Məlum olduğu kimi, 44 günlük müharibə nəticəsində Ermənistanın işğalı altında olan Azərbaycan ərazilərinin azad olunmasından sonra Fransa regionda birmənalı ermənipərəst siyasəti yürüdür.
Antiterror tədbirləri nəticəsində Azərbaycanın öz suverenliyini bütün ərazilərində bərpa etməsilə regionda 30 ildən çox davam edən münaqişəni bitirməsi Fransanı daha çox qıcıqlandırır. Fransa qədər heç bir ölkə bu dərəcədə narahat deyil.
Bütün bunlarla yanaşı, Ermənistanda səfərdə olan Fransa xariici işlər naziri Ketrin Kolonna bəyan edib ki, Avropa İttifaqının xarici siyasət rəhbəri Cozef Borrelə rəsmi məktub göndərərək müşahidə missiyasını genişləndirməyi, onun mandatını gücləndirməyi xahiş edib: “Məqsəd Ermənistandakı mövcud Aİ missiyasını bu ölkə üçün daha faydalı etməkdir. Həmçinin Ermənistanı Avropa sülh mexanizminə salmağı təklif etdim”.
Fransanın niyyətinə bax ki, həm Aİ missiyasını genişləndirmək, həm də mandatını dəyişmək istəyir. Bütün bunlarda Parisin strateji hədəfi, planı nə ola blər?
“Paris hakimiyyəti öz dövlət maraqlarını deyil, oradakı ermənilərin səsini daha çox toplamaq barədə düşünür”
Sözügedən məsələyə aydınlıq gətirən millət vəkili Ceyhun Məmmədov bununla bağlı bir sıra məqamlara toxundu: “Fransanın əsas məqsədi Ermənistanda möhkəmlənməkdir. Nəzərə almaq lazımdır ki, bu gün Fransanın Azərbaycana qarşı təxribatları davam edir. Paris davamlı olaraq pozucu mövqedən çıxış edir və əfsuslar olsun ki, Fransanın timsalında hansısa komromis meyl müşahidə olunmur. Əslində Fransanın məqsədi və hədəfi regiona müdaxilə etmək və bölgəyə daxil olmaqdır. Yəni regiondakı prosesləri qarışdırmaqdır. Eyni zamanda burada sabitliyi pozmaqdır. Zatən ilk dəfə deyil ki, Fransa belə pozucu mövqe sərgiləyir. Əvvəlki dövrlərdə də belə halların şahidi olmuşuq. Çox təəssüflər olsun ki, bu gün də belə bir prosesin getdiyini, Parisin bu yöndə səy göstərdiyini müşahidə edirik. Digər bir vacib məqam isə ondan ibarətdir ki, bu gün Fransa hakimiyyəti öz dövlət maraqlarını deyil, oradakı ermənilərin səsini daha çox toplamaq barədə düşünür. Makronun prezidentlik müddəti başa çatır. Onsuz da Makronun və onun təmsil olunduğu siyasi partiyanın nüfuzu aşağıdır. Bu minvalla istəyirlər ki, qarşıdakı bələdiyyə sseçkilərində ermənilərin səsini alsınlar. Deməyim odur ki, Makron hakimiyyətinin bu oyunları həm də erməni seçicilərin səsini almağa hesablanıb. Bütün bunlar Fransanın siyasətində açıq-aşkar özünü göstərir. Ancaq hesab etmirəm ki, Fransa Ermənistandakı mövcud Aİ missiyasını genişləndirməklə nəyəsə nail ola bilsin. Çünki Azərbaycan regionun ən güclü dövlətidir. O üzdən, bunların heç biri fayda verməyəcək və yaranan reallıqları dəyişə bilməyəcək. Azərbaycan mümkün olan bütün addımları atır və gələcəkdə də atacaq. Bu məsələlər yalnız Ermənistanın və Fransanın özünə problem yaradacaq”.
Vidadi ORDAHALLI
