Qarabağda yaşayan ermənilərin böyük hissəsinin könüllü olaraq Ermənistana köçməsi bu ölkənin rəsmi və qeyri-rəsmi təşkilatlarının əlinə fürsət verib ki, BMT-yə, eləcə də başqa beynəlxalq təsisatlara üz tutub onları aldatsınlar, yalan informasiyalar versinlər.
Ermənistan Respublikasının Ombudsmanı Anahit Manasyan da təxribatçı fəaliyyətə qoşulub. Belə ki, A.Manasyan Qarabağdan gedən erməniləri danışdırıb və saxta fikirlər əsasında ingilis dilində “hesabat” hazırlayaraq BMT-yə göndərib. Guya “məcburi köçkünlərin” qeydiyyatı aparılıb, onların şəxsi söhbətləri “təhlil” edilərək ingilis dilində “qeyri-adi ilkin hesabat dərc edilib”. Ombudsman heç bir fakta söykənmədən və gerçəkliyi çeynəyərək qeyri-real məsələlərdən bəhs edib. O özündən elə şeylər uydurub ki, adam məəttəl qalır. Guya Qarabağdan köçənlərlə danışıb, guya faktlar yığıb, guya erməniləri azərbaycanlılar “döyüblər”, “maşınları atəşə tutulub”, guya “uşaqlar təhqir olunub”, “tibbi yardım maşınlarına atəş açılıb” və sair. Belə absurd hesabat hazırlayan ombudsman bütün dünyanın gözü qarşısında baş verən olaya saxta don geydirərək iddia edib ki, guya “məcburi köçkün düşmüş” şəxslərin, uşaq və qadınların “hüquqlarının pozulması” faktları “sənədləşdirilib”, mülki əhaliyə və infrastruktura “dəyən ziyan” da hesablanıb təqdim olunub. Guya “etnik təmizləmə” “halı baş verib” (?). Bir sözlə, “hesabat”da əks olunan iddiaların hamısı yalandan başqa bir şey deyil. Bu “hesabat”ın insan hüquqlarının müdafiəsinə cavabdeh beynəlxalq təşkilatlara, habelə səlahiyyətli dövlət orqanlarına təqdim edildiyi qeyd edilir.
“Bunlar hamısı absurd iddialardır və başdan-başa yalandır”
Müasir İnkişaf Birliyinin sədri, siyasi şərhçi Mübariz Göyüşlünün “Bakı-Xəbər”ə şərhində bildirdiyinə görə, Ermənistan belə rəy yaratmaq istəyir ki, guya Qarabağdan gedən erməniləri Azərbaycan dövləti zorla qovub çıxarıb, əslində isə əksinədir, Azərbaycan dövləti onlara vətəndaşlıq, yüksək yaşayış təminatı təklif edib, amma onlar havadarlarının təkidi ilə çıxıb gediblər. “Ermənistanın, erməni toplumunun, onların havadarlarının məqsədi söndürülmüş münaqişə ocağını yenidən alovlandırmaqdır. Azərbaycan ərazisindəki bu münaqişə ocağını söndürdü, problemi həll etdi. Bizim bu problemi həll etməyimiz bizimlə bərabər ermənilərin də, bütövlükdə regionun da xeyrinə olan bir məsələdir. Çünki münaqişə heç kimə fayda verən bir proses deyil. Bu mənada biz əslində erməniləri xilas etmişik, amma onlar bunu başa düşmür. Erməni toplumu vəziyyəti yenidən qızışdırmaqda maraqlı görünür. Onların bütün davranışlarında bu hiss olunur. Paşinyan əlinə tribuna keçən kimi Qarabağdan könüllü gedən ermənilərin “hüquqları” məsələsini vurğulayır, mövcud olmayan “Dağlıq Qarabağ” ifadəsindən istifadə edir. İndi də ombudsman yalan və təxribatçı hesabatla beynəlxalq qurumları erməni toruna salmağa çalışır. Könüllü olaraq çıxıb gedən ermənilərlə bağlı qəbuledilməz “məlumatlar” və “faktlar” hazırlayıb. Guya Azərbaycan ermənilərə qarşı “zorakılıq” edib, “təzyiq” göstərib, onları “zorla” çıxarıb, guya uşaqların, qadınların “hüquqları” pozulub. Bunlar hamısı absurd iddialardır və başdan-başa yalandır. Ermənistanın ombudsmanı BMT-yə saxta hesabat göndərərkən heç olmasa bir neçə gün əvvəl bu təşkilatın yaydığı obyektiv hesabata nəzər yetirərdi. BMT-nin bu hesabatı erməniləri elə qəzəbləndirdi ki, onlar bu qurumu qeyri-obyektivllikdə suçladılar. Halbuki, BMT-nin hesabatında gerçəklik əks olunmuşdu. BMT missiyasının açıqlamalarında qeyd edilrdi ki, heç bir mülki obyektə ziyan dəyməyib, zorakılıq olmayıb, etnik təmizləmə baş verməyib, orada 500-100 nəfər civarında erməni qalıb. Qarabağdan köçüb gedən ermənilər özləri də müsahibələrində deyiblər ki, Azərbaycan onları zorla çıxarmır, “yerli rəhbərlik” onlara “çıxın” deyib, onlar da çıxıblar. Faktiki olaraq separatçı “rəhbərlər” erməni əhaliyə Qarabağı tərk etmələri barədə “göstəriş” vermişdi, bunu ermənilər özləri etiraf edir. Təbii ki, separatçıları da bu cür “göstəriş” verməyə Fransa və Ermənistan rəhbərliyi məcbur edib”-deyə qeyd edən M.Göyüşlü qeyd etdi ki, Qarabağda qalan ermənilərdən 100 nəfərə yaxını Azərbaycan vətəndaşlığı almaq üçün müvafiq dövlət orqanlarımıza müraciət edib.
Azərbaycanın bu məsələni beynəlxalq hüquq çərçivəsində həll etdiyini deyən M.Göyüşlü bildirdi ki, heç bir erməni sakin nə təhqir olunub, nə döyülüb, nə də hansısa bir maşına atəş açılıb, əksinə, Azərbaycan dövləti ermənilərə hər cür köməklik edib, polislərimiz, hərbiçilərimiz camaata ərzaq, su, şirniyyat verib. Azərbaycan xalqının heç zaman hansısa aşağılayıcı üsullarla davranmadığını deyən M.Göyüşlü əlavə etdi ki, erməni ombudsmanın yaydığı yalan məlumatlar ermənilərin özlərinə ziyandır və sülhə zidd davranışdır. “Erməni ombudsmanın saxta məlumatlar əsasında hazırladığı “hesabat” BMT-nin Qarabağla bağlı hesabatına həqarətdir”-deyə müsahibimiz vurğuladı.
İradə SARIYEVA
