Şimali Kipr Türk Cumhuriyyətinin başçısı Ersin Tatarın Azərbaycana ilk rəsmi səfəri Ermənistanı ciddi narahat etməyə başlayıb. Həm E.Tatarın səfərini narahatlıqla qarşılayırlar, həm də son zamanlar populyarlıq qazanan, Türkiyə, Azərbaycan, Şimali Kipr qardaşlığının məzmunu ifadə edən "Bir millət, üç dövlət" ideyası onların yuxusunu ərşə çəkib.
Bundan narahat olan Paşinyan hökuməti və erməni Qriqoryan kilsəsi türkoloq, tarix elmləri namizədi Varujan Qeqamyanın dili ilə Türkiyə-Azərbaycan-ŞKTC qardaşlığını hədəfə alır. "Bir millət, üç dövlət" tandemindən narahat olan psevdotürkoloq "Türkiyənin daxili siyasi meydanında “Bir millət, üç dövlət” anlayışı formalaşır"-deyə yazıb. Türkiyəyə qarşı iftiralar atan sözdə türkoloq ənənəvi erməni saxtakarlığından kənara çıxmayaraq, yenə də tarixi gerçəyi təhrif edib. Şimali Kipr Türk Cumhuriyyəti guya "süni yaradılmış dövlətdir" və sair cəfəngiyyatlar söyləyən Qeqamyan qeyd edib ki, son illər Türkiyə yenidən bu ərazinin beynəlxalq səviyyədə tanınması prosesində fəal iştirak edir. "Daxili siyasi sahədə isə “Bir millət, üç dövlət” anlayışı formalaşır.
Tanınmamış Şimali Kipr Türk Respublikasının prezidentinin bu gün Bakıya səfəri də bu məntiq çərçivəsindədir”-deyə o sərsəmləyib.
Qeqamyan çox böyük tarixi faktı unudur ki, Kipr adası Osmanlının nəzarətində olub və Şimali Kipr Türk Cumhuriyyəti də türk ərazisində, türk torpağında yaradılıb və ermənilərin əndişəyə düşməsinə də heç bir əsas yoxdur.
"Kuzey Kıbrıs Türk Cumhuriyyəti Türk Dövlətləri Təşkilatının müşahidəçi üzvüdür, bu da bizi istəməyənləri çox ciddi narahat edir"
Siyasi şərhçi Azər Həsrət "Bakı-Xəbər"ə şərhində "Kuzey Kıbrıs Türk Cumhuriyyəti (Şimali Kipr Türk Cumhuriyyəti) bir reallıqdır. Üstəlik də, elə bir reallıqdır ki, artıq onu heç kim geri çevirə bilməyəcək. Yəni Kuzey Kıbrıs bir türk dövlətidir, mövcuddur, qəbul edilməlidir, başqa yolu yoxdur. Onun Azərbaycanla münasibətləri isə ən yüksək səviyyəyə doğru irəliləməkdədir. Yəni Kuzey Kıbrıs Türk Cumhuriyyətinin cumhurbaşkanı hörmətli Ersin Tatarın Azərbaycana etdiyi ilk səfər bunu deməyə əsas verir. Üstəlik də xatırladaq ki, Azərbaycan Prezidenti İlham Əliyev bir müddət əvvəl belə bir ifadə işlətmişdi ki, Kuzey Kıbrıs Türk Cumhuriyyətinin bayrağı Azərbaycanda dalğalanır və dalğalanmalıdır. Yəni əslinə qalanda bu, dövlətimizin Kuzey Kıbrıs Türk Cumhuriyyəti - qardaş ölkə ilə bağlı strateji hədəfindən xəbər verir"-deyə bildirdi.
A.Həsrətin fikrincə, Azərbaycan dövləti üçün Kuzey Kıbrısla bağlı qaranlıq heç bir məsələ, açıq sual yoxdur. "Təbii ki, bu birlikdən bizim bədxahlarımız, əleyhdarlarımız ciddi əndişə duymaqdadır. Tarixə baxıldıqda ada bütövlükdə Osmanlı torpağı olub. Əlbəttə ki, Osmanlı torpağı olan bir adada bir türk dövlətinin mövcud olması qədər təbii bir şey yoxdur. İkinci bir tərəfdən də, Kuzey Kıbrıs Türk Cumhuriyyəti Türk Dövlətləri Təşkilatının müşahidəçi üzvüdür, bu bizi istəməyənləri çox ciddi narahat edir. Yəni artıq onlar anlayır ki, Kuzey Kıbrıs Türk Cumhuriyyəti addım-addım özünü dünyaya qəbul etdirməyə doğru gedir. Belə olan halda, əlbəttə ki, bizim əleyhdarlarımız, bir tərəfdə ermənilər, digər tərəfdə yunanlar narahat olmalıdırlar. Amma bütün bunlar heç də bizi narahat etmir, yolumuzdan çəkindirmir. Azərbaycan dövləti də, Türkiyə Cumhuriyyəti də, digər türk dövlətləri də Kuzey Kıbrısla münasibətin daha üst səviyyəyə daşınması üçün hərəkətdədilər. Yəni biz öz işimizdəyik. Necə deyərlər, çax-çax baş ağrıdır dəyirman öz işindədir"-deyə A. Həsrət bildirdi.
İradə SARIYEVA
