AŞ Nazirlər Komitəsinin qərarında Bakı-İrəvan sazişinə “erməni bucağından” baxıldı...
Ramil Hüseynov: “Prinsipcə, AŞ Nazirlər Komitəsi həmin qurumların qərəzli siyasətini davam etdirir”
Ermənistanın xarici işlər naziri Ararat Mirzoyan Lüksemburqda Avropa Şurası Xarici İşlər Nazirləri Komitəsinin 134-cü sessiyasında çıxış edib. Çıxışında bildirib ki, nazirlərin bugünkü qərarlarının müddəalarından biri sülh sazişinin tezliklə imzalanaraq ratifikasiya olunmasını tələb edir:
“Ermənistan Azərbaycanla sülh sazişini dərhal imzalamağa və ratifikasiya etməyə hazırdır. Ermənistan və Azərbaycan sülh müqaviləsi layihəsinin razılaşdırıldığını və yekunlaşdırıldığını elan edir. Diqqətəlayiqdir ki, nazirlərin bugünkü qərarlarından biri bu mühüm faktı bir daha təsdiqləyir və sazişin mümkün qədər tez imzalanmasına və ratifikasiyasına çağırır. Mən Ermənistanın təxirə salmadan bu yolla getməyə hazır olduğunu təsdiqləyirəm”.
Belə görünür ki, Mirzoyan orada Avropa Şurası Xarici İşlər Nazirləri Komitəsini də öz maraqlarına tabe elətdirib. Yəni bu dəqiqə sazişin imzalanması üçün lazım olan o deyil ki, mətn hazırdır. Mətən hazır olsa da Azərbaycanın şərtləri var. Yəni AŞ Nazirlər Komitəsinin də Ermənistanla eyni mövqedən çıxış etməsi təəssüf doğurur. Tərəfləri dərhal sülh müqaviləsi imzalamağa çağırış, amma Bakının şərtlərinə qarşı etinasızlıq Azərbaycanda etiraz doğurur. Düzdür, Azərbaycan Respublikasının xarici işlər nazirinin müavini Elnur Məmmədov da həmin tədbirdə çıxış edərək bildirib ki, danışıq aparılmış mətnin imzalanması üçün əsas şərt Azərbaycanın suverenliyi və ərazi bütövlüyünə qarşı iddiaların aradan qaldırılması məqsədilə Ermənistanın konstitusiyasına dəyişiklik edilməsidir. O cümlədən o, ATƏT-in köhnəlmiş və qeyri-funksional Minsk Qrupunun və aidiyyəti strukturların rəsmi şəkildə ləğv edilməsinin zəruriliyini vurğulayıb. Yəni sazişin indiyə qədər imzalanmamasını bu amillərlə əlaqələndirib. Ancaq AŞ Nazirlər Komitəsinin qəbul etdiyi qərarda bu məsələlərin əks olunub-olunmadığını bilmirik. Ehtimal etmək olur ki, Azərbaycanın qeydi, yəni bu şərtlərin zəruri olduğu həmin qərarda qeyd edilməyib. Bax, AŞ Nazirlər Komitəsini ermənipərəst mövqeyə yuvarlandıran budur. Azərbaycanın vacib şərtlərlə çıxış etdiyi həmin qərarda göstərilməyib.
“Ermənistana irad bildirmirlər ki, Konstitusiyada Azərbaycana qarşı ərazi iddiası var və bunu ortadan qaldırın”
Sözügedən məsələ ilə bağlı fikirlərini “Bakı-Xəbər”lə bölüşən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, AŞ Nazirlər Komitəsinin birtərəfli mövqedən çıxış etməsi gözlənilən idi: “Çünki Avropa İttifaqı qurumlarının Azərbaycana münasibətdə sərgilədikləri qərəzli siyasət ortadadır. İllərlə Avropa təsisatları Azərbaycan ərazilərinin Ermənistan tərəfindən işğal edilməsinə, yaşayış məntəqələrinin yer üzündən silinməsinə, ekosistemin çirklənməsinə göz yumdular. Bir dəfə olsun nə Avropa Parlamenti, nə AŞPA, nə də AŞ Nazirlər Komitəsi buna öz kəskin etirazını bildirməyib. Azərbaycan necə ki beynəlxalq hüquqa dayanaraq öz ərazi bütövlüyünü təmin etdi, bir sıra Avropa təsisatları ölkəmizi hədəf aldılar. Guya Azərbaycan Qarabağda suverenliyini təmin edərkən ermənilərə qarşı “etnik təmizləmə” aparıb. Halbuki, bütün dünya gördü ki, ermənilər öz xoşu ilə Qarabağı tərk edir. Həmin Avropa Parlamenti 2023-cü ilin sentyabrında Qarabağda keçirilən antiterror əməliyyatlarından sonra Azərbaycana qarşı 10-a yaxın qərəzli qərar qəbul edib, çağırışlar edib. O cümlədən, AŞPA-nın Azərbaycana qarşı necə ədalətsiz mövqe sərgilədiyini yaxşı bilirik. Bu baxımdan, prinsipcə, AŞ Nazirlər Komitəsi həmin qurumların qərəzli siyasətini davam etdirir. Bir dəfə olsun Ermənistana irad bildirmirlər ki, Konstitusiyada Azərbaycana qarşı ərazi iddiası var və bunu ortadan qaldırın. Ortadan qaldırın ki, iki ölkə arasında sülh sazişinin imzalanması tezləşsin. Bununla bağlı Azərbaycanın tələblərini nəzərə almadan iki ölkə arasında sülh sazişinin imzalanmasına can atırlar. Halbuki, sözügedən məsələlər həll edilmədən imzalanan sülh sazişi dayanıqlı olmayacaq. Hüquqi bazası zəif olacaq. Bir sözlə, Aİ qurumlarının Azərbaycana ədalətsiz münasibəti davam edir”.
Vidadi ORDAHALLI
