Fəzail Ağamalı: “Dedi ki, mitinqə minlərlə adam gəlir, kimin hansı hərəkət edəcəyinə təşkilatçılar məsuliyyət daşımırlar”
Bakı Şəhər İcra Hakimiyyəti (BŞİH) Milli Şuranın fevralın 23-nə təyin etdiyi mitinqlə bağlı müraciətinə cavab verib. Milli Şuranın Yasamal rayonundakı İdman Sağlamlıq Kompleksinin stadionunda (keçmiş "Məhsul") mitinq keçirməsinə razılıq verilməyib. Bununla bağlı təşkilatçılara məlumat verilib. Bu dəfə də mitinqə "yox” cavabı verilməsinin səbəbi yanvarın 19-da icazə verilmiş mitinqdən sonra baş verən asayiş pozuntusu, o cümlədən, sözügedən mitinqdən sonra 200-dən artıq ayrı-ayrı təşkilat və vətəndaşların mitinqə icazə verilməməsi üçün etdiyi müraciətlər, habelə Bakı Şəhər Baş Polis İdarəsinin eyni məzmunlu xahişi olub.
Qeyd edək ki, bu, Milli Şuraya 19 yanvar mitinqindən sonra verilən ilk etiraz deyil. Həmin mitinqin növbəti həftəsi də Milli Şura meriyaya məhz deyilən məkanda mitinq keçirmək istəyilə müraciət etmişdi. Milli Şura müraciətində bildirmişdi ki, yanvarın 26-sı Bakının Yasamal rayonundakı İdman-Sağlamlıq Kompleksinin stadionunda mitinq keçirmək istəyir. Meriyanın imtina ilə bağlı cavab məktubunda bildirilib ki, Milli Şuranın yanvarın 19-da keçirdiyi mitinqdən sonra ictimai asayiş pozulub. Eyni zamanda, Milli Şuranın üzvləri yanvarın 20-də Bakıda Şəhidlər Xiyabanını ziyarət zamanı bir sıra qanun pozuntusuna yol veriblər. Bunları əsas gətirərək meriya 26 yanvar mitinqinin keçirilməsini məqsədəuyğun hesab etmədi.
Cavab məktubunun məzmunu açıqlanandan sonra mediaya o da bəlli olub ki, Bakı Şəhər Baş Polis İdarəsinin rəisi, polis general-mayoru Mirqafar Seyidov müxalifətə mitinq keçirməyə icazə verilməməsi üçün Bakı Şəhər İcra Hakimiyyəti qarşısında vəsatət qaldırıbmış və meriyanın 26 yanvar mitinqinə razılaşmamasının bir səbəbi də bu olub. General-mayor M.Seyidov müsahibəsində bildirmişdi ki, 19 yanvar mitinqindən sonra paytaxtda asayişi pozmağa, iğtişaşlar yaratmağa cəhdlər olub: “Sözsüz ki, bu cür qanunazidd hərəkətlərin qarşısı alındı. Ona görə də belələrinə kütləni idarə edə biləcəkləri vaxtadək hər hansı toplantı keçirməyə icazə verilməməsi ilə bağlı Bakı Şəhər İcra Hakimiyyəti qarşısında vəsatət qaldıracam”.
Ardınca yanvarın 22-si mitinqin təşkilatçıları Bakı Şəhər Baş Polis İdarəsinə dəvət edildi. Onlara izah edildi ki, 19 yanvar mitinqindən sonra iştirakçıların bir qrupu Şərifzadə küçəsində və “İnşaatçılar” metrostansiyasının yaxınlığında “Sərbəst toplaşmaq azadlığı haqqında” Qanunun tələblərinə zidd olaraq, aksiyanın razılaşdırılmış vaxtından və ərazisindən kənar qanunsuz küçə yürüşünə cəhd ediblər. Buna görə də mitinqin təşkilatçıları qanunsuz hərəkətlərin gələcəkdə təkrarlanacağı təqdirdə ən ciddi tədbirlərin görüləcəyi barədə rəsmən xəbərdar olunub. Bunun ardınca isə yanvarın 20-si Milli Şuranın üzvləri Şəhidlər Xiyabanını ziyarət etmək istəyərkən insident baş verdi. Milli Şuranın liderlərindən olan AXCP sədi Əli Kərimli iddia edirdi ki, polis onun böyük dəstə ilə xiyabanı ziyarət etməsinin qarşısını almağa çalışıb. Daxili İşlər Nazirliyinin sözçüsü Ehsan Zahidov isə bəyan etdi ki, yanvarın 19-u Milli Şuranın Bakıda keçirdiyi mitinqdə asayişi pozmağa cəhd edən şəxslər ertəsi gün Şəhidlər Xiyabanını ziyarət zamanı qarşıdurma yaradaraq ictimai asayişi pozublar. Şəhidlər Xiyabanını ziyarət zamanı baş vermiş insidentə görə bir neçə müxalifətçi inzibati qaydada həbs olundu. Onların əksəri AXCP üzvü olub.
Bütün bu qanun pozuntularının fonunda, mitinq keçirməkdə israrlı olan qüvvə hələ də ictimai asayişi pozmayacağna dair üzərinə heç bir öhdəlik götürmək belə istəmir. Eyni zamanda, vətəndaşların mitinqdən sonra onların rahatlığının pozulmasına dair etdikləri şikayətlərin araşdırılması hələ tam başa çatmayıb. Təbii ki, belə vəziyyətdə mitinq keçirməkdə israrlı olmaq ölkəni xaosa sürükləməkdən başqa nəsə deyil.
Millət vəkili Fəzail Ağamalı “Bakı-Xəbər”ə açıqlamasında bildirdi ki, Milli Şura adı ilə mitinqin keçirilməsinin arxasında, əslində, başqa məqsədlər durur: “Proseslərin başında Əli Kərimli durur. O bilir ki, AXCP sədri kimi mitinq elan etsə, ona dəstək verən olmayacaq. Bu səbəbdən də Milli Şurada ətrafına başqa adamları da cəlb etmək istəyir. Gültəkin Hacıbəyli, Cəmil Həsənli kimi adamlar da Milli Şura təmsilçisi kimi yuxarı başa keçə bilir. Bununla bir görüntü yaradır ki, guya geniş imkana malikdir. Əsasən də bunu xaricə göstərməkdə maraqlı olur. Bütün bu cəhdlərin başqa bir məqsədi isə Azərbaycanda qarşıdurma və xaos yaratmağa hesablanıb. Fikir versəniz görərsiniz ki, yanvarın 19-da keçirilən mitinqin də sifarişi xaricdən gəlmişdi. Mehman Hüseynovun müdafiəsi adı ilə keçirilən mitinqdən bir gün əvvəl Avropa İttifaqı Azərbaycanla bağlı qərəzli bir sənəd qəbul etdi. Bundan daha da ruhlanan Əli Kərimli mitinqdə daha təxribatçı şüarlar səsləndirməyə başladı. Yanvarın 19-dakı mitinq qurtarandan sonra əvvəlcədən öyrədilmiş adamlar yürüşə cəhd etdi. Həmin vaxt, fikir verdinizsə, Əli Kərimlinin maraqlı münasibəti oldu. Dedi ki, mitinqə minlərlə adam gəlir, kimin hansı hərəkət edəcəyinə təşkilatçılar məsuliyyət daşımır. Necə ola bilər ki, sənin dəvətinlə gələn insanlar sözə qulaq asmırlar? Onda hansı məsuliyyətlə mitinq keçirilir? Bunun ardınca isə onlar 20 yanvarda belə təxribata cəhd etdilər. Bu bizim milli-mənəvi dəyərlərimizə zidd olan bir addım idi. Belə siyasət ola bilməz. Belə müxalifətçilik də ola bilməz. Müxalifət obyektivliyə əsaslanaraq, hakimiyyəti tənqid edə bilər. Bu normaldır. Bunların proqramında isə Azərbaycanı xaosa çevirmək cəhdi var. Bir neçə gün əvvəl mən Prezidentin köməkçisi Əli Həsənovun məqaləsini oxudum. Həmin məqalədə Əli Kərimlinin bütün daxili dünyasının mahiyyəti olduqca konkret arqumentlərlə şərh edilir. Bundan onlar nəticə çıxarmalıdırlar”.
Məhəmmədəli QƏRİBLİ
