Məlum olduğu kimi, Ermənistanla ABŞ arasındakı münasibətlərdə ciddi gərginlik yaşanır. Hətta bunun ən aydın təzahürü özünü Ermənistan xarici işlər nazirinin ABŞ-a nəzərdə tutulan səfərinin ləğvində özünü göstərir. Buna səbəb Ermənistanın Suriyaya missiya göndərməsi və erməni şirkətinin həmin bölgəyə silah daşınması olub.
Ermənistan bu vəziyyətdən çıxış yolunu NATO və Avroatlantika məkanına inteqrasiya məsələsini yenidən gündəmə gətirməkdə görür. Hətta erməni ordusunun NATO standartlarına keçirilməsi, ölkənin yenidən NATO təlimlərində iştirakı da aktuallaşdırılıb. Ermənistan və Gürcüstanın müdafiə nazirləri belə bir vaxtda İrəvanda keçirdikləri görüş zamanı iki ölkə arasında 2019-cu il üçün hərbi sahədə əməkdaşlığa dair proqramı imzalayıblıar. Ermənistanın müdafiə naziri David Tonoyan deyib ki, o və gürcüstanlı həmkarı Levan İzoriya iki ölkə arasında hərbi əməkdaşlığın tədricən genişləndirilməsinin əhəmiyyətinə inanırlar. O da vurğulanıb ki, Ermənistan Gürcüstan ərazisində keçirilən NATO hərbi təlimlərində fəal iştirakını davam etdirəcək. Gürcüstanın müdafiə naziri Levan İzoriya bildirib ki, Ermənistan hərbçilərinin NATO-nun “Noble Partner” və “Agile Spirit” hərbi təlimlərində iştirakını yüksək qiymətləndirir. Ermənistan hakimiyyəti son dövrdə Avropa Birliyi istiqamətində aparılan işi “məxməri inqilab”dan sonrakı ilk aylara nisbətən, nəzərəçarpacaq dərəcədə canlandırıb. Digər tərəfdən, aylarla verilən bu fasilə yeni, eyni zamanda tam formalaşmamış hakimiyyətin tamamilə anlaşılan digər problemlərilə şərtlənirdi. İndi buraxılan zamanın yerini doldurmaq lazımdır. Bu nöqteyi-nəzərdən, baş nazir Nikol Paşinyanın Almaniya səfəri, eyni zamanda Avropa Birliyi üzvü olan 16 ölkənin xüsusi səfirlərinin Şərq Tərəfdaşlığı Proqramı çərçivəsində Ermənistana səfər etməsi mühümdür. Bir faktı da qeyd edək ki, Ermənistana bu istiqamətlərdə çabalar göstərməkdə Fransanın ermənipərəst prezidenti Emmanuel Makronun xüsusi fəallığı nəzərə çarpır. Martın əvvəlində isə Ermənistanda NATO həftəsinin keçirilməsi də çox maraqlı görünür. Bütün bu sadalanların fonunda aydın şəkildə görünür ki, Paşinyan açıq-aşkar Moskvanın başının üstündən NATO və Qərbə yenidən meyllənmə siyasətinə üstünlük verməyə başlayıb. Paşinyanın bu reveransı hansı nəticəni verə bilər? Politoloq Qabil Hüseynli “Bakı-Xəbər”ə açıqlamasında bildirdi ki, burda Ermənistanın yeni hakimiyyətinin perspektivsiz xarici siyasət kursunu seçdiyi bir daha özünü göstərir: “ Nikol Paşinyan baş nazir postuna gələndən ortada yeni heç nə yoxdur. Ermənistanın daxili həyatı sanki sönüb, iqtisadiyyatda durğunluq davam edir. Xarici siyasətdə isə yalnız təzadlı mövqelərin sərgiləndiyini görürük. Nikol Paşinyan hakimiyyətə gəlməzdən öncə ölkənin Rusiya təsiri altından çıxmasını, hətta KTMT və AİƏT təşkilatlarından təmamilə uzaqlaşmasını qeyd edirdisə, inqilabdan sonra fəal xarici siyasət aparmalı olduqlarını, lakin bu siyasətin üçüncü ölkəyə ziyan vurmayacağı barədə açıqlamalar verdi. Nəticədə o, əvvəlki müsahibələrindən fərqli olaraq, Rusiya ilə münasibətlərdə heç bir dəyişikliyin olmayacağını, Ermənistanın AİƏT və KTMT təşkilatlarına üzv olaraq qalacağını bildirdi. Ermənistanın NATO tərkibdə olan tədbirlərdə iştirak etməsində heç bir qeyri-adi hal yoxdur. Bu tədbirdən əsaslı dəyişikliklər gözləməyə dəyməz. Ona görə ki, KTMT üzvü olan Ermənistanın NATO ilə geniş əməkdaşlıq etmə imkanları məhduddur. NATO ilə geniş əməkdaşlıq üçün hər hansı bir məqsəd, gündəlik olmalıdır. Ermənistanda isə bu yoxdur. Onlar sadəcə, keçmiş hakimiyyətin siyasəti davam edirirlər. Qeyd edim ki, Paşinyanın Avropa və NATO-ya meyillənməsi ilə bağlı yaratdığı fonun ona heç bir xeyiri olmaycaq. NATO və Avropa İttifaqı ilə Azərbaycan daha uğurlu əməkdaşlıq edir. Hər iki qurum ötən il Azərbaycanın ərazi bütövlüyü tam dəstəklədi. Ancaq N.Paşinyan Brüsselə etdiyi səfərdə həmin qərarlara etiraz etmək kimi cəsarət ortaya qoya bilmədi. Çünki onun məqsədi pul dilənmək, yardım istəmək və Azərbaycan Ordusunun qarşısının alınması üçün NATO-nun tədbir görməsini xahiş etmək üçün idi. Birmənalı şəkildə bildirmək olar ki, Paşinyanın bu cəhdləri yalnız Moskvanı və ABŞ-ı şantaj etmək məqsədi daşıyır. Nikol Paşinyan sadəcə Qərbin dostu olmaq istəmir, həm də Rusiyaya düşmən əhval-ruhiyyəsində olan NATO-nun tərəfdaşı olmağa çalışır. Bu imkanı da ona Moskva heç vaxt yaratmayacaq”.
Məhəmmədəli QƏRİBLİ
