Məlum olduğu kimi, Ermənistan parlamenti “Ermənistanın Avropa İttifaqına daxil olması prosesinin başlanması haqqında” qanun layihəsini ilk oxunuşda qəbul edib. Hakim partiyanın deputatlarının fikrincə, bu layihə Avropa İttifaqına üzvlük üçün müraciət deyil, Avropa İttifaqına mesajdır, siyasi iradənin ifadəsidir.
Lakin müxalif “Hayastan” fraksiyasının deputatlarının fikrincə, layihə seçkilər ərəfəsində biabırçı blef, daxili siyasi məqsədlər üçün həyata keçirilən xarici siyasi avantüradır.
Erməni mediası yazır ki, əslində, Rusiya ölkə daxilində “5-ci kolon”u hərəkətə gətirmək qərarı verib. O səbəbdən müxalifət belə bir davranış sərgiləyir. “Armenianreport” portalı bu xüsusda yazır: “Ermənistan Aİ və NATO ilə yaxınlaşdıqca, İrəvanın Qərblə münasibətləri möhkəmləndikcə, Rusiyanın “beşinci kolon”u ölkəmizdə daha da əsəbiləşir. Parlamentin “Şərəfim var” fraksiyası səsvermədə Ermənistanın Aİ-yə üzvlük prosesinə başlamaq təşəbbüsünün əleyhinə səs vermklə bunu bir daha təsdiqlədi. Bəyanatın mətnində daxili qanunvericiliyə çoxlu istinadlar var ki, Avropaya qoşulmaq təşəbbüsü normativ aktlara ziddir və onun müəllifləri “xalqın iradəsi” ilə manipulyasiya etməkdən çəkinmirlər. Baxmayaraq ki, bu təəccüb doğurmaya bilməz – axı, qanun layihəsinin ortaya çıxması faktının özü də məhz xalqın iradəsinin nəticəsidir – xatırladığımız kimi, təşəbbüsü Ermənistanın 60 min vətəndaşı imzalamışdı. Amma aşağıdakı sətirləri oxuyanda hər şey aydın olur: “Qanun layihəsi siyasi sənəd kimi Ermənistan Respublikasının fövqəlmilli təşkilatlara, xüsusən də Avrasiya İqtisadi İttifaqına üzvlüyünü nəzərə alsaq, onun üçün dönməz siyasi və iqtisadi nəticələr verə bilər. Aydındır ki, bu proses iqtisadiyyatımız üçün həyati əhəmiyyət kəsb edən Aİİ bazarları ilə azad ticarəti təhdid edir”. Əvvəlcə bu manipulyasiyaların primitivliyini qeyd etmək və bəyanatın müəlliflərinə xatırlatmaq istərdik ki, əslində Aİ ilə Assosiasiya sazişi Serj Sarkisyanın prezidentliyi dövründə imzalanıb. Məlum olduğu kimi, “Şərəfim var” fraksiyasının əsasını məhz Sarkisyanın başçılıq etdiyi Ermənistan Respublika Partiyasının üzvləri təşkil edir. Amma nədənsə xatırlamırıq ki, həmin vaxt bu partiyanın fəalları Rusiyanın qəzəbinə tuş gəlib, bizi qorxudublar. Bu ikiüzlülükdür, amma təəccüblü deyil, köhnələr hər zaman belə ediblər.
Gəlin davam edək. Və burada qeyd etmək lazımdır ki, ölkəmizin Aİ-yə daxil olması prosesinin başlanması haqqında qanun layihəsi bu cür üzvlük üçün ərizə deyil; Biz başa düşürük ki, Ermənistanın Aİ-yə, sonra isə NATO-ya tamhüquqlu üzvlüyü bir gündə, hətta bir ildə baş verəcək proses deyil. Amma Avropaya göstərməliyik ki, Ermənistan ona qoşulmağa, onun bir parçası olmağa can atır. Üstəlik, bu, İrəvanın iqtisadi və təhlükəsizlik sahələrində əməkdaşlığın diversifikasiyasına yönəlmiş balanslaşdırılmış xarici siyasətinin göstəricisidir. Biz artıq kor-koranə təkcə Rusiyaya diqqət yetirmirik. Demək olar ki, Köçəryan və Sarkisyan dövründə Rusiyanın Qafqazda susqun və iradəsiz əlavəsinə çevrilərək bu cür əsassız siyasətdən artıq ağrı-acı ilə yanmışıq. Amma indi Paşinyan hakimiyyətdədir və məqsədyönlü şəkildə Ermənistanı Qərbə aparır. Moskvanı və onun Ermənistan daxilindəki mələklərini hər cür şəkildə ölkə hakimiyyətinin sükanı arxasına keçirməyə çalışanları qorxudan da məhz budur. Onlar Rusiyanın İrəvanın Avropayönümlü istəklərinə respublikanın Aİİ-dən çıxmasının başlanğıcı kimi baxdığını söyləməklə erməni cəmiyyətini qorxuya salırlar. Biz belə bir addımın mümkün iqtisadi və siyasi nəticələrindən qorxuruq. Amma bütün bunlar boş səslərdir. Biz çox gözəl anlayırıq ki, onlar sadəcə olaraq bizi özlərinə daha sıx bağlamağa və Qərbə getməyimizə imkan verməməyə çalışırlar. Lakin bütün bu Sarkisyan və Köçəryan ciyiltiləri artıq Ermənistanda heç kimi maraqlandırmır. 2018-ci ildə erməni xalqı rusiyapərəstləri təkcə hakimiyyətdən deyil, böyük siyasətdən də qovdu. Bəli, məlum hadisələrə görə sonradan parlamentə düşə bildilər. Amma indi deyə bilərik ki, onların *qu quşu nəğməsinin "şahidi oluruq. Onlara qalan Kreml ağalarının əmrlərini yerinə yetirməkdir. Üstəlik, Ermənistanın özündə heç bir geri dönüş olmadan. Yaxşı, qışqırsınlar, Ermənistanın Aİ-yə üzvlük prosesinin başlanması ilə bağlı parlamentdə qanun layihəsini dəstəkləməsinlər. Xoşbəxtlikdən parlamentdəki rusiyayönlü müxalifətin səsləri heç nəyi həll etmir”. Bu arada Ermənistanın baş naziri Nikol Paşinyan ölkə parlamentinin “Ermənistanın Avropa İttifaqına daxil olması prosesinin başlanması haqqında” qanun layihəsini təsdiqləməsinin Avrasiya İqtisadi ittifaqı və Rusiya ilə münasibətlərdə risqləri artırmadığını hesab edir. O, bu barədə parlamentdə çıxışında bildirib: “Hamımız bilirik ki, çoxlu risklərimiz var. Amma bu qərar bu risqlərin heç birini daha da risqli etmir, əksinə, bu, bir çox risqləri idarəolunan edir”. O, qəbul edilən qanunu hökumətinin balanslaşdırılmış siyasətinin sübutu adlandırıb.
Tahir TAĞIYEV
