Təbii ki, İsrailin beynəlxalq hüquq normalarına uyğun olaraq özünümüdafiə haqqı var. Fərdi qaydada və üzvü olduğu dünya birliyinin kollektiv müdafiə mexanizmlərindən istifadə etməklə özünü qoruya bilər. Terrordan, radikalizm və ekstremizmdən qorunmaq haqqı xüsusilə universaldır və bütün ölkələrə aiddir...
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev qeyd edir ki, İsrailin son günlər fərdi qaydada özünümüdafiə imkanlarından istifadə etməsinə dünyanın selektiv, ikili standart qaydada yanaşmasını bir daha gördük. Politoloq daha sonra yazır:
“Aparıcı Qərb ölkələri və beynəlxalq təşkilatlar qəbul etdilər ki, İsrail ekstremizmdən özünü qoruyur və mülki obyektlərin və sivillərin hücum hədəfi kimi seçilməsindən mümkün qədər uzaqda dayanır, hərbi təyinatlı obyektlərə dəqiq zərbələr vurur.
Azərbaycan vətəndaşları olaraq biz də bütün bunları belə qəbul edirik və dövlətimizin də İsrail-HƏMAS savaşına çoxillik Fələstin problemi kontekstində beynəlxalq hüquq normalarının gözü ilə baxdığını bilirik...
Bəs 2020-ci ilin Vətən müharibəsində və 2023-cü ilin antiterror tədbirlərində Azərbaycan nə edirdi, nəyi hədəfləyirdi və nəyə əsaslanırdı? Azərbaycan ən yaxın keçmişimizin o günlərində terrordan, xarici hərbi təcavüzdən, təcavüzkar etnik separatizmdən özünü müdafiə etmirdimi? İsraildən heç də geri qalmayan dəqiqliklə müharibə qanunlarına, humanitar prinsiplərə əməl etmirdimi? İsraildən heç də geri qalmayan səviyyədə mülki obyektlərə və sivillərə məsuliyyətlə yanaşmırdımı? Yalnız hərbi obyektlərin hədəfə alınması kimi məqsədi maksimum dəqiqliklə icra etmədimi? Etdi. Bəs dünya Azərbaycanın bu davranışlarına, haqq müharibəsinə və tədbirlərinə hansı üzü göstərdi? Təəssüf ki, ən pis üzünü göstərdi. Nə əcəb bu gün Fransa və ya başqa bir Qərb dövlətinin təşəbbüsü ilə BMT Təhlükəsizlik Şurasının fövqəladə iclası çağırılmır və İsraildən dərhal hərbi əməliyyatların dayandırılması tələb olunmur? Axı Vətən müharibəsinin ən qızğın günlərində Fransa BMT TŞ-ni təcili toplatdırmışdı, yalnız müttəfiqlərimiz olan Qoşulmayan ölkələrin müqaviməti nəticəsində TŞ heç bir qətnamə qəbul edə bilmədi. Azərbaycanın həm 44 günlük müharibə, həm də antiterror tədbirlərində sivillərə heç bir zərər toxundurmadan vurduğu hərbi zərbələr niyə anlayışla qarşılanmırdı? İsrailin indi dəqiq icra etdiyi hərbi əməliyyatlarda sivillərin qorunması prinsipinə dünyanın anlayışlı yanaşmasını bizim Vətən müharibəsində və antiterror tədbirlərində görmədik.
Niyə dünya bir halda dövlətin özünü terrordan, ekstremizmdən müdafiə haqqını tanıyır, başqa halda tanımaq istəmir? Azərbaycana münasibətdə "ermənipərəst fransızlaşma" xəstəliyinin getdikcə yayılmasının səbəbi nədir?!..
Görün son 4-5 gündə Azərbaycana qarşı nə qədər addımlar atılıb. Dünya müharibəsinin fitilləri və ocaqları Yaxın və Orta Şərqdə qalandığı halda, hədəfin mərkəzinə Azərbaycan çıxarılır. Niyə?!
Azərbaycanın öz suverenliyini tam bərpa etdiyi 20 sentyabrdan bu yana 15-20 günün ərzində bölgəmizdə son 30 ildə heç kimin görmədiyi nisbi sakitliyə və təhlükəsizliyə diqqət edirsinizmi? Azərbaycanın ərazi bütövlüyü və suverenliyi bütün bölgəmizin sabitliyinin və təhlükəsizliyinin vacib şərtinə çevrilməkdədir. Nə zamanlar ki, ölkəmizin suverenliyi pozulmuş durumda idi, bölgəmizdə sabitlik yox idi. Azərbaycanın suverenliyi bərpa olunan kimi, bölgəmizə sülh gəlməyə başlayıb. Ermənistanın sazişə vadar ediləcəyi halda, bütün bölgəmizin hüzr və barışa qərq olacağını təsəvvür edə bilirsinizmi? Təbii, Fransa kimi ölkələr imkan versələr...
Qayıdaq son 4-5 günün sanki bir mərkəzdən idarə olunan anti-Azərbaycan gedişlərinə...
Avroparlament 491 "deputat" səsi ilə Qarabağdan məhz Fransanın gizli təşkilatçılığı sayəsində ermənilərin kütləvi köçüb getməsini "etnik təmizləmə" adı altında dəyərləndirən qətnamə qəbul etdi. Ardınca BMT-nin İnsan Haqları Şurasında Fransanın təşkilatçılığı ilə 30-dan çox ölkə "Qarabağda humanitar böhran" adı ilə qərar qəbul etdi. Bu gün, oktyabrın 12-də isə həm Beynəlxalq Ədalət Məhkəməsi Ermənistanın müraciəti əsasında Azərbaycan əleyhinə qərəzli müzakirə açdı, həm də yaxşı tanıdığımız "məşhur AŞPA" Qarabağ erməniləri məsələsində Azərbaycana qarşı qərəzli müzakirələr açdı. Onu da əlavə edək ki, Fransa bütün gücünü qoyaraq ermənilərin Qarabağa "məcburi qayıdışını təmin edən BMT qətnaməsinin qəbulu üçün TŞ-yə müraciət etmək planını rəsmi qaydada açıq bəyan etdi.
Bütün bu faktların hamısına məcmu halda baxmağa çalışın.
Dünya sanki Azərbaycanın üstünə yeriyir, qərəzlə, iki standartlı qaydada, əsassız yeriyir. O şeylərə görə yeriyir ki, oxşar məqsədlərin naminə İsrailin bu gün həyata keçirdiyi tədbirlərə çox anlayışla yanaşır.
Dünya ikili standart siyasətdən qurtulmayınca, heç yerdə sülh və ədalət olmayacaq...
Tahir TAĞIYEV
