Fikrət Sadıqov: “O baxımdan düşünmürəm ki, separatçı qurumda hakimiyyətin dəyişməsi sülh üçün hansısa perspektiv açsın”
Ermənistanın baş naziri Nikol Paşinyanın hakimiyyətə gəlməsi Dağlıq Qarabağ münaqişəsinin həlli ilə bağlı müəyyən ümidlər yaratdı. Ən azından ona görə ki, Ermənistanda 20 il hakimiyyətdə olan və müharibə tərəfdarı olan “Qarabağ klanı” hakimiyyətdən getdi. Onun hakimiyyətə gəlməsi, kiçik də olsa, bir ümid yaratdı ki, bu siyasətçi ilə danışıq aparmaq olar.
Ancaq Ermənistanda “Qarabağ klanı” hakimiyyətdən getsə də, separatçı qurum hələ də bu klanın nəzarəti altındadır. Paşinyan baş nazir olandan sonra, yarıgizli-yarıaçıq, tərəflər arasında müəyyən ziddiyyətlər özünü göstərir. Paşinyanın əsas hədəflərindən biri də separatçı qurumun rəhbərliyində öz tərəfdarlarını yerləşdirməkdir. Paşinyanın “Qarabağ klanı”nın aparıcı fiquru olan keçmiş prezident Röbert Köçəryanı həbs etdirməsi, həmçinin, Serj Sarkisyanı küncə sıxışdırması o məqsəd güdürdü ki, bu klan sarsılsın və separatçı rejim Paşinyanın nəzarətinə keçsin. Aparılan bu kampaniyalar çərçivəsində ötən ilin dekabrında “Qarabağ klanı” maraqlarından çıxış edən siyasi qüvvələr parlamentə düşə bilmədilər. Düzdür, onlar Ermənistan cəmiyyətində nüfuzdan düşüblər. Ancaq məlum kampaniyanın da proseslərə müəyyən təsiri olub. Hələlik reallıq ondan ibarətdir ki, Paşinyan separatçı qurumda hakimiyyətin dəyişməsinə nail ola bilməyib. Ancaq görünən odur ki, bütün vasitələrlə bu istiqamətdə səylərini artırıb. Belə olan halda, maraqlıdır, Ermənistanda olduğu kimi, Dağlıq Qarabağdakı separatçı qurumda da hakimiyyət dəyişsə və Paşinyanın adamlarının əlinə keçsə, bu, münaqişənin həllinə hansısa perspektiv aça bilərmi?
Məsələyə münasibət bildirən keçmiş diplomat, politoloq Fikrət Sadıqov bunu istisna etdi: “Çünki burada əsas oyunçu Ermənistandır. Bununla yanaşı, Paşinyan əlindən gələni edəcək ki, Dağlıq Qarabağdakı separatçı rejimin rəhbərləri dəyişsin. Ona görə ki, onlar keçmiş Ermənistan hakimiyyətinin adamlarıdır. İndi Paşinyan özünü böyük bir demokrat hesab edir. Guya birbaşa olaraq Dağlıq Qarabağdakı separatçı qurumun işlərinə müdaxilə etmək istəmir. Ancaq dolayı yolla o, əlindən gələni edəcək ki, orada hakimiyyət dəyişsin. İndiki rəhbərlərin əvəzinə başqaları gəlsin. Ancaq bu o demək deyil ki, separatçı qurumun rəhbərliyi başqa bir regionun adamları ilə əvəzlənəcək. Fikrimcə, separatçı qurumda yaşayan ermənilər müəyyən postlara gətiriləcək. Düşünürəm ki, Dağlıq Qarabağdakı separatçı rejim birinci cərgədə olan oyunçular deyil. Əsas oyunçu rəsmi İrəvan və onu dəstəkləyən müəyyən xarici qüvvələrdir. O baxımdan düşünmürəm ki, separatçı qurumda hakimiyyətin dəyişməsi sülh üçün hansısa perspektiv açsın. Dağlıq Qarabağ məsələsinin həllində dəyişikliklər o vaxt ola bilər ki, xarici təzyiqlər artsın və Azərbaycan güc tətbiq etsin. Hesab edirəm ki, yalnız o halda bu məsələdə hansısa irəliləyiş ola bilər”.
Vidadi ORDAHALLI
