycanı qınayıb. Konqresmen hətta bildirib ki, Sumqayıt hadisələrinə lazımi hüquqi qiymət verilməyənə kimi mübarizəsini davam etdirəcək. O hətta başqa konqresmenləri də bu işə qoşulmağa çağırıb. ABŞ-dan Adam Şiff adlı digər konqresmen də Konqresdə Sumqayıt hadisələri ilə bağlı heç də həqiqəti əks etdirməyən məruzə edib. Şiff hətta bir qədər də irəli gedərək, Ramil Səfərovun Qurqen Markaryanı qətlə yetirməsini də azərbaycanlıların ermənilərə münasibətinin göstəricisi olduğunu bildirib.
ABŞ konqresmenlərinin Sumqayıtla bağlı yalanları dünyaya sırımaq cəhdini necə dəyərləndirmək olar?
Əslən Sumqayıtdan olan və həmin hadisələrə canlı şahidlik edən Milli Qeyri-Hökumət Təşkilatı Forumunun prezidenti Rauf Zeyni “Bakı-Xəbər”ə açıqlamasında bildirdi ki, həmin hadisələrə ermənipərəst ABŞ konqresmenlərinin prizmasından baxmaq lazım deyil: “Mən sumqayıtlıyam və həmin hadisələrin içində olmuşam. Siyasətə də oradan göz açmışam. Hətta 4 il ərzində həmin hadisələrə hüquqi qiymət verilməsi üçün şəhər sovetində mübarizə aparmışam. Amma 1993-cü ilə qədər bu mümkün olmayıb. Yalnız həmin ildə Sumqayıt hadisələrinə hüquqi qiymət vermək üçün komissiya yaradıldı. Mən də komissiyanın sədri oldum. Lazımi araşdırma aparıldı, sənədləri də müvafiq dövlət qurumuna təqdim etdik. Təəssüflər olsun ki, hələ də Sumqayıt hadisələri ilə bağlı həqiqətlər dünya ictimaiyyətinə çatdırılmayıb. Baxmayaraq ki, bizim Respublika Prokurorluğu tərəfindən təhqiqat aparılıb və ortada konkret nəticələr var. Sübut olunur ki, həmin hadisələr məhz bizə qarşı təşkil edilmiş provokasiya idi. Ermənistanda bundan əvvəlki prezident seçkilərində namizədlərdən biri olan Arikyan güllələnəndə açıqladı ki, ona güllə atanlar Sumqayıt hadisələrini törədənlər olub. Bundan böyük etiraf ola bilərmi? Amma görün ermənipərəst kimi tanınan konqresmenler necə çıxış edirlər? Onlar erməni yalanlarını müdafiə etmək üzrə tam ixtisaslaşıblar. Çünki dolanışıqları bundan çıxır. ABŞ konqresmenləri bilsinlər ki, Sumqayıt hadisələrini SSRİ DTK-sı ilə Erməni Milli Assambleyası bir yerdə təşkil etmişdi. Məqsəd də bundan ibarət olub ki, Azərbaycan xalqının gələcək müstəqilliyini əldə etməsinə mane olsunlar. Bu baxımdan da heç bir əsası olmayan yalanlarla konqresmenlər uzağa gedə bilməzlər. Onların danışdıqlarını özlərindən başqa kimsə eşitməyəcək”.
Məhəmmədəli QƏRİBLİ
