Ermənistanın baş naziri Nikol Paşinyan Prezident İlham Əliyevin Azərbaycanın 8 kəndinin hələ də Ermənistanın işğalında olmasına dair bəyanatına məntiqsiz formada cavab verib. Paşinyan iddia edib ki, Ermənistanın da 8 belə kəndi var:
“Biz də öz növbəmizdə deyirik ki, bizim də səkkiz kənd problemimiz var. Çünki, məsələn, Tavuş vilayətində Azərbaycan tərəfindən işğal edilmiş Berkaber (Azərbaycanda Tatlı kimi tanınır), Aygeovit, Vazaşen, Paravakar kəndləri və başqa ərazilər var”.
Paşinyan bildirib ki, anklavlar probleminin həlli yollarından biri də onların Azərbaycanla dəyiş-düyüş edilməsidir: “Amma bu halda da biz bu proseslərin hüquqi nüanslarını nəzərə almalıyıq ki, nəyi sübut etmək olar, nəyi yox...”.
Bu boyda uydurma olar? Məgər Ermənistanın 8 kəndi bizim nəzarətimizdədir?
“O, Qazaxın kəndlərini qaytarmaqdan boyun qaçırmaq istədiyi üçün belə uydurmalarla çıxış edir”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında qeyd etdi ki, Paşinyanın dediklərinin heç bir əsası yoxdur: “Əvvəla, Nikol Paşinyanın Tavuş rayonunda saydığı kəndlərin heç biri Azərbaycanın nəzarətində deyil. Paşinyanın nəyə əsasən bu qənaətə gəldiyini konkret demək çətindir. Yalnız Gədəbəydəki Başkənd bizim nəzarətimizdədir və bunu hamı bilir. O zaman Tavuş rayonunun adıçəkilən kəndləri haradan çıxdı? Paşinyanın adını çəkdiyi ərazilər tarixi olaraq Azərbaycan ərazisidir və Birinci Qarabağ müharibəsi başlayana qədər bu ərazilərin böyük hissəsində azərbaycanlılar yaşayıb. Onsuz da Ermənistan ərazilərində bizim yüz minlərlə soydaşımız olub və azərbaycanlılar zaman-zaman oradan sıxışdırılıb. Ən nəhayət, 1988-ci ildə bütün azərbaycanlılar Ermənistandan deportasiya edilib. 1990-cı ildə Qazaxın Bağanis Ayrım, Sədərəyin Kərki kəndi işğal edildi. 1992-ci ildə Qazaxın daha 6 kəndi işğal olundu. Əgər Azərbaycan Ermənistanın bir neçə kəndini nəzarətdə saxlasaydı, Qərb, dünyadakı bütün erməni lobbisi üstümüzə gələrdi. Bunun ətrafında böyük hay-küy qurardılar. Yoxdur belə şey. Hesab edirəm ki, Paşinyan Qazaxın kəndlərini qaytarmaqdan boyun qaçırmaq istədiyi üçün belə uydurmalarla çıxış edir. Ancaq xoşluqla ərazilərimizi azad etməsələr, bu onlara baha başa gələcək. Lazım gələrsə, qüdrətli ordumuz güc yolu ilə həmin kəndləri işğaldan azad edəcək. Heç bir qüvvə bizə öz suveren ərazilərimizi azad etməyə mane ola bilməz. Azərbaycanın sözügedən məsələdə mövqeyi qətidir. Ermənistan 90-cı illərdə işğal etdiyi kəndlərimizi tərk etməlidir. Bunu xoşluqla etsələr yaxşı olar. O da ola bilər ki, Paşinyan ölkədəki revanşist qüvvələri sakitləşdirmək üçün belə açıqlamalar verir. Çünki anklav kəndlərin qaytarılması məsələsi Ermənistanda böyük rezonansa səbəb olub”.
Vidadi ORDAHALLI
