27 yanvar 2023-cü il tarixində Azərbaycanın Tehrandakı səfirliyinə hücum edən şəxsin məhkəməsi hələlik təşkil olunmayıb. Xəbər verildiyi kimi, bunu İranın Məhkəmə Sisteminin sözçüsü Məsud Setayeşi Tehranda keçirilən mətbuat brifinqində deyib.
M.Setayeşinin sözlərinə görə, təbii ki, məhkəmə keçirilmədiyinə görə hələlik hər hansı hökm verilməyib. O əlavə edib ki, bu cinayət işində araşdırma mərhələsi davam edir.
Qeyd edək ki, bu il yanvarın 27-də Azərbaycanın İrandakı səfirliyinə silahlı hücum olub. Hadisə nəticəsində səfirliyin 1 əməkdaşı şəhid olub, iki əməkdaşı yaralanıb.
Maraqlıdır, istintaq prosesi niyə bu qədər gecikir? Ola bilərmi ki, İran tərəfi qəsdən istintaqı gecikdirsin?
“Çünki cinayətkara meydan verdilər və cinayəti önləmək üçün hansısa tədbir görülmədi”
Sözügedən məsələyə aydınlıq gətirən hüquqşünas Şəmsəddin Əliyev “Bakı-Xəbər”ə açıqlamasında qeyd etdi ki, İran tərəfi istintaq prosesinin obyektiv aparılmasında və yekunlaşmasında maraqlı deyil: “Çox təəssüf ki, İran tərəfi nə qonşuluq münasibətlərini, nə də beynəlxalq hüquqdan irəli gələn öhdlikləri nəzərə alır. Azərbaycan və İran cinayət məcəllələrində oxşarlıq var. Məlum terror aktı həm Azərbaycanın, həm də İranın xarici siyasətinə yönələn bir qəsddir. Terror aktı İranda diplomatların təhlükəsizliyinin qorunmasına olan inama güclü zərbə vurdu. Bu səbəbdən İran istintaq prosesinin sürətlənməsində, terror aktını sifariş verənlərin ortaya çıxmasında maraqlı olmalıdı. Əfsuslar olsun ki, bu baş vermədi. İran tərəfi Azərbaycanın hüquq-mühafizə orqanları ilə əməkdaşlıqda maraqlı görünmür. Məlum terror ağır cinayətin təzahürüdür. Proseslərin gedişi göstərir ki, İranın müvafiq orqanları bu cinayətin baş verməsində maraqlı olublar. Çünki cinayətkara meydan verdilər və cinayəti önləmək üçün hansısa tədbir görülmədi. Hətta səfirliyin mühafizəsinə cavabdeh polis öz vəzifə öhdəliklərini yerinə yetirmədi. Terroru önləmək üçün bir addım belə atmadı. Əksinə, cani qapıya yaxınlaşarkən polisə dur dedi. Bütün bunlar o qənaətə gəlməyə əsas verir ki, İranın xüsusi xidmət orqanları bunda maraqlı olublar. Məhz o səbəbdən bugünə qədər sözügedən cinayətin bir sıra detalları hələ də qaranlıqdır. Terrorçuya qarşı normal bir ittihamın elan olunmasından yayınırlar. Halbuki, ən azından ona ömürlük həbs cəzası verilməlidir. Ancaq İran həm beynəlxalq hüququn hamılıqla tanınan prinsiplərinə, həm də beynəlxalq cinayət hüququnun tələblərinə zidd davranır. Səfirliyin ərazisi Azərbaycan Respublikası ərazisi hesab olunduğundan, bizim hüquq-mühafizə orqanları araşdırma prosesində yaxından iştirak etməlidir. Lakin İran buna şərait yaratmır. İran öz maraqlarına uyğun olaraq terrorçunu ittiham edir. İstisna etmirəm ki, bir müddət sonra o canini əfv də etsinlər. Əgər obyektiv araşdırma aparılsa, cinayətin iştirak dairəsi geniş olacaq. Çünki iki və daha çox şəxsin qəsdən cinayət törətməkdə birgə iştirak payı var. Məhz bu səbəbdən İran tərəfi bir sıra məqamları ört-basdır etməyə çalışır”.
Vidadi ORDAHALLI
