"Ermənistanın Azadlığı üçün Gizli Erməni Ordusu" (ASALA) terror təşkilatı İrəvandakı sinaqoqa qarşı vandalizm aktına görə məsuliyyəti öz üzərinə götürüb. Sinaqoqun üzərinə maye tökülüb və şüşələri sındırılıb. Mətbuata görə, ASALA terror təşkilatının bununla əlaqədar olaraq yaydığı məlumatda hücum "İrəvandakı Ümumdünya yəhudi mərkəzinə qarşı uğurlu qorxutma əməliyyatı" adlandırılıb.
"Yəhudilər Ermənistan dövlətinin və erməni xalqının qəddar düşmənidir. Bu xəbərdarlıqdır: oktyabrın 3-də İrəvandakı uğurlu əməliyyatımız hələ başlanğıcdır. Bu, ciddi öhdəliklərimizin sadəcə bəyanıdır. Hər bir ravvin bizim diqqət mərkəzimizdə olacaq", - terrorçu təşkilatın məlumatında deyilir.
ASALA bildirib ki, İsrail hökuməti Azərbaycanı dəstəkləməyə davam etdiyi təqdirdə Avropa, ABŞ, Kanada və Gürcüstandakı İsrail yəhudilərinə qarşı müharibə aparacaq: “Heç bir İsrail yəhudisi bu ölkələrə gedəndə özünü təhlükəsizlikdə hiss etməyəcək", - deyə məlumatda qeyd olunub.
Mətbuatda vurğulanır ki, bu, erməni cəmiyyətində antisemitizmin daha bir əyani sübutu olmaqla, həmçinin, bu və ya digər etnik kimlik və dini etiqad mənsublarına qarşı tolerantlığın olmadığını göstərir.
“Ermənilər yəhidlərdən heç bir dəstək qazana bilmədiyi üçün...”
ASALA-nın yəhudilərə qarşı müharibə elan etməsinin səbəblərinə şərh verən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə “İrəvanda əvvəlki dövrlərdə də yəhudilərə qarşı bu cür qəbuledilməz hallar baş verib, “Holokost” abidəsi təhqir olunub. Baş verənlər onu göstərir ki, Ermənistan cəmiyyətində antisemitizm baş alıb gedir. İrəvandakı sinaqoqa qarşı ASALA-nın törətdiyi vandalizm aktı təsadüfi deyil, bu onların yəhudilərə bəslədikləri nifrətin əlamətidir. Açıq görsənən odur ki, bu terror təşkilatı yəhudiləri hədəfə alıb”-deyə bildirdi.
O hesab edir ki, ASALA-nın bu vandalizm aktına qarşı bütün dünya yəhudiləri öz mübarizəsini ortaya qoyacaq.
İrəvandakı yəhudi sinaqoquna qarşı vandalizm aktını təsadüfi saymayan ekspert qeyd etdi ki, baş verən vandalizm aktını qiymətləndirərkən Azərbaycanın həyata keçirdiyi lokal antiterror tədbirləri, əldə etdiyi böyük uğurlar, Rusiya-Ermənistan münasibətlərinin kəskin şəkildə soyuması, Qərblə Ermənistanın isti münasibətləri, İranla daha da yaxınlaşması kimi məsələləri nəzərə almaq lazımdır. İsrailin, yəhudi xalqının Azərbaycanın ədalətli mövqeyini dəstəkləməsi faktının erməni terror təşkilatlarını qıcıqlandırdığını deyən F.Ələkbərlinin sözlərinə görə, İsraillə Ermənistanın münasibətlərinin heç də normal olmadığı aydındır. İndiyə qədər İsrailin Ermənistanda səfirlik açmadığını deyən ekspert bildirdi ki, bu vəziyyətdə hər şey ortadadır: “Belə həssas məqamda ASALA-nın İrəvanda yəhudi sinaqoqunu təhqir etməsi və bununla da yəhudilərə qarşı savaş açması bir sıra yeni məsələlərdən xəbər verir. Bu məsələdə İran adlanan ölkənin də müəyyən rol oynadığı istisna olunmur. ASALA ilə molla rejiminin köhnə əlaqələrini nəzərə alsaq bunun mümkünlüyünü ehtimal edə bilərik. Bilirik ki, İran-İsrail münasibətləri çox pisdir. Bu anlamda ehtimal etmək olar ki, Ermənistan-İran münasibətləri çərçivəsində yəhudi sinaqoquna qarşı vandalizm baş verə bilər. Bir məqamı da deyim ki, yəhidi ravvinlərinin Ermənistanla bağlı bəyanatları, Azərbaycanda yaşayan ravvinin Ermənistanda yaşayan yəhudilərə çağırış etməsi də erməni terrorçularını qıcıqlandırıb. Ermənilər yəhidlərdən heç bir dəstək qazana bilmədiyi üçün erməni terror təşkilatı ASALA bu vandalizm aktını törədib”.
Ekspertə görə, sinaqoqa olan hücum onu göstərir ki, Ermənistan İsrail-Azərbaycan münasibətlərindən narazıdır və narahatdır. O hesab edir ki, ASALA terror təşkilatının cinayətləri bundan sonra da genişlənə bilər. Onun sözlərinə görə, Azərbaycan, Türkiyə, İsrail əlaqələri daha da möhkəmlənir, İran, Fransa, Ermənistan, Yunanıstan da bir-birinin yanında olduğunu açıq göstərirlər. Ekspertin fikrincə, Zəngəzur dəhlizi açıldıqdan sonra ASALA-nın və başqa erməni terror təşkilatlarının hücumları, təxribatları daha da genişlənəcək və biz bu provokasiyalara hazır olmalıyıq.
F.Ələkbərli onu da qeyd etdi ki, bu provakasiyalar bizi yolumuzdan döndərə bilməz.
İradə SARIYEVA
