Xəbər verildiyi kimi, müdafiə naziri general-polkovnik Zakir Həsənovun rəhbərliyi ilə xidməti müşavirə keçirilib. Müşavirədə nazir müavinləri, qoşun növü komandanları, nazirliyin baş idarə, idarə və xidmət rəisləri, eləcə də videobağlantı vasitəsilə hərbi birlik və birləşmə komandirləri iştirak edib.
Müşavirədə Azərbaycan-Ermənistan şərti sərhədində mövcud əməliyyat şəraiti təhlil edilib. Hava hücumundan müdafiə, kəşfiyyat və əks kəşfiyyat, radioelekron mübarizə və digər bölmələrin gücləndirilməsinə dair konkret tapşırıqlar verilib. Müşavirədə, həmçinin, qoşunların qarşılıqlı fəaliyyətdə keçirilən intensiv təlim və məşqlərinin keyfiyyətinin daha da artırılmasının əhəmiyyəti qeyd edilib. Azərbaycan Ordusunda keçirilən döyüş hazırlığı tədbirlərində yüksək texnologiya və xüsusi hazırlıqlı heyətin imkanlarından səmərəli istifadə edilməsinin əhəmiyyəti vurğulanıb.
Müşavirədə diqqəti çəkən məqam odur ki, hava hücumundan müdafiə, kəşfiyyat və əks-kəşfiyyat, radioelekron mübarizə və digər bölmələrin gücləndirilməsinə dair konkret tapşırıqlar verilib. Maraqlıdır, məhz bu sahələrlə bağlı xüsusi tapşırığın verilməsi nə ilə bağlı ola bilər? Ermənistandan bu yöndə nə gözlənilir?
“Görünür, nazirlikdə Ermənistanın bu kimi vasitələrlə təxribatları artıracağı ilə bağlı kəşfiyyat məlumatları var”
Sözügedən məsələyə aydınlıq gətirən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov “Bakı-Xəbər”ə açıqlamasında qeyd etdi ki, bu tapşırıq bir sıra məsələlərdən irəli gələ bilər: “Məsələ ondadır ki, son vaxtlar Fransanın Ermənistanı silahlandırılması ilə bağlı məlumatlar artır. Məlumatların əsas motivi ondan ibarətdir ki, Fransa Ermənistana müasir radioelektron mübarizə vasitələri, antidron sistemlərin tədarükünü həyata keçirir. Bununla bağlı təlimatçılarını Ermənistana göndərir. Üstəlik, Ermənistanın İrandan pilotsuz uçuş aparatları alması barədə bir ara məlumat yayıldı. Onsuz da Ermənistanın bu kimi vasitələri əldə etməyə çalışması ilə bağlı məlumatlar var. Görünür, Müdafiə Nazirliyində Ermənistanın bu kimi vasitələrlə təxribatları artıracağı ilə bağlı kəşfiyyat məlumatları var. Çünki bir müddət əvvəl belə məlumatlar yayıldı ki, Kəlbəcər istiqamətində Ermənistan kustar üsulla dronlara bomba bağlayaraq mövqelərimizə hücum cəhdləri edir. Biz nəzərə almalıyıq ki, lokal xarakterli antiterror tədbirlərindən əvvəl Qarabağdakı qanunsuz erməni silahlı birləşmələri mülki təyyarələrə radioelektron maneələr yaradırdılar. Dəfələrlə Azərbaycanın hava məkanından istifadə edən bir sıra ölkələrin təyyarələrinə yönəlik bu cür təxribatların törədildiyi barədə məlumatlar yayıldı. Ola bilsin ki, Ermənistan bu və buna bənzər təxribatlara hazırlaşır. Hər halda, müdafiə nazirinin bununla bağlı konkret göstərişlər verməsi sıradan bir tapşırıq deyil. Çünki Enənistandan hansı təxribat desən gözləmək olar. O baxımdan Azərbaycan Ordusu nə qədər ki sülh sazişi imzalanmayıb, istənilən təxribatın qarşısının alınmasına hazır olmalıdır”.
Vidadi ORDAHALLI
