Elşən Manafov: “Bu, Parisdə Azərbaycana olan qayğı və diqqətdən irəli gəlmir”
“Fransa noyabrın 13-dən 14-nə keçən gecə Rusiya tərəfindən Ukrayna ərazisinə endirilən kütləvi zərbələri qətiyyətlə pisləyir. Bu hücumlar nəticəsində həmin ölkədəki Azərbaycan səfirliyi də zərər görüb”. Bu barədə Fransanın Xarici İşlər Nazirliyinin saytında yayımlanan bəyanatda qeyd olunub.
“Fransa Ukrayna, onun xalqı və hakimiyyəti, həmçinin Azərbaycanın səfirliyinin əməkdaşları ilə tam həmrəylik ifadə edir. Fransa bütün tərəfdaşları ilə birlikdə Ukraynaya dəstəyini gücləndirməyə və Rusiyaya təzyiqi artırmağa davam edəcək ki, müharibə dayandırılsın”, - deyə XİN bəyanatını yekunlaşdırıb.
Məlum məsələdir ki, Fransanın belə bəyanatı Azərbaycana olan sevgidən, siyasi dəstəkdən irəli gəlmir. Ən azından yaxın tarixdə Fransanın Azərbaycana etdiyi pislikləri hamı yaxşı bilir. O baxımdan sözügedən bəyanatla Fransa, əslində Azərbaycan hesabına Rusiyaya qarşı düşmənçilik göstərir.
“Sadəcə, Bakının Moskva ilə münasibətlərində maraqlarımıza cavab verməyən gərginlik logistika...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov Fransanın belə mövqe sərgiləməsinə bir neçə prizmadan yanaşdı: “Avropa İttifaqının hərbi əməliyyatların dayandırılması və Ukrayna-Rusiya cəbhəsində atəşkəsin elan edilməsi ilə bağlı təklifləri məlum müharibənin doğurduğu səbəblərin aradan qaldırılmasına və ya onun ədalətli həllinə yönəlməyib. Aİ-dəki ultraqlobalist dairələrin bütün səylərinə, Ukraynaya olan hərbi və maliyyə dəstəyinə baxmayaraq, cəbhədə Rus qoşunlarının hücum əməliyyatlarının qarşısını almaq mümkün olmur. Xüsusilə Pokrovsk ətrafında vəziyyət Kiyev iqtidarını və onun Qərbdəki havadarlarını narahat edir. Onun logistik, habelə sənaye əhəmiyyət kəsb etdiyi birmənalıdır. Rusiya sülh müqaviləsinin imzalanması uçun münaqişəni doğuran səbəblərin aradan qaldırılmasını, Ukraynanın NATO-ya üzvlüyü ilə bağlı danışıqların dayandırılmasını, NATO-nun Şərqə doğru irəliləməsi, habelə Rusiyaya tətbiq edilən sanksiyalardan imtina kursunun elan edilməsini, nəhayət, müharibə nəticəsində Rusiyanın nəzarətinə keçmiş ərazilərin de-yure ona məxsus olmasının təsdiqini tələb edir. Ukraynanın atəşkəslə bağlı mövqeyi, təbii ki, qüvvələrin yenidən səfərbər edilməsinə, Ukrayna və Aİ üçün fərqli reallıqların formalaşmasına, müharibədən usanmış Ukrayna cəmiyyətinin yenidən müharibə notlarına köklənməsinə hesablanıb. Həmçinin beynəlxalq aləmdə Rusiyanın təcrid edilməsi üçün yeni imkanların götür-qoy edilməsinə hesablanıb. Ən əsası isə, ABŞ-ın hazırkı iqtidarı Rusiya ilə danışıqları Aİ-nin istədiyi kimi təhdid ampluasında aparmaqdan imtina edir. Ukraynanın silahlandırılması və təchizatı ilə bağlı məsələləri isə Aİ-nin üzərinə yönəltməklə müharibənin aparılmasının maliyyə yükünü onun üzərinə yükləmək istəyir. Fransanın Azərbaycanın Ukraynadakı səfirliyinin hücuma məruz qalması ilə bağlı məlum mövqeyi rəsmi Parisdə Azərbaycana olan qayğı və diqqətdən irəli gəlmir. Sadəcə, Bakının Moskva ilə münasibətlərində maraqlarımıza cavab verməyən gərginlik logistika, dəhlizlər və yükdaşımalar ətrafında Rusiyanı narahat edə biləcək addımların atılmasına görədir. Yəni Qərbin enerji təhlükəsizliyi ilə bağlı olaylarda rəsmi Bakının daha fəal siyasət sərgiləməsinə, regionun təhlükəsizlik problemləri ətrafında Rusiya və İranın maraqlarının lehinə olmayan addımların atılmasına hesablanıb”.
Vidadi ORDAHALLI
