Şimali Kipr Türk Respublikasının rəhbər heyəti prezident Ersin Tatar başda olmaqla Azərbaycana səfər edib. Səfər çərçivəsində Bakıda Şimali Kipr Türk Respublikası günləri keçirilib.
Bu səfər Şimali Kiprlə bağlı bəzi müzakirələri yenidən gündəmə gətirib. Bəziləri hesab edir ki, Qarabağ münaqişəsi bitdiyi üçün biz artıq Şimali Kipri müstəqil ölkə kimi tanıya bilərik. Bəllidir ki, əvvəl bizə Qarabağ məsələsi mane olurdu. İndiki məqamda isə reallıqlar tam başqadır. Azərbaycan buna getməlidirmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki,
tarix boyu Kipr türklərinə qarşı yunanlar tərəfindən əzab-əziyyət, soyqırım, deportasiya siyasəti həyata keçirilib: “1974-cü ildə Türkiyə Cümhuriyyətinin köməyi ilə Şimali Kipr Türk Respublikası quruldu. Demək olar ki, bütün Şimali Kipr ərazisində yunanlar tərəfindən törədilən soyqırım izlərinə rast gəlmək olar. Həmin yerlər muzeyə çevrilib. Bu hadisələr Azərbaycanla Şimali Kipri bir-birinə bağlayır. Onların yunanlardan gördüyü terroru biz də ermənilərdən görmüşük. Bir neçə il əvvəl Türkiyə prezidenti Rəcəb Tayyib Ərdoğan Şimali Kipr Türk Cümhuriyyətinin türk dövlətləri tərəfindən tanınmasının tərəfdarı olduğunu açıqladı. Prezident bununla bağlı türk dövlətlərinə müraciət də ünvanlamışdı. Hazırda Azərbaycanın məqsədi Qarabağ münaqişəsinin hərbi yolla həllindən sonra siyasi və diplomatik yolla çözümünü başa çatdırmaqdan ibarətdir. Hələ ki, Qarabağ məsələsində arzuladığımız şəkildə qapalı münasibətlər prinsipini pozmaq imkanında deyilik. Ona görə, biz Qarabağın məsələsini bütövlükdə çözəndən sonra bu kimi məsələlərə tamam fərqli baxış sərgiləyə bilərik. Hazırda üzərimizə ciddi basqı var və bu addım bizə olan təzyiqləri daha da artırar. İndiki məqamda bizim Şimali Kiprlə əlaqələrimiz var, onların Bakıda nümayəndəliyi yerləşir. Müəyyən dərəcədə iki ölkə bir-birinin milli bayramlarında iştirak edir, münasibətlər inkişaf etdirilir.
Şimali Kipr dövləti də bunu anlayışla qarşılayır, çünki bizim düşdüyümüz vəziyyətin nə dərəcədə ağır olduğunu onlar da anlayır. Necə ki, bütün məsələlərdə Türkiyə Azərbaycanın yanındadır, Azərbaycan da bu məsələdə Türkiyənin yanında olduğunu dəfələrlə bəyan edib. Biz də dərk edirik ki, artıq Şimali Kiprin müstəqilliyini tanımağın vaxtı çatıb. Azərbaycan Şimali Kiprə səmimi münasibət bəsləyir, hətta bir müddət öncə dövlət başçısı birbaşa reyslə oraya səfər etdi. Türk dövlətləri arasında artan münasibətlər bütün türk dünyasının xeyrinədir. Bu zəruri addımı bir müddət sonra ata bilərik”.
Məhəmmədəli QƏRİBLİ
