Yeganə Hacıyeva: “Aydın şəkildə görünür ki, Paşinyan hakimiyyəti həm daxili, həm də xarici siyasət kursunda ciddi tənəzzül yaşayır”
İrəvanın Suriyaya göndərdiyi humanitar missiyaya sərt reaksiyanın ardınca Vaşinqton Əsəd rejiminə silah daşıyan erməni şirkətini hədəfə alıb. ABŞ Maliyyə Nazirliyinin Xarici aktivlər üzərində nəzarət idarəsi (U.S. Department of the Treasury’s Office of Foreign Assets Control-OFAC) Suriyada fəaliyyət göstərən iki iranlı hüquqi şəxsə Suriyaya silah daşıdığı üçün sanksiya tətbiq edib və məlum olub ki, bunlar İran İslam Keşikçiləri Korpusuna bağlı “Mahan Air” aviaşirkəti və həmin şirkətin Ermənistandakı satış üzrə baş agentliyi - “Flight Travel LLC” şirkətidir.
ABŞ-ın Ermənistandakı səfirliyinin rəsmi səhifəsində yayımlanan məlumatda bildirilir ki, Ermənistanda yerləşən “Flight Travel LLC” şirkəti “Mahan Air”in əsas gəlir mənbələrindən biri hesab olunur. Şirkət Ermənistanda “Mahan Air GSA” kimi fəaliyyət göstərməsindən dolayı ABŞ Maliyyə Nazirliyinin diqqətinə düşüb. Bildirilir ki, “Flight Travel LLC” dəfələrlə “Mahan Air”ə verdiyi kommersiya dəstəyinə görə sanksiyalara məruz qalacağı barədə edilən xəbərdarlıqları görməzdən gəlib.
Erməni şirkətinə qarşı Suriyaya görə sanksiya tətbiqinin ardınca Vaşinqton Ermənistan xarici işlər naziri Z.Mnatsakanyanın ABŞ-a neçə vaxtdır hazırlıq görülən səfərini ləğv edib. Bu haqda Ermənistan KİV-ləri məlumat verib. Həmin məlumatda bildirilir ki, Ermənistan XİN bütün mümkün yollarla situasiyanı düzəltməyə və ABŞ dövlət katibi Mayk Pompeonun Mnatsakanyana dəvət göndərməsinə çalışır. Lakin bütün səylər boşa çıxır: “İstisna deyil ki, bu səfərin təşkili üçün erməni tərəfi lobbiçilərin xidmətindən istifadə etsin. Yeri gəlmişkən, bizim Vaşinqtondakı səfirimizin də vəziyyəti yaxşı deyil”.
Göründüyü kimi, Ermənistanla bağlı belə tutarlı faktın ABŞ tərəfindən fiksə olunması İrəvanla Vaşinqton arasında münasibətlərin daha da ziddiyyətli mərhələyə qədəm qoyacağından xəbər verir. Bütün bu yaşananlar ABŞ-Ermənistan münasibətləri üçün nə vəd edir?
Politoloq Yeganə Hacıyeva “Bakı-Xəbər”ə bildirdi ki, Ermənistanda son vaxtlar baş vermiş siyasi dəyişikliklər İrəvanla Moskva arasında ənənəvi möhkəm münasibətləri sual altına qoyurdu: “Biz bu gərginlikdə artan fazanı Paşinyanın rəsmi baş nazir seçilməsinə kimi müşahidə edə bildik. Həmin dönəmdə Paşinyanın sırf anti-Rusiya siyasəti yürüdəcəyi bildirilirdi. Lakin hazırda baş verən hadisələr göstərir ki, Ermənistan yenə də Rusiyanın təsiri altındadır. ABŞ Ermənistana yönəlik ciddi reverans da etdi. 2018-ci ilin oktyabrında İrəvana səfəri zamanı ABŞ Prezidentinin milli təhlükəsizlik üzrə müşaviri Con Bolton bildirdi ki, ABŞ Ermənistana silah satışı imkanını nəzərdən keçirə bilər. Öz növbəsində, Paşinyan Boltona dedi ki, İrəvan silah tədarükü sazişi üzrə müzakirələrə hazırdır. Göründüyü kimi, Ermənistanın guya qərbpərəst olan yeni hökumətinin Moskvaya bu cür açıq reveransları Vaşinqtonda güclü qıcıq doğurub. ABŞ Dövlət Departamentinin məlum bəyanatı, erməni şirkətinə ABŞ-ın sanksiyası, Mnatsakanyanın ləğv edilən Amerika səfəri İrəvan üçün ciddi siqnal sayılmalıdır. Bu fakt bir daha Ermənistanın ardıcıl xarici siyasətinin olmadığını sübut edir. Fikir verin, Paşinyan hakimiyyətindən sonra Ermənistanda zərrə qədər də irəliləyiş nəzərə çarpmır. Xüsusilə də xarici siyasət kursunda çabalamaları görürük. Suriyaya silah göndərmək ABŞ və Qərb koalisiyasına açıq meydan oxumaq anlamına gəlir. Çünki həmin konfliktlə bağlı dünya gücləri arasında müharibə gedir. Adətən kiçik ölkələr bu cür məsələlərə çox müdaxilə etmirlər. Çünki mövqenin konkretləşməsi dostla yanaşı, ölkəyə dümən də qazandıra bilir. Ermənistan Rusiyanın qorxusundan bu addımı atıb. Ancaq nəticədə manevr imkanını itirib. Ermənistana ABŞ-dan ilk narazılıq siqnalı çox ciddi verilib. O qədər ciddi ki, hətta XİN rəhbərini ölkəyə buraxmadılar. Yəqin ki, bunun ardınca ABŞ və Qərb Ermənistana ianələrini də kəsəcək. Bir sözlə, Ermənistanın yeganə çıxış yolu tam olaraq Rusiyanın ağuşuna qayıtmaqdır. Amma Rusiya da onu əvvəlki etibarilə geri qaytarmayacaq. Aydın şəkildə görünür ki, Paşinyan hakimiyyəti həm daxili, həm də xarici siyasət kursunda ciddi tənəzzül yaşayır”.
Məhəmmədəli QƏRİBLİ
