Hakimiyyətdə təmsil olunan elə insanlar var ki, sanki özlərini sosial şəbəkələrdə söydürməkdən zövq alırlar. Onlar ya düşünərək belə addım atırlar, ya da qabiliyyətləri çatmadığı üçün, danışıb özlərini və hakimiyyəti pis duruma salırlar.
Bu qəbildən olan adamların bildirdikləri fikir bəzən sadə vətəndaşlara elə “od qoyur” ki, onlar hətta bir neçə həftə ərzində öz qəzəblərini sosial şəbəkələrə töküb “quş buraxan” adamı nəyi var “linç” edirlər. Nəticədə ziyan hakimiyyətin imicinə dəyir. Əslində, hakimiyyətin belə adamların yersiz danışıqları ilə guya komanda maraqlarını müdafiə etməsinə heç ehtiyacı yoxdur. Çünki cənab Prezidentin birbaşa xalqla təmasa getdiyi, vətəndaş məmnunluğu istiqamətində ciddi addımlar atdığı bir vaxtda hansısa hakimiyyət təmsilçisinin çıxıb etiraz doğuran açıqlama verməsi heç də məqbul sayıla bilməz. Bir də görürsən biri durub deyir ki, müəllim dolana bilmirsə, gedib əlavə olaraq bənna işləsin. Digəri deyir ki, kim dolana bilmirsə, gedib soğan əksin. Bu günlərdə isə daha orijinal bir fikirlə tanış olduq. Hakimiyyətə yaxınlığı ilə seçilən şəxslərdən biri “quşu lap gözündən vurub”. Adam deyir ki, 180 manatla bir ailə tam şəkildə bir ay dolana bilər. Nisbətən imkanlı adam kimi səciyyələndirilən həmin adam sonra deyir ki, mənim nəvələrim bir-birinin paltarlarını geyinə-geyinə böyüyürlər. Hamı bilir ki, yalan deyir, ona görə də sərt reaksiya ilə üzləşməli olur. Bu yöndə gedən diskussiyada yazılan bir status xüsusilə diqqətimizi çəkdi. Sosial şəbəkə istifadəçilərindən biri yazır ki, yaxşı imkanı olan filankəsin nəvələri bir-birinin paltarını geyinib böyüyürsə, onda bizim balalarımız gərək bir-birinin ətini yesin. Belə fikirləri biz nisbətən əvvəlki dönəmlərdə də eşitmişik. Sabiq nazirlərdən biri demişdi ki, Qarabağ əlili dolana bilmirsə, gedib metroda ayaqqabı təmizləsin. Maraqlıdır ki, xalqın tələbi ilə uzalaşmayan və daban-dabana zidd olan bu tip açıqlamalardan sonra əhalinin verdiyi reaksiyalar da müəllifləri qane etmir. Elələri var ki, çıxıb deyir ki, sosial şəbəkədə ancaq avara adamlar olur. Bununla da guya ictimai qəzəbi söndürməyə cəhd edirlər. Nəticədə alova qığılcım səpmiş olurlar. Heç olmasa həmin adamlar görsünlər ki, hətta ölkənin ali postunda təmsil olunan rəsmilərin belə, sosial şəbəkə hesabları mövcuddur. Söyülməkdən zövq alan bu qəbil insanlar unutmasınlar ki, onlar atdıqları yersiz addımları ilə, eyni zamanda, hakimiyyətin imicini də zədələmiş olurlar. Çox yaxşı olar ki, bu cür adamlar özlərini senzura etsinlər. Yox, artıq bu onlarda vərdişə çevrilibsə, yaxşı olar ki, onlara elə hakimiyyət tərəfindən “DANIŞMA!” kimi limit qoyulsun. Bu edilməsə, artıq belə mövzuda örgəncəkli adama çevrilən rəsmilər daha böyük ictimai narazılıqların yaranmasının əsasını qoya bilərlər. Danışığını bilməyənlərin danışmaması ümidi ilə...
Məhəmmədəli QƏRİBLİ
