Belə görünür ki, Fransa təlim çətiri adı altında yavaş-yavaş Ermənistanda hərbi varlığınının əsasını gücləndirir. Fransanın bir qrup hərbi kontingenti İrəvana gəlib. Kontingentə 56 əsgər, 2 xilasedici it, 1 mobil idarəetmə stansiyası, 8 ton avadanlıq daxildir. İki təyyarə ilə gələn hərbi qrupu Fransanın Ermənistandakı səfiri Olivye Dekotinyi qarşılayıb.
Rəsmi məlumatda qeyd olunur ki, Fransa hərbçiləri Ermənistan və Avropa İttifaqının xilasediciləri ilə birlikdə “HOPE 2023” təlimində iştirak edəcəklər. Kipr və Monteneqronun axtarış-xilasetmə qrupları da Ermənstandadır.
Fransa hərbi heyəti “mülki təhlükəsizlik” təlimlərində iştirak etmək üçün Ermənistana gəlsə də, bu, rəsmi Parisin İrəvanla hərbi əməkdaşlığı fonunda diqqət çəkir. Son günlər Fransa Ermənistanın təhlükəsizliyində rolunu artırmaq istiqamətində addımlar atır. Antirus siyasi xətti tutan İrəvan da KTMT-dən çıxmaq və rusları fransızlarla əvəzləmək niyyətindədir.
Maraqlıdır, bu təlimin arxasında, həm də belə mürəkkəb təlimin arxasında nə dayanır?
“Ona görə də Ermənistanın Fransa ilə birlikdə təlim keçəcəyi müəyyən qədər gözlənilən idi”
Sözügedən məsələni “Bakı-Xəbər”ə şərh edən Böyük Azərbaycan Partiyasının sədri Elşad Musayev bununla bağlı bir sıra məqamlara toxundu: “Əvvəla, son zamanlar Fransanın Cənubi Qafqaza yönəlik destruktiv siyasəti açıq-aşkar hiss olunur. Faktiki olaraq, Fransanın hakimiyyət rəsmiləri çox qərəzli mövqedən çıxış edirlər. Əsasən də regionda Ermənistana dayaq durmaq, Azərbaycanın haqlı mövqeyini sarsıtmaq üçün qərəzli mövqe sərgiləyən ölkə Fransadır. Eyni zamanda Paris regionda təmsil olunmaq niyyətini açıq-aşkar göstərir. Buna da, təbii, razılıq verən Ermənistandır. Ermənistan müxtəlif vasitələrlə ayrı-ayrı ölkələrdən özünə dəstək qazanmaq və çirkin niyyətini həyata keçirmək istəyir. Bunun üçün Fransa və digər ölkələrdən yardım almaq niyyətindədir. Faktiki olaraq, Cənubi Qafqazda gərginlik mərkəzi yaradılmasına xidmət edən bir siyasət yeridir. Bundan əvvəl Ermənistan Avroittifaqın Monitorinq Missiyası adı altında Fransadan, Almaniyadan kəşfiyyatçıları, hərbçiləri dəvət etmişdi. Onların fəaliyyəti nəyəsə yaramadı. Ondan sonra hərbi təlimlər gündəmə gəldi. İlk olaraq ABŞ-la birgə hərbi təlimlər keçirildi. İndi də mülki ad altında Fransa hərbçilərini Ermənistana dəvət ediblər. Açıq-aşkar görünür ki, bunlar Rusiyanı da satmağa qərar veriblər. Regionda belə gərgin vəziyyət olduğu halda nə Ermənistan, nə də Fransa öz bəd niyyətindən əl çəkmir. Ona görə də Ermənistanın Fransa ilə birlikdə təlim keçəcəyi müəyyən qədər gözlənilən idi. Çünki İrəvan istəyir ki, bu bölgədə ayrı-ayrı ölkələrin maraqlarını cəmləsin. Sonra da öz maraqları naminə bunlardan istifadə etsin. Yəni bir gərginlik yaradıb ölkələrin gündəminə düşə bilsin. Ancaq nəticə etibari ilə Ermənistan yenə yanlış yoldadır. Məsələ ondadır ki, Fransa Ermənistandan bir maşa kimi istifadə edəcək. Fransada yerli seçkilər yaxınlaşır. Paris həm də bu məsələyə görə ritorikanı artırır. Hesab edirəm ki, Ermənistana sözdə dəstək versələr də, əməldə elə bir nəticə olmayacaq. Ona görə də Ermənistan yanlış yoldan çəkinməlidir. Onların çıxış yolu Azərbaycan və Türkiyə ilə dil tapmaqdır. Əgər bunu edəcəklərsə, bir dövlət kimi fəaliyyət göstərəcəklər. Yox, konfrontasiyaya gedəcəklərsə, o zaman bunun onlar üçün heç bir perspektivi olmayacaq”.
Vidadi ORDAHALLI
