Ermənilərin və ermənipərəstlərin aylardır döviyyəyə buraxdığı “Qarabağda 120 min erməni” yalanı artıq ifşa olunub. Belə ki, Rusiyanın müdafiə naziri Sergey Şoyqu Müdafiə Nazirliyinin rəhbər heyəti ilə görüşdə 98 mindən çox mülki erməninin Qarabağdan Ermənistana evakuasiya edildiyini bəyan edib.
“32 minə yaxını uşaq olmaqla 98 mindən çox dinc sakin Ermənistana köçürülüb" - deyə bildirən Şoyqunun sözlərinə görə, itkinin qarşısını almaq məqsədi ilə mülki şəxslərin təxliyəsi və müşahidə postlarında və baza düşərgəsində yerləşdirilməsi qərara alınıb.
Şoyqu deyib ki, 98 min erməni Qarabağdan evakuasiya edilib, Beynəlxalq Qırmızı Xaç Komitəsi orada cəmi bir neçə yüz ermənin qaldığını deyir. BMT-nin missiyası da 500-1000 arası erməni qaldığını açıqlayıb. Bu isə ermənilərin 120 min rəqəmi ilə üst-üstə düşmür. Halbuki, ermənilər Qarabağda 120 min erməni olduğunu iddia edirdilər, indi isə onların 100 mininin Qarabağı tərk etdiyini qeyd edirlər. Ermənilər yenə də 120 min ermənidən danışırlar, 100 min erməni çıxıbsa, onların iddiasından belə çıxır ki, guya Qarabağda 20 min erməni qalıb. Amma orada 20 min ermənin qaldığını heç kəs, heç bir təşkilat təsdiqləmir, bu rəqəmi nə BMT, nə də BQXK təsdiqləyir. Bu da onu göstərir ki, ermənilərin 120 min yalanı sübut olunub.
“Şoyqunun açıqlaması, məlum beynəlxalq qurumların bəyanatları ermənilərin “120 min şousu”nu ifşa etdi”
İSBAM sədri Samir Adıgözəlli “Bakı-Xəbər”ə şərhində bildirdi ki, 120 min rəqəmi ortaya atıldığı gündən Azərbaycan bu rəqəmin həqiqi olmadığını, ermənilərin sayının az olduğunu deyirdi, bu gün bizim dediklərimiz öz təsdiqini tapıb. “Əvvəla onu qeyd edim ki, Ermənistanın özündə heç 1 milyon əhali yoxdur. Bu halda necə olur Qarabağda 120 min erməni olub? Heç bir şəraitin olmadığı, separatizmin hökm sürdüyü bir yerdə 120 min erməninin yaşaması mümkünsüz idi. Ermənilərin iddia etdiyi 120 min rəqəmi kökündən yanlışdır. Araşdırmalar göstərir ki, Xankəndinin özünün heç 10 min əhalisi olmayıb. Separatçıların keçirdikləri qanunsuz seçkilər zamanı özlərinin açıqladığı rəqəmlər var. Bütün təhlillər, əldə olunan informasiyalar, beynəlxalq qurumların ifadə etdiyi rəqəmlər, Şoyqunun göstərdiyi say bir daha təsdiqləyir ki, ermənilərin 120 min iddiası tamamilə əsassızdır. Şoyqunun söylədiyi 98 min rəqəmənin özü də inandırıcı deyil”-deyən S.Adıgözəlli hesab edir ki, Rusiyanın müdafiə nazirinə də Paşinyan hökuməti yanlış siyahı verə bilər. Hazırda erməni lobbisinin beynəlxalq aləmdə saldığı hay-küyün özünün də boşa çıxdığını deyən S.Adıgözəlli qeyd edir ki, onların bu gün də 120 min rəqəmindən yapışması çox məkrli bir plandır. Onların niyyətinin gələcəkdə Azərbaycana qarşı əsassız iddia qalıdırıb şər atmaqdır ki, guya “20 min ermənin taleyi nəməlumdur”. Əslində isə Qarabağda yaşamış ermənilərin sayının şişirdildiyini deyən S.Adıgözəlli qeyd etdi ki, Azərbaycan torpağını tərk edən ermənilər bunu könüllü şəkildə ediblər. “BMT-nin, BQXK-nın rəqəmləri üst-üstə düşür və bu da erməni yalanına çox ağır bir zərbədir. Şoyqunun açıqlaması, məlum beynəlxalq qurumların bəyanatları ermənilərin 120 min şousunu ifşa etdi”-deyən S.Adıgözəllinin fikrincə, artıq onların Azərbaycana qarşı irəli sürdükləri ittihamlara əhəmiyyət verən olmayacaq. O hesab edir ki, nə vaxtsa Qarabağda yaşamış olan, ərazimizdə qalan və könüllü şəkildə gedən ermənilərin sayı barədə Azərbaycanın rəsmi dövlət qurumları açıqlama yayacaq və bu da bütün dünyaya erməni yalanlarını sübut edəcək.
İradə SARIYEVA
