Məhərrəm Zülfüqarlı: “Ermənistan cəmiyyəti, Azərbaycan cəmiyyətindən fərqli olaraq, aqressivdir”
Bu gün Ermənistanda vəziyyətin dəhşətli olması faktdır. Faktiki olaraq, sosial-iqtisadi, siyasi böhran burulğanında çabalayan bu ölkədə, demək olar ki, hər gün ağlasığmaz hadisələr baş verir. İşsizliyin baş alıb getdiyi Ermənistanda nəinki sadə vətəndaşlar, eləcə də diplomatlar, alim və müəllimlər, bir sözlə, ziyalı kəsimi kütləvi işsizlik təhdidi ilə üzləşib.
Nikol Paşinyan nə qədər populist və "iqtisadi sıçrayış” xarakterli proqramlar qəbul etsə də, ölkənin xaosa sürükləndiyi göz önündədir. Artıq Ermənistanın dövlət borcu cari ilin ilk aylarından etibarən sürətlə artmağa başlayıb. Bu barədə yayılan məlumatlar ölkə ictimaiyyətində narazılıqlar yaradır. Məlum olub ki, keçən il dekabrın 31-də qeydə alınan 6,922 milyard dollarlıq dövlət borcu cari ilin 31 yanvarında 6,951 milyard dollara çatıb. Ölkənin xarici borcu ümumi dövlət borcunun 4,996 milyard dollarlıq hissəsini təşkil edib. Vəziyyət o yerə gəlib çatıb ki, Ermənistanda islahat adı ilə camaatın cibinə girirlər. Qaz, işıqpulu yığan müfəttişlər istehlak olunandan artıq abonentlərə pul yazırlar. Artıq bir sıra erməni media orqanları bununla bağlı həyəcan təbili çalmağa başlayıblar.
Diqqətçəkən məqamlardan biri də odur ki, Ermənistandan fərqli olaraq, Azərbaycanda aparılan islahatlar sosial gərginliyə, narazılığa, ölkədə stabilliyin pozulmasına gətirib çıxarmır. İxtisarlar aparılmır, heç kim iş yerini itirmir, əməkhaqqı və pensiyalar artırılır. İctimaiyyət bu istiqamətdə görülən işləri dəstəkləyir.
Maraqlıdır, Azərbaycan və Ermənistan xalqlarında islahatlara münasibətdə bu cür fərqli münasibətin kökündə nə dayanır?
Məsələyə münasibət bildirən tarix elmləri doktoru, professor Məhərrəm Zülfüqarlı bunu bir sıra faktorlarla əlaqələndirdi: “Məsələ ondadır ki, Azərbaycan iqtisadi cəhətdən inkişaf etdiyi üçün, aparılan islahatlar uğurla həyata keçirilir və əhali bunu anlayışla qarşılayır. Hansı ölkə ki, iqtisadi baxımdan geri gedib, Ermənistan kimi yerində sayır, sosial problemləri çoxdur, orada islahat aparmaq mümkün deyil. Ermənistan məhz bu qəbildən olduğu üçün, orada islahatlar narazılıqla qarşılanır. İslahatlar bu ölkədə onsuz da ağır olan iqtisadi vəziyyəti daha da ağırlaşdırır. İnsanlar kütləvi şəkildə işsiz qalır. Bu da ölkəni sosial partlayışa sürükləyir. Necə ki, biz forpost olan Ermənistanda proseslərin bu yöndə inkişaf etdiyini görürük. Bir məqamı da xüsusi qeyd etmək istəyirəm ki, Ermənistan cəmiyyəti, Azərbaycan cəmiyyətindən fərqli olaraq, aqressivdir. İstənilən məsələdə, yeri gəldi-gəlmədi, davakar mövqe sərgiləyirlər. Ermənistan cəmiyyəti humanizmdən, milli, dini tolerantlıqdan uzaqdır. Proseslərin kökündə dayanan faktorlardan biri də bununla əlaqədardır. Ona görə də bu ölkədə stabillik dayanıqlı olmur. Fikrimcə, səbəbi bütün bu sadalanan məqamlarla bağlıdır”.
ÜLVİYYƏ
