Prezident İlham Əliyev İqtisadi Əməkdaşlıq Təşkilatının Nazirlər Şurasının 27-ci iclasının iştirakçılarına müraciət ünvanlayıb.
Müraciətdə deyilir: “30 illik işğalın Azərbaycan xalqı üçün ən ağır fəsadlarından biri də bəşəri əhəmiyyətə malik mədəni irsimizə, o cümlədən İslam dininə aid bütün abidələrə qəsdən vurulmuş ziyandır. Əfsuslar olsun ki, bu dövrdə 67 məsciddən 65-i yerlə-yeksan edilmiş, qalan məscidlərə qarşı isə heyvanların saxlanılması kimi təhqiramiz əməllər törədildi. Bu günlərdə daha bir məscidin – Malıbəyli məscidinin dağıdılması və tövlə kimi istifadə edilməsi faktı aşkar edildi. Bütün bunlar təkcə azərbaycanlıların deyil, bütün dünya müsəlmanlarının hisslərinin təhqir olunması deməkdir”.
İqtisadi Əməkdaşlıq tədbirində də ermənilərin mədəni cinayətləri, müsəlman irsinin dağıdılması dilə gətirilib.
“Tanınmış, nüfuzlu beynəlxalq təşkilatlar Ermənistanı məlum cinayət əməllərinə görə qınamalı və cavab verməyə məcbur etməlidir”
AMEA Fəlsəfə və Sosiologiya İnstitutunun aparıcı elmi işçisi, fəlsəfə üzrə fəlsəfə doktoru, dosent Faiq Ələkbərli “Bakı-Xəbər”ə açıqlamasında qeyd etdi ki, İkinci Qarabağ müharibəsinə qədər ermənilər işğal altında olan ərazilərdə milli, mədəni, dini abidələri dağıdıb: “Torpaqlar işğaldan azad olunduqdan sonra biz erməni vəhşiliyini daha detallı və konkret faktlarla ortaya çıxarda bildik. Məscid və dini abidələrə qarşı erməni barbarlığının mahiyyəti azərbaycanlıların izini silib məhv etməkdir. Onlar bunu edərkən öz şovinist maraqlarına uyğun hərəkət ediblər. Məscidlərə qarşı bu cür amansız davranış qəbuledilməzdir. Yalnız İslamda deyil, iudaizm, xristianlıq və digər səmavi dinlərdə də bu kimi ibadət məkanları Allah evi sayılır”
Həmsöhbətimizin sözlərinə görə, ermənilər tərəfindən törədilmiş cinayətlər qınanmalıdır: “Ümid edirik ki, bu məsələ ilə bağlı istər İqtisadi Əməkdaşlıq Təşkilatına üzv olan dövlətlər, istərsə də digər dövlətlər müəyyən nəticə çıxaracaq. Erməni vəhşiliyi göz önündədir. 70-ə yaxın məsciddən 98 faizi tamamilə məhv edilib. Ermənilər məscidi məhv etməklə kifayətlənməyib. Onlar dini abidələrdə mal-qara saxlayıb. Ermənilər Azərbaycanın dini dəyərlərini təhqir edib. Ermənistan bunların cavabını verməlidir. Tanınmış, nüfuzlu beynəlxalq təşkilatlar Ermənistanı məlum cinayət əməllərinə görə qınamalı və cavab verməyə məcbur etməlidir. Sadəcə qınamaq lazım deyil. Ermənistan hökuməti etdiyi əməllərə görə beynəlxalq məsuliyyətə cəlb olunmalıdır”.
Günel CƏLİLOVA
