“Azərbaycan daim sülhün tərəfdarı və bölgədə sülh təşəbbüslərinin müəllifi olub. Regional məsələlərin bilavasitə region ölkələrinin iştirakı ilə həll edilməsi prinsipindən çıxış edərək Azərbaycan 3+3 əməkdaşlıq formatını irəli sürüb. Hazırda Ermənistan-Azərbaycan münasibətlərinin normallaşdırılması, sülh müqaviləsinin imzalanması və Cənubi Qafqaz bölgəsinin sülh və əməkdaşlıq məkanına çevrilməsi üçün tarixi şərait yaranmışdır”.
Bunu Prezident İlham Əliyev İqtisadi Əməkdaşlıq Təşkilatının Nazirlər Şurasının 27-ci iclasının iştirakçılarına ünvanladığı müraciətdə bildirib.
3+3 və ya regiona aid olmayan ölkələrin Cənubi Qafqazda nə işi var?
“Cənubi Qafqaz öz daxili problemini özü həll etmək iqtidarındadır və bura qeyri-region ölkələrinin müdaxilə cəhdləri yersizdir”
SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə şərhndə “Ümumiyyətlə, daim sülh və əminamanlıq tərəfdarı olan ölkəmiz bu gün də yeni reallıqlar fonunda bölgədə sülh, təhlükəsizlik, sabitlik, inteqrasiya və əməkdaşlıq mühitini gücləndirmək üçün strateji təşəbbüslərlə çıxış edir. Eyni zamanda Azərbaycan regionda çoxtərəfli əməkdaşlıq platformasının yaradılmasının tərəfdarı olaraq bu məsələdə prinsipial geosiyasi iradə nümayiş etdirir. Hesab edirəm ki, 44 günlük Vətən müharibəsində Azərbaycanın qazandığı qələbədən sonra Cənubi Qafqaz regionunda yaranan yeni reallıqlar bölgədə davamlı sülh və sabitliyin bərqərar olması üçün geniş imkanlar açır. Bu baxımdan, Azərbaycan Respublikasının Prezidenti cənab İlham Əliyev və Türkiyə Cümhuriyyətinin Prezidenti Rəcəb Tayyib Ərdoğan tərəfindən irəli sürülən “3+3” formatında regional əməkdaşlıq platforması böyük əhəmiyyət kəsb edir”-deyə bildirdi.
Baş redaktorun sözlərinə görə, burada əsas nəzərdə tutulan məsələlərdən biri 3+3 formatının Cənubi Qafqaz regionunun iştirakı ilə ərsəyə gələn bir platforma olmasıdır: “Bu isə o deməkdir ki biz öz problemimizi, Cənubi Qafqazın məsələlərini Qafqazda özümüz həll edirik. Təbii ki, bu da Qərbin həmin məsələlərinin həllindən kənarda qalması deməkdir. Heç şübhəsiz, 3+3 formatının baş tutmaması üçün çalışanlar, ona qarşı çıxanlar da var. Cənubi Qafqaz öz daxili problemini özü həll etmək iqtidarındadır və bura qeyri-region ölkələrinin müdaxilə cəhdləri yersizdir. Sözügedən platforma Azərbaycan, Türkiyə, Gürcüstan, Rusiya, İran və Ermənistan arasında iqtisadi, kommunikasiya əlaqələrinin qurulmasını nəzərdə tutur ki, bu da bütövlükdə regionun mənzərəsini əhəmiyyətli dərəcədə dəyişəcək. Burada təkcə diplomatik, mədəni, siyasi əməkdaşlıqdan deyil, eyni zamanda iqtisadi əməkdaşlıqdan söhbət gedir.
Bəllidir ki, Azərbaycan dövləti Gürcüstan, Rusiya, Türkiyə və İranla hər hansı formada əməkdaşlığını davam etdirir. Azərbaycan tərəfindən irəli sürülən bu təşəbbüs, hesab edirəm ki, təqdirəlayiqdir. Təbii ki, bu kimi təşəbbüslərlə Avropa İttifaqı, Amerika, Rusiya və digər dövlətlər də dəfələrlə çıxış ediblər. Amma biz ən ideal variant kimi 3+3 formatını qeyd edə bilərik. Bu format dünyaya, Avropa ölkələrinə də öz töhfəsini verəcəkdir. Əgər bu formatda danışıqlar gündəmə gələrsə, müxtəlif müqavilələr imzalanarsa, təbii ki, bütün dünya ölkələri bundan özlərinə dividend qazana bilərlər”-deyə B.Quliyev qeyd etdi.
İradə SARIYEVA
