Aydın Mirzəzadə: “Bu gün Azərbaycan iqtidarının, cənab Prezident İlham Əliyevin uğurlarına həmmüəlliflik etmək istəyənlər çoxdur” Qabil Hüseynli: “Siyasət onun üçün maraqlıdırsa, onda niyə postunu qoyub qaçırdı?”
Tanınmış kinodramaturq, Azərbaycan Kinematoqraflar İttifaqının sədri Rüstəm İbrahimbəyovun Bakıya səfəri geniş müzakirələrə səbəb olub. Səfər çərçivəsində Azərbaycan Kinematoqraflar İttifaqı İdarə Heyətinin iclası keçirilib. Daha sonra dostları həmin ittifaqın sədri Rüstəm İbrahimbəyovun 80 illik yubileyini qeyd etmək üçün Bakıda məclis təşkil ediblər.
R.İbrahimbəyov artıq Bakını tərk edərək Moskvaya qayıdıb. Geri qayıtma ərəfəsində o, müsahibəsində bildirib ki, mayda Kinematoqraflar İttifaqının qurultayını keçirməyi planlaşdırır. Bəzi məqamlara toxunan kinodramaturq “bu gün hakimiyyət bizim Azərbaycan Ziyalılar Forumunda qaldırdığımız məsələlərin çoxunu qaldırır və həll edir..." söyləyib. Çox maraqlıdır ki, bənzər yanaşmanı biz tez-tez digər müxalifət fəallarının da dilindən eşidirik. Hakimiyyətin hansısa istiqamətdə atdığı uğurlu addımlara sanki həmmüəlliflik etmək kimi bir meyl nəzərə çarpır. R.İbrahimbəyovun hakimiyyətə “ideya vermək” kimi fikrinə hakim partiyadan reaksiya verilib.
YAP Siyasi təhlil və proqnozlaşdırma şöbəsinin müdiri, deputat Aydın Mirzəzadə Rüstəm İbrahimbəyovun “bu gün hakimiyyət bizim Azərbaycan Ziyalılar Forumunda qaldırdığımız məsələlərin çoxunu qaldırır və həll edir..." fikrinə də münasibət bildirib: “Azərbaycan hakimiyyəti 1993-cü ildən ulu öndər Heydər Əliyevin, 2003-cü ildən isə cənab Prezident İlham Əliyevin rəhbərliyi və Konstitusiyanın onlara verdiyi səlahiyyət çərçivəsində ölkənin problemlərini mütəmadı olaraq həll edir. Məhz dövlətçilik xəttinin düzgün tutulması, daxili və xarici siyasət məsələlərinin operativ və milli maraqlara uyğun olaraq həll edilməsi uğurlarımıza səbəb olur. Bu gün Azərbaycan iqtidarının, cənab Prezident İlham Əliyevin uğurlarına həmmüəlliflik etmək istəyənlər çoxdur. Ancaq bizim üçün əsas odur ki, Azərbaycan vətəndaşı təhlükəsiz və yaxşı yaşasın. Bunun üçün də cənab Prezident tərəfindən dəstəklənən mütəmadi addımlar atılır”.
Politoloq Qabil Hüseynli “Bakı-Xəbər”ə bildirdi ki, Azərbaycanda həyata keçirilən islahatlar birbaşa İlham Əliyevin istəyilə baş tutur: “Biz bunu onun son addımlarında müşahidə edə bilirik. Bunu hansısa müxalif qüvvələrin öz adına çıxması tamamilə absurddur. Müxalifət belə ağıllı taktikaları bilirsə, onda niyə hakimiyyətə gələ bilmir? R.İbrahimbəyovun fikirlərinə gəldikdə isə, deyə bilərəm ki, gərək o, siyasətdən danışmasın. Siyasət onun üçün maraqlıdırsa, onda niyə postunu qoyub qaçırdı? Guya iqtidarın hazırda vaxtilə onun irəli sürdüyü ideyalarını həyata keçirdiyi deməsi də çox əsassızdır. Görünür, o hələ də Azərbaycan xalqı qarşısında yol verdiyi nöqsanları başa düşmür. R.İbrahimbəyov hazırda Moskvada yaşayır. Yaxşı olardı ki, o, siyasətdən tamamilə çəkilib, öz yaradıcılığı ilə məşğul olsun. O, Azərbaycanı həqiqətən sevirsə, onda Rusiyada Azərbaycanla bağlı təşkil olunan provokasiyalara heç olmasa bir dəfə reaksiya versin. Çeçenlərlə bağlı olan son hadisələrdə siz onun səsini eşitdinizmi?”
Məhəmmədəli QƏRİBLİ
