Dünyanın Orta Şərqi ərəb - yəhudi müharibəsinin alovlarından qurtarmaq çabalarına baş vurduğu indiki anlarda hər kəsin bilməli olduğu konkret mətləblər var...
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Müharibə, münaqişə içində olan iki tərəfin arasında birini üstün şəkildə müdafiə etməyin, tərəf saxlamağın, subyektivliyə yol verməyin nə qədər dağıdıcı və səmərəsiz olduğunu kim də olmasa, biz azərbaycanlılar 30 illik Ermənistan təcavüzü dövründə yaşadıq axı... Kimisə müdafiə etməkdənsə , daha asan və səmərəli yol olan həqiqətin əlindən tutmaq nə qədər çətin işdir, dostlar?!
Kimisi "ərəblər bizim dindaşlarımızdır" deyərək Fələstin mücahidlərini dəstəkləyir. Guya haqq burda imiş... Halbuki müsəlman ölkələrinin bir çoxu 30 ildə ya Ermənistanı dəstəklədi, ya bitərəf oldu, ya da çox yumşaq əks mövqe tutdu. Tək qardaşımız Türkiyə, Pakistan və Əfqanıstan istisna oldular...
Kimisi "İsrail 44 günlük müharibədə bizə dəstək oldu" deyərək yəhudiləri birmənalı dəstəkləyir. Halbuki İsrail bizə silahı müftə vermirdi. Qədərincə haqqını alırdı. Azərbaycanın yox, Ermənistanın küllü miqdar pulu olsaydı, bu halda davranışların necə olacağını bir düşünək. Dünyanın bütün dövlətlərinin praqmatik olduğunu, gözlə görünməyən etik-mənəvi prinsiplərə düşkün olmadığını, dədələrimizin sözləri ilə desək, "qarın qardaşdan irəlidir" prinsipi ilə hərəkət etdiklərini heç vaxt unutmaq olmaz. 44 günlük müharibə vaxtı İsraildəki erməni katolikosu Yəhudi dövlətini Azərbaycana silah verdiyi üçün kəskin ittiham etdi və ardınca da ermənilərə xitabən əlavə etdi ki, elə edərdiniz sizin də pulunuz olardı və sizə də silah satanlar tapılardı. Və ya yadınızdan çıxıbmı ki, 2016-cı ildə İsrail parlamentində Xolokost müzakirələrinə Ermənistanın prezidenti Sarkisyan dəvət edilmişdi və yəhudiləri soyqırım etmiş faşist canilərinin quyruqlarına heykəl qoymuş bu dövlətin başçısına xüsusi məruzə də vermişdilər. Halbuki bu müzakirəyə bizim Prezident İlham Əliyev dəvət edilməli və faşizmin məhv edilməsində, yəhudilərin himayə edilməsində xüsusi xidmətləri olmuş Azərbaycanın lider oğlu kimi ən mötəbər məruzə ona verilməli idi...
Bəziləri "Fələstin xalqı başqa, silahlı radikallar başqa" kimi yanlış fikirlər səsləndirir. Xeyr, onlar başqa deyillər, əlində silah döyüşənlər, adına radikal terrorçu deyilənlər elə məhz Fələstin xalqının bir hissəsidir. Bütün xalq əlinə silah götürüb döyüşə bilməz ki... Fələstin xalqının 10 illər boyu haqsızlıqla üzləşməsi sonda onun təəssübkeş oğullarını silah götürüb vuruşmağa, terrorçuluğa vadar edib. Heç bir fələstinli anadan terrorçu doğulmayıb. Terrora və terrorçuya haqq yoxdur, olmamalıdır. Ancaq terroru və terrorçunu doğuran səbəbləri açıq görmək lazımdır.
Görürsünüz, İsrailə və ərəb ölkələrinə birmənalı yanaşmamızı mümkünsüz edən nə qədər əsaslar var...
Odur ki, şərti olaraq 4-cü hesab edilən Yəhudi - Ərəb müharibəsində haqlı və ya ədalətli tərəf yox, haqlı və ədalətli yanaşma prinsipini axtarmaq lazımdır.
Ədalətli mövqe isə budur. Nə qədər ki, BMT-nin 1947-ci il qətnaməsinə uyğun olaraq müstəqil Fələstin dövləti yaradılmayıb, bu ərazidə qan kəsilməyəcək. Nə qədər ki, dünya Fələstin dövlətinin paytaxtı kimi nəzərdə tutulmuş Şərqi Qüdsün zorakılıqla İsrailin paytaxtına çevrilməsinə dözür və ABŞ kimi dövlət də onu dəstəkləyir, Orta Şərqdə qan dayanmayacaq. Nə qədər ki, fələstinlilər İsrailin müstəqil dövlətini rəsmən tanımayıblar, qan durmayacaq. İsrail Suriyanın Colan təpəliyini niyə işğalda saxlamalıdır? Çox da ki, Hafiz Əsəd və sonra isə oğlu Bəşər Suriyada sülalə rejiminə dünya yəhudi lobbisinin dəstəyini qazanmaq xatirinə Colanın İsraildə qalmasına razılaşmış kimi özünü aparır. Sinay yarımadası İsraildən geri alındığı kimi İordan çayının işğal edilmiş Qərb sahilləri də İsraildən niyə geri alınmasın?! İsrailin qanunsuz məskunlaşma siyasəti niyə durdurulmasın?!
1967-ci il sərhədləri çərçivəsində Fələstin dövləti yaranmayınca, qan kəsilməyəcək...
Azərbaycan dövlətinin 1967-ci il sərhədləri çərçivəsində Fələstin dövlətinin yaranmasını dəstəkləməsi düzgün və perspektivli mövqedir...
Tahir TAĞIYEV
