Mehman Muradlı: “Ona görə ki, Xocalı faciəsini nə vaxtsa tanımayanlar da olacaq, buna bir hüquqi məsuliyyət olmalıdır”
Xocalı soyqırımı ilə bağlı ayrıca qanun layihəsi hazırlanması tez-tez müzakirə mövzusuna çevrilsə də, hələlik bununla bağlı konkret qanun qəbul edilməyib. Qeyd edək ki, belə bir qanunun qəbulu, eyni zamanda, Dağlıq Qarabağda bəzi cinayətlər törədən şəxslərin məsuliyyətə cəlb olunmasında olan məhdudiyyətləri də aradan qaldıra bilər.
Ekspertlər hesab edirlər ki, Xocalı ilə bağlı hazırlanacaq yeni qanun layihəsi buna hüquqi şərait yaratmış olar.
Belə bir qanunun qəbuluna ehtiyac varmı və bu bizə hansı üstünlükləri verə bilər?
Hüquqşünas Mehman Muradlı qəzetimizə açıqlamasında bildirdi ki, Xocalı faciəsinin dünyada tanıdılması ilə bağlı böyük işlər görülür: “Bizim qarşımızda duran ən mühüm vəzifələrdən biri də həmin faciənin günahkarlarının tapılıb cəzalandırılmasıdır. Qeyd edim ki, belə bir praktika dünyanın müxtəlif ölkələrində var. Azərbaycan, ilk növbədə, işğal edilmiş torpaqlarının sahibi olduğunu və onu heç zaman düşmənə güzəştə getməyəcəyini, belə bir fikirdə olmadığını qanunvericilik səviyyəsində dünyaya elan edir. İkincisi, məsuliyyət məsələsi önə çəkilir”.
Hüquqşünasın sözlərinə görə, bu, eyni zamanda, Xocalı faciəsi ilə bağlı erməniləri müdafiə edəcək şəxslərə çox ciddi xəbərdarlıq ola bilər: "Xocalı faciəsi ilə bağlı illərdir işlər görülür, təbliğat aparılır. Azərbaycanın torpaqlarını işğaldan azad etməsi üçün hüquqi sahədə bir çox vacib sənəd var. Mərhum Prezident Heydər Əliyev tərəfindən 94-98-ci illərdə sərəncamların imzalanması, Xocalı faciəsinin 10 və 20 illik ildönümü ilə bağlı parlamentdə dinləmələrin keçirilməsi, qəbul olunan ayrı-ayrı qərarlarda ərazi bütövlüyünün önə çəkilməsi və s. Yəni bu məsələ həmişə diqqətdə olub. Ancaq bunların təkmilləşdirilməsi və dünyada real qiymətini alması üçün zaman yetişib.
Azərbaycan parlamentində Xocalı faciəsi ilə bağlı 10-dan artıq qərar qəbul olunub. İndi söhbət qərar deyil, konkret qanun layihəsinin hazırlanmasından gedir”.
Hüquqşünasın sözlərinə görə, bu məsələnin hüquqi müstəvidə hərəkəti üçün belə bir qanunun qəbuluna mütləq zərurət var: “Bəzən bu məsələyə beynəlxalq reaksiyalar çox sadə və dəqiq səbəbə görə gecikir. Bunun üçün də Xocalı faciəsinə hüquqi qiymət verib, ayrıca qanun layihəsi qəbul etməklə Dağlıq Qarabağ münaqişəsinin həllində Azərbaycanın mövqeyini daha da gücləndirmiş olacağıq. Çox arzulayıram ki, bunu bir sənəd kimi qəbul edək. Ona görə ki, Xocalı faciəsini nə vaxtsa tanımayanlar da olacaq. Buna bir hüquqi məsuliyyət olmalıdır. O cümlədən beynəlxalq qurumlarla işlərimizdə də bu amilə yer verə bilərik”.
Məhəmmədəli QƏRİBLİ
