Prezident İlham Əliyev Tiflisdə bəyan etdi ki, əgər Ermənistan tərəfindən də razılıq olarsa, dərhal bizim aidiyyəti qurumların rəhbərləri Gürcüstanda həm ikitərəfli, həm də üçtərəfli görüşə gələ bilərlər. Azərbaycan - Ermənistan normallaşmasında tam yeni, cəsarətli və indiki nöqtədən daha sürətli hərəkətə başlamaq üçün çox labüd təşəbbüsdür.
Kimlərsə bunu indiyədək mövcud olmuş Moskva, Brüssel və ya müəyyən qədər müstəqil Vaşinqton formatlarına alternativ adlandıra bilər. Ancaq bu, neytrallıq baxımından daha cəlbedici görünür.
Maraqlıdır, Əliyevin Tiflisdə ermənilərlə ikitərəfli ya üçtərəfli danışıqlar təklifinə Moskvadan və Brüsseldən reaksiya varmı? Ümumən onlar bunu səmimi qəbul edə bilərmi?
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycanla Ermənistan arasında iki aktiv vasitəçi var – Rusiya və Avropa İttifaqı: “Brüssel və Moskva Azərbaycanla Ermənistan arasında kommunikasiya xətlərinin açılmasını, sərhədlərin müəyyənləşməsini, sülh sazişini müzakirə edirlər. Prezident İlham Əliyevin Gürcüstan Baş naziri ilə görüşündə Cənubi Qafqazda sülhün bərqərar olması ilə bağlı söylədiyi fikirlərə də diqqət çəkilib. Ermənistanla Azərbaycan arasında imzalanacaq sülh müqaviləsi üzərində fəal çalışmalar aparılır. Əgər buna nail olsaq, o zaman Cənubi Qafqazda tamamilə yeni bir siyasi vəziyyət yaranacaq. Cənubi Qafqaz ölkələri əməkdaşlığa üçtərəfli formatda başlaya bilərlər və bir çox sahələr üzrə əməkdaşlıq çox uğurlu ola bilər. Prezident İlham Əliyev bir çox ölkələrin Azərbaycan–Ermənistan münasibətlərinin tənzimlənməsində iştirak etmək istədiyini, Azərbaycanın bu təşəbbüslərə müsbət yanaşdığını deyib. Prezident Gürcüstanın bu sahədə daha səmərəli vasitəçi ola biləcəyini vurğuladığını deyib. Bildirilib ki, doğrudan da hazırda Cənubi Qafqazda sülh yaradılması proseslərində Rusiya ilə Qərb arasında və eləcə də Avropa ilə ABŞ arasında rəqabət Azərbaycan və Ermənistan arasında münasibətlərin tənzimlənməsindən daha çox, sülh təşəbbüsünün kimin adına yazılacağı uğrunda aparılır. Məhz bu səbəbdən iki ölkə arasında sülh müqaviləsinin bağlanmasına ciddi maneələr yaratmağa cəhdlər edilir. Bölgədə sülhün bərqərar olunmasında ən çox maraqlı olan dövlətlər isə məhz Cənubi Qafqazın üç dövlətidir. Odur ki, bölgənin iki dövləti arasında münasibətlərin tənzimlənməsində aparıcı rolun bölgənin üçüncü dövlətinə, yəni Gürcüstana həvalə olunması qısa bir zamanda sülhün və təhlükəsizliyin təmin olunmasına xidmət edə bilər. Təbiidir ki, buna görə də nə Moskva, nə də Brüsselə bu sərf etmir. Məhz bu səbəbdən də Tiflisin vasitəçiliyi barədə təkliflə bağlı səssiz qalmağa üstünlük verirlər”.
Məhəmmədəli QƏRİBLİ
