Rusiyanın 102-ci hərbi bazasının və sərhədçilərinin Ermənistandakı mövcudluğu ilə bağlı məsələ qaldırılmır. Bu barədə Ermənistanın baş naziri Nikol Paşinyan ölkəsinin İctimai Televiziyasına müsahibəsində bildirib.
Paşinyan bunu belə əsaslandırıb: “Rusiya sərhəd qoşunlarının və 102-ci hərbi bazanın mövcudluğunun səbəbləri tamamilə başadüşüləndir, onlar mövcud olmaqda davam edir. Vladimir Putinlə ilk görüşüm zamanı o mənə dedi ki, Rusiyanın başqa ölkələrin daxili işlərinə qarışdığı barədə tez-tez eşidir. O, bunun doğru olmadığını bildirib. Biz Rusiya ilə bütün gələcək münasibətlərimizi 2018-ci ildə baş tutan ilk görüş əsasında qururuq”.
Ermənistan baş naziri Ermənistan-Rusiya münasibətlərinə toxunaraq qeyd edib ki, ölkə xarici siyasətinin vektorunu dəyişmir: “İndi qlobal mənada çətin dövrdür, problem İrəvanla Moskvanın təmaslarında deyil, qlobal güclərin münasibətlərindədir. Ermənistan heç nəyi dəyişmir. Biz nə olursa-olsun, Ermənistan-Rusiya münasibətlərində heç nəyi ləğv etməmişik, heç yerə getməmişik”.
Göründüyü kimi, Nikol kifayət qədər ziddiyyətli mövqe sərgiləyib. Maraqlıdır, Paşinyan bu ziddiyyətli bəyanatlarla nə demək istəyir?
“Qərb çalışır ki, Ermənistan vasitəsilə Rusiyaya qarşı Cənubi Qafqazda yeni bir cəbhə açsın”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli “Bakı-Xəbər”ə açıqlamasında qeyd etdi ki, Paşinyan belə ziddiyətli danışmaqla güc mərkəzləri arasında oynayır: “Əslində, Paşinyanın əsl niyyəti Ermənistanı Rusiyanın orbitindən çıxarmaqdır. Nikol 102-ci baza ilə bağlı o cür danışsa da, hamı yaxşı bilir ki, o səmimi deyil. O üzdən, Qərb çalışır ki, Ermənistan vasitəsilə Rusiyaya qarşı Cənubi Qafqazda yeni bir cəbhə açsın. Paşinyan da faktiki olaraq bu iki qüvvə arasında oynamaqla Ermənistan üçün üstünlüklər qazanmaq istəyir. Ancaq problem ondadır ki, Paşinyanın dedikləri ilə əməlləri çox vaxt üst-üstə düşmür. Bunu Rusiya da, Qərb də yaxşı başa düşür. Ona görə də çalışırlar ki, Paşinyana təzyiqi gücləndirsinlər. Bu səbəbdən həm Rusiya, həm də Qərb Paşinyana təzyiqi gücləndirir. O da ziddiyətlərdən istifadə edərək bir növ Qərblə Rusiya arasında oynamağa və bundan öz mənafeyi üçün istifadə etməyə çalışır. Ancaq hesab edirəm ki, Nikolun seçim etmək vaxtı artıq gəlib çatıb. Əslində o, Qərblə Rusiya arasında yox, Cənubi Qafqazda söz sahibi olan Azərbaycan və Türkiyə ilə münasibətləri normallaşdırmalıdır. Regional layihələrdə iştirak etməyə razılıq verməlidir, Azərbaycanla sülh sazişi imzalamalıdır. Zəngəzur dəhlizinin açılmasına razılıq verməlidir. Yalnız o halda Ermənistan düşdüyü vəziyyətdən çıxa bilər. Əks halda qlobal güclərin Ermənistanda toqquşması bu ölkəyə baha başa gələ bilər. Nəzərə almaq lazımdır ki, Paşinyanın zəif siyasətçi olması buna şərait yaradır. Ona görə də Ermənistan düzgün seçim etməlidir”.
Vidadi ORDAHALLI
