Fransadan növbəti həyasızlıq. Zatən Fransadan Azərbaycana yönəlik istənilən mənfi addım gözlənildiyi üçün bu o qədər də təəccüblü görünməməlidir. Bu arada xarici işlər naziri Ketrin Kolonna Senatda çıxışı zamanı deyib ki, Fransa BMT Təhlükəsizlik Şurası çərçivəsində ermənilərin Qarabağa qaytarılması ilə bağlı qətnamənin qəbulunu tələb edəcək.
Fransa diplomatı cəfəngiyatlarını davam etdirərək iddia edib ki, Azərbaycan 100 mindən çox erməninin Qarabağdan çıxarılmasını planlaşdırıb və bunu təşkil edib: “Bu, ağır cinayətdir və reaksiyasız qala bilməz. Ermənistanla Azərbaycan arasında münaqişə danışıqlar yolu ilə həll oluna bilər. Bakı başa düşməlidir: siz güc tətbiq etmək yolu ilə gedə bilməzsiniz”.
Belə görünür ki, Makron hökuməti yenidən Azərbaycana yönəlik təzyiqləri BMT müstəvisinə daşımağa çalışır.
“Bütün bunlar Fransa tərəfindən açıq şəkildə beynəlxalq hüququn pozulması və təhrif olunması deməkdir”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədovun fikrincə, Fransa dəfələrlə buna bənzər açıqlamalarla çıxış edib: “Çox təəssüf ki, özünü demokratiyanın beşiyi, insan hüquqlarının müdafiəçisi kimi təqdim edən Fransa belə pozucu siyasət yeridir. Artıq 3 ildir ki, biz Fransanın belə qərəzli mövqeyinə öyrəşmişik. Çünki Vətən müharibəsi başlayan kimi Fransa əsil simasını ortaya qoydu. 30 il ərazilərimizin işğal altında qalmasına göz yuman, yaşayış məntəqələrinin məhv edilməsini görməzdən gələn Fransa separatçıların müdafiəsinə qalxdı. Hər vasitə ilə Ermənistanı müdafiə etməyə başladı. Təəssüf doğuran məqam həm də odur ki, BMT missiyası Qarabağla bağlı fərqli bir hesabat verdiyi halda, ortada heç bir sübut olmadan Fransa Azərbaycanı etnik təmizləmədə ittiham etməyə çalışır. Məsələni BMT müstəvisinə çıxarmağa cəhd göstərir. Bütün bunlar Fransa tərəfindən açıq şəkildə beynəlxalq hüququn pozulması və təhrif olunması deməkdir. Halbuki, Azərbaycan Qarabağdan heç bir ermənini zorla çıxarmayıb. Ermənilər xoşluqla həmin əraziləri tərk ediblər. Azərbaycan hansısa zorakılıq tətbiq etməyib. Bununla bağlı kifayət qədər faktlar da var. Ona görə də Fransa bu riyakarlığa, qərəzli siyasətə son qoymalıdır. Azərbaycan dəfələrlə bu məsələ ilə bağlı öz mövqeyini bildirib. Gələcəkdə də bununla bağlı addımlarını atacaq. O üzdən, yaxşı olardı ki, Fransa tərəfi bu reallığı nəzərə alsın və riyakarlığa son qoysun. Regionda gərginliyin artırılması kiməsə fayda verməyəcək. Paris hesab edirsə ki, bu yolla bölgədə möhkəmlənəcəklər, fikrimcə yanılırlar. Bu, onların xeyrinə olmayacaq”.
Vidadi ORDAHALLI
