Antiazərbaycan mövqeyi ilə seçilən Fransa Ermənistanı müdafiə etməklə öz beynəlxalq nüfuzuna ziyan vurur. Fransa belə rəy yaratmağa çalışır ki, guya bölgədə Ermənistanın təhlükəsizliyini təhdid edən amillər var. Əslində, belə deyil. Fransa Ermənistanın əli ilə bölgədə yeni münaqişə ocağı yaratmaq istəyir.
Belə olmasaydı, ən müxtəlif vasitələrlə Ermənistanı açıq şəkildə silahlandırmazdı, başqa ölkələrin də bu ölkəni silahlandırmasına dəstək olmazdı. Bölgədə artıq sülhün zamanı gəldiyini gözardı edən Fransa Ermənistanla yeni razılıq əldə edib.
“Fransa Ermənistanla təhlükəsizliyin təmin edilməsi üçün hərbi texnikanın verilməsinə dair saziş imzalamağa razılaşıb”. Bunu Fransanın xarici işlər naziri Ketrin Kolonna İrəvanda keçirdiyi mətbuat konfransında bildirib. O qeyd edib ki, təfərrüatlı məlumat verə bilməsə də, bir sıra məsələlər artıq razılaşdırılıb. Ermənistanın xarici işlər naziri Ararat Mirzoyan deyib ki, söhbət Fransanın Ermənistanın müdafiə qabiliyyətinə yardımından gedir. O, həmçinin vurğulayıb ki, Fransa heç vaxt Ermənistana KTMT-dən çıxmaq tələbi qoymayıb.
Açıq görsənir ki, Makron hökuməti ilə Paşinyan hökuməti Qafqazda “müharibə razılığına” gəliblər.
“…Bu gün Ermənistan dövlətinin silahlandırılması yeni bir müharibəyə işarədir”
Məsələyə şərh verən SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə “Fransanın xarici işlər nazirinin Ermənistana səfəri çərçivəsində verdiyi açıqlamalar, o cümlədən Ermənistanla hərbi yardım barədə sazişin imzalanması, Avropa İttifaqının missiyasının mandatının gücləndirilməsi barədə fikirləri rəsmi Parisin Cənubi Qafqaz regionuna geosiyasi rəqabət gətirməkdə maraqlı olduğunu, Ermənistanı militarizmə və revanşizmə sövq etdiyini göstərir”.
Onun sözlərinə görə, Ermənistanla hərbi yardım barədə saziş təhlükəsizlik məqsədinə deyil, əksinə, Fransanın illərlə antiazərbaycan fəaliyyətini davam etdirməsinə yönəlib: “Fransanın müxtəlif meriyalarının, parlamentinin, rəhbərliyinin Azərbaycana qarşı apardığı vaxtaşırı siyasət rəsmi Bakıya bəllidir. Biz onlardan başqa bir münasibət də gözləmirik. Çünki Fransanın tutduğu mövqe hər kəsə bəllidir. Bu gün Azərbaycanla Ermənistan arasında sülhün əldə olunması Qafqazda dinclik, müxtəlif böyük layihələrin həyata keçirilməsidir. Biz dəfələrlə sülh yolu ilə problemlərin həll olunmasının tərəfdarı olmuşuq. 44 günlük Vətən müharibəsi də kimin nəyə qadir olduğunu açıq-aydın göstərdi.
Məsələnin digər tərəfi odur ki, əgər sülh prosesinə imza atılırsa o zaman danışıqlar prosesində hər kəs səmimi münasibət sərgiləməlidir. Azərbaycan Prezidenti cənab İlham Əliyevin də dəfələrlə bu barədə fikirləri olmuşdur. Hətta dövlət başçısı qondarma rejimin rəhbərliyinin gəlib təslim olacağı təqdirdə onların amnistisiyası haqqında da düşünəcəyini bildirmişdi. Bir sözlə, rəsmi Bakı bütün humanist addımları atıb. Amma Fransa və digər dövlətlər tərəfindən Ermənistanda yenidən revanşist qüvvələrinin qızışdırılması və yaxud da Azərbaycana qarşı müxtəlif layihələrin işlənməsi mexanizminə start verilsə, hesab edirəm ki, Ermənistan daha ağır bir duruma düşəcək. Çünki Ali Baş Komandan, Prezident İlham Əliyev son anadək xəbərdarlığını etdi və “Dəmir Yumruğu” işə saldı. Bu gün Qarabağdakı qondarma separatçı “dövlətin” bütün “rəhbərliyi” Dövlət Təhlükəsizliyi Xidmətinin zirzəmisindədir. Bu o deməkdir ki, Azərbaycan dediyi bütün addımları atıb”.
Bəhruz Quliyev bildirdi ki, bu gün Ermənistan Fransanın vasitçəliyi ilə istəyir ki, yeni bir münaqişə ocağı yaratsın: “Amma biz bunu istəmirik. Əgər onlar sülhü pozsa, yeni münaqişə ocağı yaratmaqda maraqlı olsalar ağır zərbə almaları qaçılmaz olacaq. Hesab edirəm ki, bu gün Ermənistan dövlətinin silahlandırılması yeni bir müharibəyə işarədir. Ermənistan ağıllanmalı və 44 günlük Vətən müharibəsindən dərs götürməlidir”.
İradə SARIYEVA
