Ermənistanın Avropa Şurası Parlament Assambleyasındakı nümayəndə heyətinin üzvü Armen Gevorkyan oktyabrın 12-də qurumun payız sessiyasının plenar iclasında “Mövcud konfliktlərin həllində Avropa Şurasının rolu və beynəlxalq təşkilatlara etimasın bərpası” mövzusunun müzakirəsi zamanı çıxış edib.
O, çıxışında erməni xislətinə xas olaraq Azərbaycan və Türkiyənin ünvanına böhtanlar səsləndirib. Ermənistanı “demokratik” ölkə kimi təqdim edərək iddia edib ki, guya Ermənistan Türkiyə və Azərbaycan tərəfindən sıxışdırılır. Guya Avropa enerji resurslarına görə Ermənistana olan təzyiqləri görməzdən gəlir: “Beynəlxalq münasibətlərdə demokratik mədəniyyət, insan haqları və qanunun aliliyi əvəzinə ikili standartlar, güc siyasəti, neft və qaz üstünlük təşkil edən amillərə çevrilib”.
Daha sonra o təklif edib ki, Türkiyə və Azərbaycan AŞPA-dan xaric edilsin: “Sözlərimi ümumiləşdirmək üçün qeyd etmək istərdim ki, Azərbaycan və Türkiyənin Avropa Şurasında bundan sonra da cəzasız qalması bu təşkilatın ideoloji ölümü ilə nəticələnəcək”.
Burada iki məqam diqqəti cəlb edir. Əvvəla, “Mövcud konfliktlərin həllində Avropa Şurasının rolu və beynəlxalq təşkilatlara etimasın bərpası” adı altında müzakirələr keçiriləndə bu kimi təşkilatlara etimad qalmaz. Bu, düpədüz beynəlxalq təşkilatların ölkələrin daxili işinə müdaxiləsi deməkdir. İkincisi, Ermənistan kimi işğalçı dövlətinTürkiyə və Azərbaycanın qurumdan çıxarılması ilə bağlı çağrışı gülünc bir haldır.
“Türkiyə və Azərbaycanı yox, terrorçu Ermənistanı qurumdan xaric etmək lazımdır”
Məsələ ilə bağlı fikirlərini “Bakı-Xəbər”lə bölüşən AMİP funksioneri Əi Orucov hesab edir ki, Avropa təsisatları demokratiya mövqeyindən yox, xristian təəssübkeşliyi mövqeyindən çıxış edirlər: “Avropa qurumları ədalətli idilərsə, niyə 30 ildə Azərbaycan ərazilərinin işğalına, orada törədilən talançılığa, etnik təmizləməyə, ekologiyanın, mədəniyyət, dini abidələrin məhv edilməsinə reaksiya vermədilər? AŞPA və Avropa Parlamentinin qəbul etdiyi 2-3 qətnamədən o tərəfə keçmədilər. Hansı münaqişələrin həllindən söhbət gedə bilər ki, bir dəfə olsun ərazilərimizlə bağlı, orada törədilən vandalizm aktları ilə əlaqədar monitorinq aparılmadı? Bu yöndə ciddi səy göstərilmədi. Neçə il əvvəl Azərbaycanın israrlı tələblərindən sonra ATƏT-in faktaraşdırıcı missiyası Qarabağa göndərildi. Onlar da alayarımçıq hesabat hazırlayıb aradan çıxdılar. İndi utanmadan ermənilərin müdafiəsinə qalxıblar. Bütün dünyanın gözü qarşısında Qarabağ erməniləri könüllü olaraq oranı tərk etdilər. İndi ermənilərə qahmar çıxırlar. Digər tərəfdən, Avropa qurumlarının Türkiyə və Azərbaycana qərəzli münasibəti bəllidir. Belə olmasaydı, 50 ildir Türkiyəyə Avropa İttifaqının qapılarını bağlamazdılar. Ermənistan sadəcə bir maşadır. Başlarına dəysin onların AŞPA-sı. Bu qurumda olmağımızın Türkiyə və Azərbaycana nə xeyri oldu ki? Terrorçu dövlət olan Ermənistana bu imkanın tanınması o deməkdir ki, onlar da terrorçunun yanındadılar. Bunu ancaq belə dəyərləndirmək lazımdır. Türkiyə və Azərbaycanı yox, terrorçu Ermənistanı qurumdan xaric etmək lazımdır”.
Vidadi ORDAHALLI
