Vətən müharibəsi dövründə erməni separatçıları, terrorçu Ermənistan silahlı qüvvələri öz gücünü cəbhədə deyil, kəndlərimizi, şəhərlərimizi, dinc əhalimizi raket atəşinə tutmaqla, mülki obyektlərimizi qadağan olunmuş silahlarla vurmaqla “göstərirdi”. Cəbhədə məğlub olan düşmən heyfini dinc əhalidən çıxırdı. Gəncəni, Bərdəni, Tərtəri, Ağdamı atəşə tutan Ermənistan silahlıları burada qanlı olaylar törətdilər.
Vətən müharibəsi dövründə Gəncə şəhərinin Ermənistan Silahlı Qüvvələri tərəfindən ilk raket hücumuna məruz qalmasından üç il ötür. 2020-ci il oktyabr ayının 4-də düşmən tərəfindən Gəncənin bombalaması nəticəsində 1 mülki şəxs - Əliyev Tunar Qoşqar oğlu şəhid olub, 32 mülki şəxs isə yaralanıb.
Ermənistanın Gəncədə törətdiyi birinci terrordan üç il keçir. Bu üç ildə Azərbaycan çox böyük uğurlara imza atdı, torpaqlarını işğaldan azad etdi, şəhidlərimizin ruhunu sevindirdi. Bəli, ermənilərin törətdiyi Gəncə terrorunun üç illiyində artıq separatizm yuvası darmadağın edildi, separatçı “rəhbərlərin” bir neçəsi əli qandallı Bakıya gətirildi...
“Təsəllimiz odur ki, şəhidlərimizin, Ermənistanın müharibə cinayətinin qurbanı olan vətəndaşlarımızın ruhları şaddır”
“Qarabağa aparan yol” qəzetinin baş redaktoru Əli Mahmud “Bakı-Xəbər”ə şərhində bildirdi ki, bu gün şəhidlərimizin ruhu şaddır və gec də olsa, ilahi ədalət öz yerində bərqərar oldu. “Ermənilərin Gəncədə törətdiyi terror aktlarının hamısı insanlıq əleyhinə cinayətdir. Amma çox təəssüf ki, Gəncə terroruna görə Ermənistan hər hansı bir beynəlxalq təzyiqə məruz qalmadı. Bu ölkəyə qarşı heç bir cəza tədbirləri görülməsə də, ilahi ədalət hər şeyi yavaş-yavaş öz yerinə qoymağa başladı. Müzəffər Ali Baş Komandan İlham Əliyevin rəhbərliyi ilə Qarabağ torpağı tamamilə azad olundu və o torpaqlarda suverenliyimiz bərpa edildi. Gəncə terrorunda mülki şəxslərimiz ziyan çəkdi, ağır yaralandılar, şəhid oldular, ev-eşiklərini itirdilər, körpələr atasız-anasız qaldı. Bu böyük faciədir. Amma təsəllimiz odur ki, şəhidlərimizin, Ermənistanın müharibə cinayətinin qurbanı olan vətəndaşlarımızın ruhları şaddır. Çünki onların qisaslarını şanlı Azərbaycan ordusu aldı. Gəncə terrorunu törədənlərin bəzilərinin artıq Bakıya gətirildiyi məlumdur. Hadisələr zamanı bildirilirdi ki, Gəncənin vurulmasının “əmrini” verənlərdən biri separatçıbaşı Araik Arutyunyan olub. Əlbəttə, bu məsələni istintaq araşdıracaq. Separatçıların şər yuvasının darmadağın edilməsi mülki və hərbi şəhidlərimizin ruhuna bir töhfədir” - deyə Ə.Mahmud qeyd etdi.
Ə.Mahmudun sözlərinə görə, Gəncə terroruna beynəlxalq aləmdə hüquqi və siyasi qiymət verilməsə də, Azərbaycan özü ədaləti bərqərar etdi: “Çox təəssüflər olsun ki, ermənilərin Gəncədə törətdiyi terror aktlarına beynəlxalq aləmin reaksiyası istənilən səviyyədə olmadı. Ermənistandan tələb olunmadı ki, cinayətkarları cəzalandır və sair. Amma bu gün haqq-ədalət öz yerini tutur və ədaləti Azərbaycan dövləti bərqərar edir. İnanıram ki, bu terrorda əli olan bütün müharibə canilərini Azərbaycan dövləti hüquqi müstəvidə cəzalandıracaq”.
İradə SARIYEVA
