Biz Azərbaycan ilə Ermənistan arasında münasibətlərin normallaşmasına hazırıq. Biz sülh sazişi üzərində işi davam etdirməyə hazırıq. Bu fikri Azərbaycan Prezidenti İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri şurasının 53-cü iclasının iştirakçıları ilə görüşdə deyib.
Prezident bildirib: “Erməni tərəfinin Rusiya Federasiyasının vasitəçiliyindən imtina edəcəyi təqdirdə, düşünürəm ki, Azərbaycan ilə Ermənistanın xarici işlər nazirləri arasında birbaşa danışıqlar alternativ ola bilər. Hər hansı digər platformalar öz xidmətlərini təklif edən həmin ölkələrin Azərbaycana deyil, həqiqətə, haqlı mövqeyə və beynəlxalq hüquqa münasibəti nəzərə alınmaqla tərəfimizdən təhlil ediləcək”.
Hər halda, Prezident bu fikri konkret informasiya əsasında səsləndirir. Ermənistan Rusiyanın vasitəçiliyindən imtina etsə nə olar?
Siyasi şərhçi Samir Hümbətov “Bakı-Xəbər”ə bildirdi ki, cənab Prezidentin son çıxışında bu məsələyə toxunması təsadüfi deyil: “ Son dövrdə Ermənistanın ilk olaraq Rusiyadan uzaqlaşdığını görürük. İkincisi, Rusiyanın iştirak etdiyi, formalaşdırdığı platformadan da uzaqlaşdığına şahidlik edirik. Həmçinin, Azərbaycan-Ermənistan münasibətləri kontekstində Rusiyanın vasitəçiliyindən də uzaqlaşır. Görünür ki, Ermənistan yeni bir xətt qurmağa çalışır. Təbii ki, bu da Ermənistanın Qərblə yaxınlaşması fonunda baş verən bir haldır. Paşinyan hesab edir ki, bundan sonrakı mərhələdə Rusiyanın vasitəçiliyindən daha çox Qərbin, daha dəqiq desək, Fransanın vasitəçiliyi daha məqbuldur. Bunun bölgəyə faydaları və ziyanları nə olacaq? Təbii ki, zaman göstərəcək hər birini. Görünən ondan ibarətdir ki, Paşinyan Rusiyanın bölgədəki mövqeyini sıfırlamaq məqsədi ilə bu addımları atır, Rusiyanın təsirini azaltmağa çalışır. Rusiyanın əvəzində bölgəyə Avropanın, Qərbin gəlişinə hazırlaşır. Fransa xarici işlər nazrinin son açıqlamasında Ermənistanla hərbi əməkdaşlığı dərnləşdirmə, hətta orda hərbi baza formalaşdırma istəyi gördüm. Bunlar təsadüfi hal sayıla bilməz. Mən hesab edirəm ki, cənab Prezidentin söylədiyi fikirlərdə həqiqət başdan-ayağa tam öz əksini tapıb. Ermənistanın Rusiyanın vasitəçiliyindən imtina etməsi bir baxlmdan bizim xeyrimizə ola bilər. Amma burada başqa problemlər də çıxa bilər. Çünki münasibətlərdə yalnız bir dövlət - Rusiya dominant olmayacaq, amma başqa səmtlərə tam yönələcəyiksə, bu. danışıqlar prosesinin daha da uzanmasına gətirib çıxaracaq. Əslində, burda nə qədər vasitəçi çox olarsa, bir o qədər dominantlıq azala bilər. Ancaq bu vəziyyətdə deyə bilmərik ki, Avropanın tutduğu mövqe də safdır. Ümumi götürəndə sərf edir. Ancaq Ermənistan özü də qeyri - konsultiv mövqe tutan dövlətdir. Avropanın qoyduğu tələblərə də tam əməl etmir. Ən böyük probləmlərdən biri də elə budur. O baxımdan hesab edirəm ki, Ermənistanın Rusiyanın vasitəçiliyi ilə görüşlərdən, platformadan çəkilməsi açıq özünü göstərməkdədir. Ötən ilin noyabr ayında İrəvanda keçirilən KTMT - nin iclasında sənədə imza atmaqdan çəkinməsi, imza atmaması onu göstərir ki, Ermənistan Rusiyadan uzaqlaşmağa çalışır. Bunun bölgəyə, Ermənistan - Rusiya münasibətlərinə təsiri nə olacaq bəlli deyil. Ancaq Paşinyan çox böyük risqlər altına girir. Bir sözlə, hər şeyi zaman göstərəcək”.
Məhəmmədəli QƏRİBLİ
