Rusiya sülhməramlıları Qarabağı tərk etsə, onlar Rusiyaya qayıtmalıdır. Bu sözləri Ermənistan Baş naziri Nikol Paşinyan sülhməramlıların Ermənistanda yerləşdirilməsi ilə bağlı səslənən fikirlərə münasibətində deyib.
Xatırladaq ki, bundan əvvəl Rusiya XİN sözçüsü Mariya Zaxarova Qarabağdakı Rusiya sülhməramlılarının fəaliyyətinin yeni şərtlərə uyğunlaşdırılacağını bildirib.
Çox güman ki, Paşinyan həmin kontingentin Ermınistana yerləşdirilməsindən ehtiyat edir. Rusiyanın belə planı ola bilərmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, bu açıqlamalar gərgin olan Rusiya-Ermənistan münasibətləri fonunda verilir: “Son durumlar onu göstərir ki, Paşinyanın Rusiya ilə müasibətlərində yeni yanaşması var və xeyli müddətdir bunu deyir. Onlar təhlükəsizliklərini Rusiyaya etibar etmirlər. 99, 9 faiz deyirlər ki, biz Rusiyaya güvənməkdə yanlış etmişik. Qarabağda olan uğursuzluqların, 44 günlük Vətən müharibəsində olan məğlubiyyətin və bir günlük antiterror tədbirlərinin məsuliyyətini Ermənistan cəmiyyətində Rusiyanın üzərinə atırlar. Bir sözlə, Rusiyaya qarşı çox kəskin bir münasibət var. Rusiya da ən yüksək səviyyədə, hətta prezident səviyyəsində bütün günahların ermənilərdə olduğunu bəyan edir və Ermənistan cəmiyyətində də bu səbəblərdən özlərinə qarşı xeyli mənfi rəy yaradıblar. Rusiya ilə əks cəbhədə olan ABŞ-la sentyabr ayının 11 - dən 20 - nə kimi davam edən böyük hərbi təlimlər keçirildi. Bunun Rusiyaya və Kollektiv Müqaviləsi Təskilatına qarşı olduğu məlumdur. Zaman - zaman Rusiyada səslənən fikirlər daha da artmağa başlayır. Hətta Ermənistanın Kollektiv Müqaviləsi Təşkilatı və Avrasiya İqtisadi Blokundan çıxacağını gözləyənlər, şərh edənlər var. Ermənistanın, onun arxasında duran Qərbin hədəfi Rusiya silahlı qüvvələrini Ermənistandan çıxarmaqdır. Zəngəzur dəhlizi də gələcəkdə açılacaqsa, Ermənistan istəmir ki, onu Rusiya qorusun. Rusiya isə həmin dəhlizin açılmağında ona görə maraqlıdır ki, Rusiyanın sərhəd qoşunları onun təhlükəsizliyini təmin etsin. Bilirsiz ki, Ermənistanın sərhədlərini Rusiya silahlı qüvvəlləri və sərhəd qoşunları qoruyur. Ona görə də, Ermənistanda olan hərbi bazanın yaxında ordan çıxarılması üçün müəyyən fikirlər səslənir. O ki qaldı Qarabağda sülhməramlıların olmasına, artıq buna heç bir ehtiyac yoxdur. Üçtərəfli 9 noyabr bəyanatı da qüvvədən düşüb. Həmin bəyanatın şərtlərini Azərbaycan dövləti özü yerinə yetirib. Ona görə də, Rusiya sülhməramlıları Azərbaycan ərazisindədir. Qarabağı bütün dünya və Ermənistan Azərbaycan ərazisi kimi tanıyıb. Qarabağ məsələsi yekunlaşıb. Artıq Ermənistanla Azərbaycan arasında sülh danışıqları gedir. Bu danışıqlarda da Qarabağ məsələsi yoxdur. Ona görə də, hər kəs fikir bildirir ki, Qarabağda rus sülhməramlılarının qalmasının heç bir mənası yoxdur. Rusiyanın öz işidir, onları Ermənistanda və ya başqa yerdə yerləşdirə bilər. Ancaq son vəziyyət onu göstərir ki, Ermənistanla Rusiya artıq müttəfiq deyil”.
Məhəmmədəli QƏRİBLİ
