Zaur İbrahimli: “Azərbaycan QHT-ləri ilə səfirin görüşmək istəyi varsa, bu nəzərdən keçirilə bilər”
Məlum olduğu kimi, Azərbaycan QHT-ləri USAID-lə əlaqədar ABŞ Prezidenti Donald Trampa müraciət edib. Müraciətdə qeyd edilir ki, ötən uzun illər ərzində ABŞ vergi ödəyicilərinin pulları USAID-in korrupsiya yeminə çevrilib, Bayden-Blinken Administrasiyasının qara şəbəkəsinin formalaşdırılması üçün istifadə olunub:
“Azərbaycan-ABŞ münasibətlərinin itirilmiş illərinə çevrilən Bayden-Blinken dövründə Azərbaycan cəmiyyətində USAID-in ölkədən qovulması, fəaliyyətinin dayandırılması ilə əlaqədar çağırışlar, ictimai qəzəb də artan xətt üzrə güclənib. USAID qrantları Azərbaycanda da ənənəvi, milli-mənəvi dəyərlərə təhqir mahiyyəti daşımaqla, ABŞ-ın bölgədəki imicinə və strateji maraqlarına zərbə vurub. Ümid edirik ki, siz USAID-in Azərbaycandakı cinayətlərinə də nəzər salacaq, ayrılmış qrantların təftişinin aparılmasına göstəriş verəcəksiniz”.
Qeyd etdiyimiz kimi, Azərbaycan QHT-ləri USAID-lə əlaqədar ABŞ Prezidenti Donald Trampa müraciət ünvanlayıb. Maraqlıdır, Azərbaycan QHT-ləri Amerika səfirliyində hər hansı bir görüş keçirməyi planlayırmı?
“Hesab etmirəm ki, bu müraciətdən sonra Azərbaycan QHT-ləri ABŞ səfirliyi və ya digər qurumlarla görüş keçirməlidir”
Azərbaycan Milli QHT Forumunun İdarə Heyətinin üzvü Zaur İbrahimli “Bakı-Xəbər”ə açıqlamasında bunları qeyd etdi: “Azərbaycan QHT-lərinin USAID-lə əlaqədar ABŞ Prezidenti Donald Trampa müraciətinin məqsədi şəffaflığın təmin olunmasıdır. QHT-lər hesab edir ki, USAID-in Azərbaycanda yoxlanması olduqca vacibdir. Həmçinin, Amerikada USAID-in fəaliyyəti ilə bağlı başlayan təftiş prosesin tərkib hissəsidir. Açıqlanan fəaliyyətlər, həyata keçirilən işlər heç də USAİD-in missiyası ilə uyğun gəlmir. Tamamilə fərqli məqsədlərin ortada olduğu görünür. Azərbaycan QHT-ləri müraciətlərində analoji olaraq ölkəmizdə də USAİD-in fəaliyyəti ilə əlaqədar belə bir auditin keçirilməsini vacib hesab edir. Artıq ölkəmizdə bu haqda müzakirələr aparılır. Bu da onu deməyə əsas verir ki, şəffaflığın təmin olunmasına çox ciddi ehtiyac var. Hesab etmirəm ki, bu müraciətdən sonra Azərbaycan QHT-ləri ABŞ səfirliyi və ya digər qurumlarla görüş keçirməlidir. Çünki prosesə ABŞ-da start verilib. Əgər Azərbaycan QHT-ləri ilə səfirin görüşmək istəyi varsa, bu nəzərdən keçirilə bilər”.
Günel CƏLİLOVA
