Müstəmləkəçi Fransanın ermənipərəstliyi artıq ifrat şəkil alıb. Belə olmasaydı, öz daxili problemlərini yaddan çıxarıb bir ovuc erməninin arxasınca düşməzdi. Elə bir beynəlxalq təşkilat tapılmaz ki, Fransa onun işinə müdaxilə etməsin. Mübağiləsiz deyə bilərik ki, bəzi beynəlxalq təşkilatlar Fransanın boyunduruğu altındadır, belə olmasaydı o təşkilatlar özlərini biabır etməzdilər.
Məlumdur ki, Fransanın təşəbbüsü ilə bir qrup dövlət 2023-cü il oktyabrın 11-də BMT-nin İnsan Hüquqları Şurasında Azərbaycan əleyhinə birgə bəyanat verib. Bəyanatda Azərbaycanın Qarabağ bölgəsindən ermənilərin köçməsinin səbəblərinə dair əsassız və böhtan xarakterli iddialar səsləndirilib. Fransanın bu təşəbbüsünün qərəzli və birtərəfli olması, orada Ermənistandan qovulmuş azərbaycanlıların qayıdış hüququna toxunulmamasından bəlli olur. 1 milyona yaxın azərbaycanlı öz doğma torpaqlarından qovulub, hazırda onlardan cəmi bir neçə mini vətənə qayıdıb, yüz minlərlə insan hələ də köçkün həyatı yaşayır, amma sənəddə onlar haqda heç nə deyilmir.
“BMT-nin İnsan Haqları Şurasında aparılan ermənipərəst müzakirənin və qəbul edilən bəyanatın ikili standartın təzahürü olduğu şübhəsizdir”
Fransanın təşəbbüsü ilə bir qrup dövlətin İnsan Hüquqları Şurasında Azərbaycan əleyhinə birgə bəyanat verməsini mənfi hal kimi qiymətləndirən AYB üzvü, Prezident mükafatçısı, yazıçı-publisist, Cəbrayıl rayonundan keçmiş məcburi köçkün Fariz Çobanoğlu “Bakı-Xəbər”ə şərhində bildirdi ki, bu bəyanata qoşulan dövlətlərin hamısı riyakar və qərəzlidir. Fransanın bir dəfə də olsun Ermənistanın işğalı nəticəsində Azərbaycanın öz daxilində qaçqına və məcbiri köçkünə çevirilən insanların taleyi ilə maraqlanmaması onun hansı niyyətdə olduğunu ortaya qoyur. “Çox təəssüflər olsun ki, son 30 ildə Fransa ermənipərəst mövqeyini daha qabarıq şəkildə büruzə verir. Bu dövlətin riyakarlığı, demokratiyadan uzaq, insan haqlarına zidd davranışları artıq iyrənc bir hal alıb. Biz etnik təmizləməyə məruz qaldıq, Ermənistanın təcavüzü nəticəsində öz ölkəmizdə məcburi köçkünə çevrildik, Fransanın tükü də tərpənmədi, bir dəfə də olsun təşəbbüs göstərib Ermənistanı işğalı dayandırmağa çağırmadı. Fransa və ABŞ ATƏT-in Minsk qrupunun həmsədri kimi öz vəzifələrini yerinə yetirmədilər, çünki onları azərbaycanlı qaçqınlar, məcburi köçkünlər maraqlandırmırdı. Elə humanist idilərsə, 1 milyon azərbaycanlı məcburi köçkünün taleyinə niyə biganə qaldılar, nə üçün bir dəfə də olsun bizim və Qərbi azərbaycanlıların problemini qaldırmadılar? 1988-ci ildə 250 mindən çox azərbaycanlı indiki Ermənistandan qovulub və əsl qaçqın onlardır. Fransanın, ona qoşulan dövlətlərin 250 min azərbaycanlı qaçqının və 1 milyon məcburi köçkünün taleyi ilə qətiyyən maraqlanmaması bir sıra suallar doğurur. Bu gün Fransa antiazərbaycan təbliğatında tək deyil, Almaniya, İspaniya kimi dövlətləri də özünə şərik edib, ABŞ da onun yolu ilə gedir. BMT-nin İnsan Haqları Şurasında aparılan ermənipərət müzakirənin və qəbul edilən bəyanatın ikili standartın təzahürü olduğu şübhəsizdir. Bu onların ayrıseçkilik münasibətlərinin göstəricisidir”-deyə F.Çobanoğlu qeyd etdi.
O bildirdi ki, erməniləri Qarabağdan Azərbaycan mərkəzi hakimiyyəti çıxarmayıb, ermənilər özləri könüllü şəkildə Ermənistana köçüblər, 30 il əvvəl gəldikləri ölkəyə qayıdıblar. Ermənistanın azərbaycanlılara qarşı etnik təmizləmə apardığını deyən F.Çobanoğlunun sözlərinə görə, Azərbaycan ermənilərlə humanist davranıb, amma bunu Fransa görmək istəmir. Fransanın bu təşəbbüsünün qərəzli və ermənipərəst olduğunu deyən F. Çobanoğlu qeyd etdi ki, Fransa hər zaman azərbaycanlılara ayrıseçkiliklə yanaşıb. “Ermənilərin Azərbaycan cəmiyyətinə reinteqrasiyasına mane olan amillərdən biri məhz Fransadır, Makron hökumətidir. Zorla beynəlxalq təşkilatlara qəbul etdirmək istəyir ki, könüllü olaraq Qarabağdan Ermənistana köçən erməni əhalisinə “qaçqın statusu” versinlər. Bu yolverilməzdir. Bu günlərdə bir hüquqşünasın rəyini oxudum, o da qeyd edirdi ki, bu hüquqi baxımdan doğru deyil, beynəlxalq hüquqa ziddir. Qarabağdan 100 min erməninin getdiyi iddia edilir, bu rəqəmin özü şübhəlidir, orada o sayda mülki əhali ola bilməzdi. Könüllü şəkildə Qarabağdan köç edən ermənilərə Makron hökumətinin təşəbbüsü ilə “qaçqın statusu” verilərsə, bu, beynəlxalq hüququn çeynənməsi anlamına gələr. Fransanın bu qanunazidd, humanizmə zidd istəkləri beynəlxalq ictimaiyyət tərəfindən rədd edilməlidir”-deyə müsahibimiz qeyd etdi.
İradə SARIYEVA
