Seyid Camal Əzimbəyli: “Müsəlman dövlətləri gərək erməni yalanına alət olmasınlar”
Ermənilər öz mənfur xislətlərinə uyğun olaraq, hər dəfə türklərə qarşı müxtəlif təbliğat vasitələrindən istifadə edirlər. Hansısa dövlətin Türkiyə ilə münasibətlərində müəyyən soyuqluq varsa, o dəqiqə bundan öz məqsədləri üçün istifadə edirlər.
Məlum olduğu kimi, bu günlərdə Almaniyanın Münhen şəhərində Təhlükəsizlik Konfransı keçirilib. Misir Prezidenti Əbdül Fəttah əs-Sisi də Almaniyada keçirilən Təhlükəsizlik Konfransında çıxışı zamanı terrorizm və təhlükəsizlik problemlərindən bəhs edərkən bir sıra məsələlərə toxunub. Düzdür, Misir Prezidenti açıq şəkildə qondarma “erməni soyqırımı” sözü işlətməyib, amma bu məsələyə müəyyən qədər dolayı da olsa toxunub. Əbdül Fəttah əs-Sisi bildirib ki, ermənilər artıq onilliklər boyu Misirdə təhlükəsiz şəkildə yaşayırlar: “Müsəlman bir ölkənin lideri kimi ilk dəfədir bu qədər açıq danışıram. Ərəb və Afrika dünyasındakı qeyri-sabitlik Misirə birbaşa təsir edir. Burada bir məsələni gündəmə gətirmək istəyirəm. Xarici döyüşçüləri ərəb dünyasına soxan kimdir? Onlara silah, təlim və pul verən kimdir? Xarici döyüşçülərin Suriyaya asanlıqla girmələrinə icazə verən kimdir? Misir regiondakı münaqişələr üzündən evlərini tərk edən 5 milyon qaçqına sığınacaq verib. 100 il əvvəl Misirdə qaçan ermənilərə sığınacaq vermişdik. Sonra ermənilər ölkəmizdə sülh və təhlükəsizlik şəraitində yaşadılar”.
Erməni mediası Misir Prezidentinin məlum çıxışını böyük sevinclə qarşılayıb. Onlar hesab edirlər ki, Əbdül Fəttah əs-Sisi açıq formada qondarma “soyqırım” sözünü işlətməsə də, çıxışı ilə bu məsələdə onların xeyrinə böyük addım atıb. Hətta bəzi erməni KİV-ləri Misir Prezidentinin çıxışını təhrif edərək onun guya “soyqırım” sözünü işlətdiyini iddia ediblər.
Məlumat üçün qeyd edək ki, 2013-cü ilin iyulunda Misirdə baş verən hərbi çevrilişdən sonra bu ölkənin Türkiyə ilə münasibətlərində soyuqluq yaranıb. Bir sıra məsələlərdə iki ölkə arasında olan fikir ayrılıqları bəzən gərginlik yaradıb. Qeyd edək ki, rəsmi Ankara Misir hakimiyyətini Türkiyədə dövlət çevrilişinə cəhd edən FETÖ terror təşkilatının üzvlərini dəstəkləməkdə, Misir isə Türkiyəni ikili standartlarda və “Müsəlman Qardaşları”nı dəstəkləməkdə günahlandırır.
Münasibətlərdəki gərginliklə əlaqədar hətta 2016-cı ilin yayında Misir deputatları qondarma “erməni soyqırımı”nın ölkə parlamenti tərəfindən tanınmasına müəyyən cəhd ediblər. Ancaq son nəticədə Misir buna getmədi.
Son hadisələrdən görünən odur ki, ermənilər, ciddi-cəhdlə, Misir-Türkiyə münasibətlərində olan müəyyən soyuqluqdan öz çirkin niyyətlərini həyata keçirmək üçün istifadə etməyə çalışırlar.
Məsələyə münasibət bildirən şərqşünas Seyid Camal Əzimbəylinin sözlərinə görə, Misir qədim dövlət olaraq ermənilərə bu yöndə fürsət verməməlidir: “Əvvəla tarixdən məlumdur ki, Misir çox qədim dövlətdir. Eyni zamanda, Misir Afrika qitəsində əhalisinin sayına görə lider dövlətdir. Ölkə əhalisinin böyük əksəriyyətini müsəlmanlar təşkil edir. Sözügedən ölkə Afrika ilə Yaxın Şərqi birləşdirir və çox strateji mövqeyə malikdir. Bununla yanaşı, tarixən Türkiyə ilə yaxın münasibətlərə malik olub. Osmanlıdan bəri iki ölkə çox yaxın əlaqələrə malik olub. Uzun illər Misir Osmanlının tərkibində olub. Müsəlman ölkələri arasında Misirin özünəməxsus nüfuzu var. Belə olan halda, gərək bu cür böyük ölkə ermənilərə fürsət verməsin və sözügedən məsələyə son dərəcə həssas yanaşmalıdır. İnanıram ki, Misir müsəlman həmrəyliyindən çıxış edərək düşmənə fürsət verməz. Ermənilər bu məsələdə öz çirkin planlarına çata bilməyəcəklər. Tarixən ermənilər türklərə xəyanət edib və arxadan bu ölkəyə zərbə vurublar. Zaman-zaman bu belə olub. Təəssüflər olsun ki, bəzi Avropa dövlətləri erməni yalanlarına uyaraq qondarma “erməni soyqırımı”nı tanıyıb. Bu çox yanlış siyasətdir. Belə olan halda, müsəlman dövlətləri gərək erməni yalanına alət olmasınlar. Ümid edirəm ki, bu belə də olacaq. Ermənilərin qondarma “soyqırım”la bağlı Misirdən gözləntiləri özünü doğrultmayacaq”.
Vidadi ORDAHALLI
