Əli Orucov: “Sözügedən ölkənin bu addımı müsəlman həmrəyliyinə tamamilə ziddir”
Münhendə səfərdə olan Ermənistan prezidenti Armen Sarkisyan Qətər Dövlətinin əmiri Tamim Ben Hamad Əl Tani ilə görüşüb.
Görüşdə tərəflər qarşılıqlı maraq doğuran bir sıra məsələləri müzakirə ediblər. Xüsusilə, onlar müxtəlif sahələrdə strateji əməkdaşlığın genişləndirilməsi, ərzaq sənayesində və su ehtiyatlarında effektiv idarəetmə məsələləri barədə danışıblar.
Sarkisyan qeyd edib ki, iki ölkə əməkdaşlıq üçün böyük imkanlara malikdir. Onun fikrincə, Ermənistan Qətərin yüksək keyfiyyətli su, sağlam qida istehsalında və təchizatında mühüm rol oynaya bilər.
Bununla yanaşı, Sarkisyan Qətər əmirini Ermənistana rəsmi səfərə dəvət edib. Əmir də Sarkisyanı, Ermənistan prezidentini Qətərə dəvət edib.
Bəzi müsəlman Körfəz ölkələrinin, o cümlədən Qətərin Ermənistana belə isti münasibət bəsləməsi təəccüb doğurmaya bilmir. Ən azından ona görə ki, Ermənistanın işğal olunmuş Azərbaycan ərazilərində müsəlman dininə aid ibadətgahları məhv edib. Məscidlərə donuz bağlayıb. Bununla bağlı sübutlar var. bununla bağlı dəfələrlə müsəlman ölkələrinə məlumat verilib, çağrışlar edilib. Buna baxmayaraq, Qətər işğalçı Ermənistanla əməkdaşlığa can atır.
Yeri gəlmişkən onu da qeyd edək ki, 2017-ci ildə Prezident İlham Əliyev İstanbulda D-8 İqtisadi Əməkdaşlıq Təşkilatının IX Zirvə görüşündə bununla bağlı müsəlman ölkələrinə çox vacib çağırış edib: “Özünü müsəlman ölkələrinin dostu kimi qələmə verməyə çalışan Ermənistan Dağlıq Qarabağ və ətraf bölgələrdə məscidləri və dini abidələri dağıdıb. Məscidləri dağıdan ölkə heç vaxt müsəlman ölkələrinin dostu ola bilməz”.
Belə olan halda Qətərin islam həmrəyliyini unudaraq işğalçı ölkə ilə yaxın münasibətlərə can atması nə deməkdir?
Məsələyə münasibət bildirən AMİP funksioneri Əli Orucov Qətərin bütün bunları nəzərə almamasını kəskin tənqid etdi: “Qətər əmirinin Ermənistan prezidentinə göstərdiyi belə yaxın münasibət utancvericidir. Ona görə ki, Qətər ən azından İslam Konfransı Təşkilatında təmsil olunur. Bu təşkilatın da Dağlıq Qarabağla bağlı mövqeyi ortadadır və ən başlıcası Azərbaycanın mənafeyinə uyğundur. Qətər müsəlman ölkəsi olaraq, bunu nəzərə almalıdır. Ancaq biz tamamilə bunun əksini görürük. Qətər neçə müddətdir Ermənistanla daha yaxın əlaqələrin qurulmasına səy göstərir. Məgər Qətər rəsmiləri bilmir ki, Ermənistan islam dininə aid olan məscidləri necə məhv edib? Çox yaxşı bilirlər. Sadəcə bunu nəzərə almaq istəmirlər. Dəfələrlə müxtəlif beynəlxalq tədbirlərdə Azərbaycan bu məsələni gündəmə gətirib. Ancaq təəssüflər olsun ki, nəinki Qətər bəzi digər ərəb ölkələri də Ermənistanla əlaqələri genişləndirməyə səy göstərir. Hesab edirəm ki, bütün bunlar yolverilməzdir. Belə halların qarşısını almaq üçün səylərimizi bütün istiqamətlərdə artırmalıyıq. Qətərin bu addımı müsəlman həmrəyliyinə tamamilə ziddir”.
Vidadi ORDAHALLI
