Rusiyada arzuolunmaz xarici QHT-lərin siyahısı və xarici agentlərin reyestri MDB dövlətlərinə çatdırılacaq. Bunu Rusiyanın Dövlət Dumasının komissiya sədri Vasili Piskaryov bildirib.
Siyahı MDB Parlamentlərarası Assambleyasındakı tərəfdaşlara veriləcək. Siyahıya “Rusiyada arzuolunmaz və dövlətin təhlükəsizliyinə təhdid yaradan” 110 xarici QHT daxildir.
“Birlik ölkələrinin parlamentarilərinin prioritet vəzifəsi xarici müdaxilə cəhdlərinə birgə qarşı çıxmaqdır”, – deyə deputat izah edib. Deputat daha sonra bunları qeyd edib: “Avrasiya məkanında təhdidlərin ümumiliyini nəzərə alsaq, bizim ötürdüyümüz məlumatlar MDB-nin hər bir dövlətində, o cümlədən seçkilər zamanı vəziyyətin sabitliyini pozmaq üçün xarici kəşfiyyat xidmətlərinin işini boğmağa kömək edə bilər”.
İstisna deyil ki, Azərbaycanda da o cür QHT-lər var. Hansı ki, seçki zamanı ölkədəki sabitliyi pozmaq istəyirlər. Siyahı təqdim olunandan sonra bir sıra məsələlərə aydınlıq gətiriləcək. O baxımdan bunun əhəmiyyətini ekspertlər necə dəyərləndirir?
Sözügedən məsələ ilə bağlı fikirlərini baki-xeber.com-la bölüşən media eksperti Yadigar Məmmədli hesab edir ki, bu, çox ciddi məsələdir: “Ümumən, Rusiyanın qaldırdığı məsələ yeni deyil. Azərbaycana bu mövzu kifayət qədər tanışdır. Azərbaycanda tək seçki dönəmində deyil, ümumiyyətlə, ölkədə taleyüklü hadisələr baş verəndə xaricdən maliyyələşən QHT-lər dövrəyə girir. Bir sıra pozucu fəaliyyətlərlə məşğul olurlar. 44 günlük Vətən müharibəsində, 2022-ci ilin sentyabr toqquşmalarında və antiterror tədbirlərində xaricdən maliyyələşən müxtəlif QHT-lər, bloggerlər, media resursları Azərbaycanın haqq savaşına qarşı çıxdılar. Onlar hər vasitə ilə çalışırdılar ki, prosesin qarşısını alsınlar. Çünki onlara xaricdən o cür təlimat verilmişdi. Xarici dairələr və onların maliyyələşdirdiyi QHT-lər müharibədən əvvəl toraqların güc yolu ilə azad olunmasına qarşı çıxırdılar. Cəmiyyətimizi işğalla barışdırmağa kökləyirdilər. Ancaq onların bu planları baş tutmadı. Ona görə ki, dövlət dayaqlarımız möhkəm idi. Xalq dövlətimiz ətrafında sıx birləşmişdi. Rusiyanın bununla bağlı ötürdüyü məlumatlar xüsusi öhdəlik yaratmır. Azərbaycanın belə bir öhdəliyi yoxdur, amma bu ölkə ilə əməkdaşlıq edirik. O baxımdan həmin siyahının təqdim olunması bir sıra məsələlərə işıq sala bilər. Məlum olacaq ki, hansı QHT-lər, bloggerlər bu işin içindədir. Ümumilikdə, bu mövzu aktualdır və Azərbaycan öz işini görür, siyasətini aparır. Belə adamlara qarşı fəaliyyət var. Mediada zaman-zaman müzakirə olunan mövzudur bu. Belə QHT-lərə, adamlara qarşı ictimai qınaq formalaşır. Mətbuatda, sosial şəbəkələrdə bu kimi hallara qarşı tənqidi fikirlər var. Milli, dövlətçilik mövqeyindən çıxış edən vətəndaş cəmiyyəti belə hallara qarşı çıxır. Rusiyada bir sıra səbəbdən bu məsələlər daha kəskindir. Azərbaycanda isə bu, belə deyil. Fərqli məqam həm də ondan ibarətdir ki, Azərbaycan haqq davası aparır və bizə qarşı çıxırlar. Dünya gücləri öz nüfuzlarını bərpa etmək üçün Azərbaycana müxtəlif təzyiqlər edirlər. Belə təzyiqlərin fonunda belə hallar da var”.
Vidadi ORDAHALLI
