Məhərrəm Zülfüqarlı: “Hakimiyyət uğrunda mübarizə şəhidlər üzərində qurulmamalıdır”
Məlum olduğu kimi, Müsavat Partiyasının üzvləri Xocalı faciəsinin 27-ci ildönümü ilə əlaqədar Bakıda keçirilən anım mərasimində təxribat törətməyə çalışıblar. Nəticədə sözügedən partiyanın rəhbərliyi və sıravi üzvləri ilə polis arasında gərginlik yaşanıb.
Məsələ ondadır ki, minlərlə insanın qatıldığı Xocalı yürüşünün maneəsiz davam etməsi üçün bu il xüsusi hərəkət trayektoriyası müəyyən edilib. İstər hökumət, istərsə də dövlət nümayəndələri "Ana harayı" abidəsinin ətrafında dövr edib, əllərindəki qərənfilləri abidənin qarşısında nəzərdə tutulan yerə qoyublar. Müsavat Partiyasının funksionerləri isə ziyarətləri zamanı yeni hərəkət qaydasına etiraz edərək, "Ana harayı" abidəsinə yaxınlaşmaq istəyiblər. Onlar bildiriblər ki, məhz “Ana harayı” abidəsinin qarşısına gül qoymaq istəyirlər. Bu da, əlbəttə ki, müəyyən olunan protokol qaydalarına ziddir. Bununla belə, "Ana harayı" abidə kompleksinin ətrafında toplaşan müsavatçılar ictimai asayişi pozmağa cəhd ediblər. Bir qurp şəxs Xocalı qurbanlarının anım günündə siyasi şüarlar səsləndirib. Onların yaratdıqları gərginliyə görə əraziyə polis əməkdaşları cəlb edilib. Polisin müdaxiləsindən sonra asayişi pozmaq cəhdinin qarşısı alınıb. Qısa gərginlik yaşandıqdan sonra partiya üzvləri qoyulan qaydalarla ziyarətlərini davam etdiriblər.
Bənzər hal 20 Yanvarla bağlı keçirilən anım mərasimində də yaşandı. Belə ki, “Milli Şura” təmsilçiləri Şəhidlər Xiyabanında keçirilən anım mərasimindən siyasi məqsədlər üçün istifadə etməyə, asayişi pozub gərginlik yaratmağa cəhd etdilər.
Dünyanın bütün ölkələrində bu kimi tədbirlərlə bağlı xüsusi qaydalar olur və kimliyindən, siyasi mənsubiyyətindən asılı olmayaraq, hər bir vətəndaş buna riayət edir. Bütün dünyada bu belə qəbul olunub. Görünən odur ki, Azərbaycanda radikal müxalifət təmsilçiləri öz siyasi məqsədləri üçün belə tədbirlərdən sui-istifadə etməyə, gərginlik yaratmağa və asayişi pozmağa çalışırlar. O baxımdan belə cəhdləri ekspertlər necə dəyərləndirirlər?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, belə cəhdlər təxribat xarakterlidir və hansısa partiyaya hörmət gətirmir: “Çünki biz dünyaya Azərbaycan xalqının Xocalı ilə bağlı mövqeyini nümayiş etdiririk. O üzdən, belə vacib tədbirlərdə bu cür hərəkətlər yolverilməzdir. Hamı gedib şəhidləri yad edirdi və müəyyən olunmuş yerə gül qoyurdu. Minlərlə iştirakçıdan biri də mən olmuşam. Böyük izdiham yaşandığı üçün orada asayişi qorumaq lazım idi. Çünki kənardan bizi istəməyən qüvvələr, xarici dairələr təxribatlar yarada bilərdilər. Bu baxımdan, mən yürüşün idarə olunmasını, yüksək səviyyədə təşkil edilməsini müsbət qiymətləndirirəm. Sadəcə olaraq radikal müxalifət təmsilçiləri də hamı kimi müəyyən olunmuş qaydalara əməl etməli idi. Necə ki biz ziyalılar buna əməl etdik. Onlar isə bundan imtina edib süni şəkildə gərginlik yaratmağa cəhd etdilər. Bu da xoşagəlməz haldır. Belə tədbirlərdən siyasi məqsədlər üçün istifadə etmək, təxribata əl atmaq düzgün deyil. Bu cür təşəbbüs heç bir siyasi təşkilata hörmət gətirməz. Əksinə, onları hörmətdən salar. Çünki hakimiyyət uğrunda mübarizə şəhidlər üzərində qurulmamalıdır. Şəhidlər hamımızındır. Ona görə də şəhidləri hamı ehtiramla yad etməlidir. Bu cür təxribatlar üçüncü qüvvələrin işinə yarıya bilər. Onlar bundan Azərbaycanın əleyhinə istifadə edə bilərlər. O üzdən, buna şərait yaratmaq istəyən qüvvələr düşünməli və belə hallara yol verməməlidirlər”.
Vidadi ORDAHALLI
