“Bir də ki, məlumatıma görə, o (Azər Süleymanovu nəzərdə tutur - İ.S.) çıxış etməyib, sadəcə, sual verib” “Avakyan kimi bir separatçının o formada qiymətləndirilməsi yolverilməz və qəbuledilməzdir” “Biz Gürcüstan-Azərbaycan dostluğuna xələl gətirmək istəyən üçüncü qüvvəyə qarşı barışmaz olmalıyıq”
Bildiyimiz kimi, son ay yarımdır ki, Gürcüstanın Axalkalaki bölgəsində Dağlıq Qarabağda əli yüzlərlə azərbaycanlının, Abxaziyada isə gürcülərin qanına batan cani Mixail Avakyana abidə qoyulması müzakirə mövzusuna çevrilib. Hətta bununla bağlı həm Azərbaycan dövləti, həm Gürcüstanda yaşayan soydaşlarımız, həm də gürcülər özləri ciddi etiraz bildiriblər. Təəssüf ki, hələ də M.Avakyanın büstü Gürcüstan hökuməti tərəfindən götürülməyib.
Onu da vurğulayaq ki, Gürcüstan parlamentində təmsil olunan deputatlardan biri - Azər Süleymanov M.Avakyanın büstünün götürülməsi tələbilə parlamentdə məsələ qaldırıb. Məlumatlara görə, A.Süleymanov bu məsələ ilə bağlı çıxış edərkən parlamentin digər azərbaycanlı deputatları Savalan Mirzəyev, Mahir Dərziyev və Ruslan Hacıyev zalı tərk ediblər.
Məsələyə aydınlıq gətirməsi üçün Marneulidən majoritar qaydada Gürcüstan parlamentinə deputat seçilən Ruslan Hacıyevlə “Facebook” üzərindən əlaqə saxldıq.
- Ruslan müəllim, Sizə sualları çoxdan göndərmişdim, ancaq nədənsə gec cavab verdiniz…
- İnanın ki, bu, vaxt qıtlığı ilə bağlıdır, başqa səbəbi yoxdur. İşimiz çoxdur.
- Deyilənə görə, həmkarınız Azər Süleymanov Gürcüstan parlamentində Avakyanın abidəsinin götürülməsi ilə bağlı çıxış edərkən siz, Savalan Mirzəyev və Mahir Dərziyev zalı tərk etmisiniz. Deyilənlər nə dərəcədə doğrudur? Həqiqətən də belə bir addım atmısınızsa, bunun səbəbi nədir?
- O danışarkən biz zalı tərk etməmişik. Ümumiyyətlə, həmin vaxt nə mən, nə Savalan Mirzəyev, nə də Mahir Dərziyev zalda olmamışıq. O danışanda mən niyə çıxmalıydım ki? Çıxmaq üçün səbəb də yoxdur. Bu məlumat tamamilə yalandır, həqiqəti əks etdirmir. Bir də ki, məlumatıma görə, o (Azər Süleymanovu nəzərdə tutur - İ.S.) çıxış etməyib, sadəcə, sual verib. Bir neçə gün əvvəl parlamentdə Savalan bəy də sual veribmiş, həmin vaxt mən zalda yox idim. Olmamışamsa, belə çıxır ki, o danışanda da zalı tərk etmişəm?
- Savalan bəyin sualı nə ilə bağlı olub? Məlumatınız varmı?
- O, Gürcüstanda fəaliyyət göstərən Azərbaycan, eləcə də gürcü məktəblərinin təmiri və içməli su problemi ilə bağlı sual verib.
- Ümumiyyətlə, əli gürcü və Azərbaycan xalqının qanına batan bir caniyə Gürcüstanda abidə qoyulmasına münasibətiniz necədir?
- 1994-cü ildə Axalkalakidə M.Avakyana qoyulan büst 2019-cu ilin əvvəlində ailəsi tərəfindən restravrasia edilərək açılış edilib. Yəni bu büst indi qoyulmayıb, 25 il bundan əvvəl qoyulub, son zamanlar isə bərpa edilib.
- Avakyanın büstü ilə bağlı bir azərbaycanlı deputat olaraq etirazınızı bildirmisinizmi?
- Mən bununla bağlı bir deputat olaraq kəskin və qəti etirazımı bildirdim, yenə də bildirirəm. Hesab edirəm ki, Avakyan kimi bir separatçının o formada qiymətləndirilməsi yolverilməz və qəbuledilməzdir. Bunu demişəm, yenə də deyirəm. Tərəfimizdən bununla bağlı Gürcüstan hökuməti ilə yetərli dərəcədə müzakirələr aparılıb, aparılır və aparılacaq da. Biz o büstün götürülməsini tələb edirik. Hazırda bu istiqamətdə Gürcüstan və Azərbaycan xarici işlər nazirlikləri tərəfindən müzakirələr davam etdirilir.
Marneulidə mədəniyyət evinin qarşısında yerləşən Nəriman Nərimanovun abidəsi ilə bağlı onu söyləyə bilərəm ki, həmin abidə orada uzun illərdir var və olacaq. Heç bir zaman onun oradan götürülməsi və o heykəllə bağlı hər hansı bir müzakirə aparılmayıb və bunu rəsmi olaraq Marneulinin Bələdiyyə sədri bu günlərdə bəyan etdi. Ona görə də bu kimi şayiələri əsassız həsab edirəm. Nərimanovun heykəlinin köçürülməsi və yaxud o heykəlin taleyi ilə bağlı müzakirə belə aparılmır.
- Bu gün Gürcüstanda yaşayan azərbaycanlıların təhsillə, eləcə də digər məsələlərlə bağlı problemləri çoxdur, bu məsələlər necə, azərbaycanlı deputatlar tərəfindən Gürcüstan parlamentində müzakirəyə çıxarılırmı?
- Gürcüstanda Azərbaycandilli məktəblərdə normal həyat tərzi davam etdirilir, bütün məktəblər dərs vəsaitləri ilə təmin olunub. Məktəblərdə əsaslı təmir işləri aparılır. Bildiyimiz kimi, 2018-ci ildə 5 məktəb “Millennium” proqramı ilə əsaslı şəkildə reabilitasiya olundu. Onlardan Təzəkənd 1 nömrəli ictimai məktəbinə Sovet İttifaqı Qəhrəmanı Əmrah Aslanovun adı qaytarıldı. Məlum olduğu kimi, 2009-cu ildən başlayaraq, keçmiş hakimiyyətin zamanında bütün məktəblərdən və bütün binalardan adlar götürülmüşdü. Bu gün bu adların bərpası tendensiyası bizim hakimiyyət tərəfindən başlanıb, həyata keçirilir. Bilirsiniz, bu yöndə görülən müsbət işlərimiz görünür ki, hansısa üçüncü tərəfi narahat edir. Ayrıca onu qeyd edə bilərəm ki, təhsilimizdə də yeniliklər var. Məktəb binalarının təmiri, infrastruktur məsələləri həyata keçirilir, hazirda Marneuli 1 saylı ictimai məktəb bütün standartlara uyğun məktəb kimi yenidən inşa eidlir. 2019-cu ildə Şulaver 2 nömrəli və Copi kəndinin məktəbinin yenidən tikilməsi ilə bağlı hökumətin layihəsi var. Bu il onların tikintisinə başlanacaq və bu tendensiya davam etdirilir.
- Avakyanın abidəsi ilə bağlı məsələ, eləcə də digər məqamlar var ki, onlar Gürcüstan-Azərbaycan münasibətlərinə mənfi təsir göstərə bilər…
- Gürcüstan-Azərbaycan münasibətləri, əlbəttə, çox dəyərlidir. Bu dostluq, əməkdaşlıq, qonşuluq hər iki dövlət üçün böyük əhəmiyyət kəsb edir. Əsasən də Gürcüstan azərbaycanlıları üçün bu münasibət çox qiymətlidir. Azərbaycan Gürcüstan üçün, Gürcüstan da Azərbaycan üçün hər zaman strateji müttəfiq olub və Gürcüstan-Azərbaycan münasibətlərini çox yüksək qiymətləndirirəm. Dünya miqyasında bütün arenalarda Gürcüstan və Azərbaycan bir-birini dəstəkləyib. Eyni zamanda da hər iki dövlət bir-birinin ərazi bütövlüyünü dəstəkləyib. Bildiyimiz kimi, hər iki dövlət oxşar bir tale yaşayıb, hər iki dövlətin 20 faiz torpaqları işğal olunub. Bu eyni taleyi yaşamaq Gürcüstanı və Azərbaycanı sıx, qol-qola güclü durmağa məcbur edir. Hər hansı bir üçüncü qüvvənin bu münasibətlərə zərər gətirməsinə yol verməyəcəyik. Ona görə də hesab edirəm ki, ictimayyət də bu yöndə gərəkli addımları atmalıdır. Bu istiqamətdə siyasilərimiz addım atır və ictimaiyyət də o yolda olmalıdır. Çalışmalıyıq ki, Azərbaycan-Gürcüstan dostluğu, münasibətləri günü-gündən daha da inkişaf etsin. Ona görə ki, Gürcüstanda yaşayan azərbaycanlılar bilavasitə bunda maraqlıdırlar. Hər iki dövlət, hər iki ictimaiyyət arasında isti münasibətlər olub, var, olacaq da. Bu səbəbdən də qoruduqları isti və səmimi münasibətlərə görə həm Gürcüstan, həm də Azərbaycan liderlərinə, rəhbərlərinə öz minnətdarlığımı bildirmək istəyir, onlara uğurlar arzu edirəm. Gürcü və Azərbaycan xalqı arasında qədim və böyük tarixi məna, əhəmiyyət daşıyan qırılmaz dostluq əlaqələri, münasibətləri var. Biz Gürcüstan və Azərbaycan dostluğuna xələl gətirmək istəyən üçüncü qüvvəyə qarşı barışmaz olmalıyıq. Hər zaman gürcü və Azərbaycan xalqı dost, qardaş xalq olub. Əminəm ki, yüzillər boyu davam edən Gürcüstan-Azərbaycan dostluğu gələcəkdə daha geniş, güclü şəkildə davam edəcək və dövlətlərimiz bir-birini dəstəkləyəcəklər.
İradə SARIYEVA
