Nikol Paşinyan Bişkekdə keçirilən MDB sammitində iştirak etməyib. Putin buna belə izah verib: “Anladığım qədəri ilə Ermənistan MDB-dən çıxmaq fikrində deyil. Baş nazir Paşinyanla bir-birimizə zəng vurub danışdıq, o cümlədən bugünkü sammitlə bağlı. Orada kifayət qədər başa düşülən hallar var. Mən bu barədə danışmayacağam. Anladığım qədərilə, Ermənistan MDB-dən heç yerə getmir”.
Göründüyü kimi, Putin çalışır ki, Paşinyanın incikliyini ört-basdır etsin. Həm də deyir ki, kifayət qədər başadüşülən detallar var. Nədir bunlar və Ermənistan həqiqətənmi Putinin dediyi kimi MDB-dən getmək istəmir?
Müstəqil siyasətçi Mirkazım Seyidov “Bakı-Xəbər”ə bildirdi ki, Nikol Paşinyanın MDB Dövlət Başçıları Şurasının Bişkekdəki növbəti iclasına qatılmaqdan imtina etməsi Ermənistanda və dünyada müzakirə predmetinə çevrilməkdədir: “Rusiya tərəfi Qırğızıstanın paytaxtında Azərbaycan Prezidenti İlham Əliyevlə Paşinyanın görüşünün təşkilini planlaşdırırdı. Görüşün həm ikitərəfli, həm də Prezident Vladimir Putinin iştirakı ilə keçirilməsi nəzərdə tutulurdu.
Ermənistan toplantıda heç xarici işlər naziri səviyyəsində də təmsil olunmadı. Orada yalnız nazirliyin departament rəhbərinin müavini iştirak etdi ki, bu da MDB dövlətlərinə münasibətdə böyük sayğısızlıq kimi qiymətləndirilməlidir.
Mövcud xüsusda irəli çəkilən ilk məqam oktyabrın 5-də keçirilmiş Qranada Sammitidir. Məlum olduğu kimi, Prezident İlham Əliyev həmin toplantıya qatılmaqdan imtina etdi. Azərbaycan buna açıq şəkildə aydınlıq gətirdi. Ancaq Paşinyan Bişkek görüşündən imtinasını əsaslandırmaqdan çəkinir. Çünki bunun kökündə Rusiyadan inciklik dayanır.
Siyasi dairələr hesab edirlər ki, Paşinyan Bişkekə yollanmamaqla sülhdən yayınır. Qeyd edək ki, buna İlham Əliyev belə cavab verib: “İndi isə sual yaranır: Ermənistan sülh istəyirmi? Düşünürəm ki, xeyr. Əgər o, sülh istəsəydi, bu imkandan imtina etməzdi. Ermənistanın baş naziri 6 saat Qranadaya uçur, orada Azərbaycansız Azərbaycanın müzakirə olunduğu anlaşılmaz görüşdə iştirak edir, Bişkekə isə 2-3 saatlıq uça bilmir, vacib işləri var. Bax bütün bunları biz açıq şəkildə deməliyik. Hamı bunu görür, lakin bunu demək və buna əsaslanmaq lazımdır”.
Paşinyan Bişkekə getməməklə, öz aləmində, dünyaya mesaj verdiyini düşünür. Demək istəyir ki, görürsünüz, mən Bişkekə, yəni Rusiyanın hakim rol oynadığı təşkilatın toplantısına getmirəm, amma İlham Əliyev gedir. Yaxud, İlham Əliyev Qranadaya getmədiyi üçün, mən də Bişkekə getmirəm. Hər halda, bunlar ucuz gedişdi. Bununla da sübut olundu ki, Paşinyan tam olaraq Qərbdən asılıdır. MDB-dən konkret uzaqlaşmaq yolunu tutub. Putinin açıqlamadığı məqam budur ki, Ermənistan belə fikirə düşərsə, bu, ona çətin başa gələ bilər”.
Məhəmmədəli QƏRİBLİ
