Qarabağdakı separatçılara rəhbərlik etmiş Bako Saakyan, Arkadi Qukasyan və Arayik Arutunyan həbs edilərək Bakıya gətirilib. Rəsmi qurumlar bu cür informasiyanı təkzib etmirsə, deməli, həqiqət payı var. Azərbaycan bu adamlara cinayət işi açanda çoxları buna ironik yanaşırdı ki, mümkün görünmür. Amma oldu.
Bu gedişlə, əli xalqımızın qanına batmış Serj Sarkisyan və Robert Köçəryanın da həbsi real görünürmü?
Bu arada Xankəndidə həbs edilərək Bakıya gətirilən separatçı Arayik Arutunyanın vəkilinin kimliyi məlum olub. Onun hüquqlarını tanınmış vəkil Alov Səfərəliyev müdafiə edəcək. Alov Səfərəliyev faktı təsdiqləyib: “Bu gün Araik Arutyunyanın müdafiəçisi kimi onun dindirilməsində iştirak etdim. Səhhəti və psixoloji durumu yerindədir. Təkcə onu deyə bilərəm ki, onun dedikləri bir çox məsələlərin açılmasına kömək olacaq.
Müdafiəmizi Azərbaycan Respublikasının qanunvericiliyinə, Beynəlxalq konvensiyaların tələblərinə və vəkil etikasına uyğun olaraq quracağıq. Bir sözlə, peşə borcumuzu vicdanla yerinə yetirəcəyik!”
Artıq bu açıqlama Arayik Arutunyanın həbs edilməsini həm də təsdiqləmiş olur.
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, separatçıların üç keçmiş rəhbərinin tutularaq Bakıya gətirilməsi ilə bağlı hələ ki, rəsmi təsdiq yoxdur: “Hətta bu xəbərlərdə hər hansı yanlışlıq olsa belə, bu yaxınlarda hamısı həbs edilərək Bakıya gətiriləcək. Buna qəti şübhə etmirəm. Bu, Azərbaycan xalqının başına gətirilən müsibətləri açıqlamaq, həm də ədalətin bərpası baxımından olduqca zəruridir. Söhbət Serj Sarkisyanla Robert Köçəryana gələndə məsələ bir qədər qəlizləşir. Çünku onlara hələ ki, bizim əlimiz çatmır. Onlar bizimlə hüquqi əlaqələri olmayan ölkənin ərazisindədirlər. İkinci tərəfi bundan ibarətdir ki, həmin adamlar eks-prezidentlər kimi daha çox məxfi məumatlara malikdirlər. Onları daima alət kimi istifadə edən dövlətlər belə adamların ələ keçməsindı maraqlı deyil. Ancaq Ermənistan düşdüyü vəziyyətdə rahatlıq əldə etmək, Azərbaycanın şərtlərinə yumşaqlıq gətirmək, Ermənistanda sabitliyi pozan qüvvələri neytrallaşdırmaq üçün, ola bilər ki, Paşinyan hakimiyyəti onların da tutulub bizə təhvil verilməsinə və ya zərərsizləşdirilməsinə getsin. Rusiya öz maraqları üçün istənilən addımı ata bilər. Həmin ölkə heç vaxt ona xidmət edənləri axıra qıdər müdafiə etməyib. Şahmatda bəzən şahı xilas etmık üçün vəziri də qurban verirlər. Hətta Rusiyanın özü də onları öz ərazisində saxlayıb bizə təhvil verə bilər”.
Erməni bloger Natali Aleksanyan yazıb ki, Ermənistan bu qaniçən quldurlardan (Köçəryan və Sarkisyan) yaxa qurtara bilmir, qoy onların işləri ilə onların əsl qanuni vətəni olan Azərbaycan məşğul olsun: “Unutmayaq ki, hər ikisi Azərbaycanda doğulub, Azərbaycanda çalışıblar və hakimiyyəti qəsb etməklə qanunsuz olaraq Ermənistan vətəndaşlığı və rəhbər vəzifələr alıblar. İndi onlardan yaxa qurtarmaq və Azərbaycana təhvil vermək üçün yaxşı fürsətdir. Nəhayət, mənim ən əziz arzum gerçəkləşəcək və onların hər ikisi sonda Bakı həbsxanasında olacaq. Siz Ermənistanda həbsxanaya belə layiq deyilsiniz. Ölkəmizin havası sizin zəhərinizdən təmizlənməlidir və yalnız o zaman xəyallarımızdakı Ermənistanı quracağıq”.
Məhəmmədəli QƏRİBLİ
