Ermənistan parlamenti Beynəlxalq Cinayət Məhkəməsinin Roma Statutunu ratifikasiya edib. Bu barədə erməni mətbuatı məlumat yayıb. Parlamentdə keçirilən səsvermə zamanı sözügedən qanun layihəsinin lehinə 60, əleyhinə isə 22 nəfər səs verib.
Məlumata görə, Roma Statutu oktyabrın 7-də, Rusiya Prezidenti Vladimir Putinin doğum günündə qüvvəyə minəcək.
İrəvanın bu “sürprizi” onsuz da gərgin olan Rusiya-Ermənistan münasibıtlərinə necə təsir edəcək?
Politoloq Amid Əliyev “Bakı-Xəbər”ə açıqlamasında bildirdi ki, Ermənistan tərəfindən Roma Statunun ratifikasiya edilməsi heç də təəccüblü deyil: “Çünki bu, Ermənistanın Qərbyönümlü siyasətini müəyyən edən əsas elementlərdən biridir. Qərb dövlətlərinin bir çoxu artıq bu statutu ratifikasiya edib və hətta qəbul da ediblər.
Son zamanlar Ermənistanın Qərbə istiqamətlənməsini nəzərə alsaq, bunu hardasa məntiqli də hesab etmək olar. İstər-istəməz bu məsələdə Ermənistanın siyasi hakimiyyəti Qərbin direktivlərini qəbul etməyə borcludur. Ən azından ona görə ki, Ermənistan hazırda Qərbin təhlükəsizlik çətiri altına sığınır, Qərbdən maliyyə dəstəyi alır və Qərbin hazırladığı sülh normativinə uyğun danışıqlarda iştirak edir.
Bu məsələnin Ermənistan-RF münasibətlərinə necə təsir edəcəyini ehtimal etmək o qədər də çətin deyil. Bu hərəkətlə Ermənistan siyasi hakimiyyəti RF prezidentinə açıq demarş nümyiş etdirir, RF təsirindən qurtulmaqda israrlı olduğunu bildirir və RF tərəfindən Ermənistanın siyasi hakimiyyətinə qarşı ehtimal edilə biləcək neqativ ssenaridə arxalana biləcəyi etibarlı ünvanı açıq şəkildə bəyan edir.
Bu, Ermənistanla RF arasında münasibətlərin ruhuna daha bir ziddiyyət qatacaq və RF-yə Ermənistan tərəfindən vurulan növbəti zərbə kimi də qiyməyləndirilə bilər. Birbaşa RF prezidentinə istiqamətlənmiş bu addımın siyasi və hüquqi anlamı təkcə Ermənistana mümkün səfərinin təxirə salınması yox, həm də sətiraltı ifadələrlə RF prezidentinin arzuolunmayan şəxs kimi də qəbul olunmasını deməyə əsas verir.
Artıq Ermənistan parlamentində ratifikasiya olunan bu layihənin yaxın günlərdə qanun şəklinə düşəcəyi gözlənilir. Bunun məhz bu aralarda, xüsusilə də RF prezidentinin doğum günü ərəfəsində qəbul olunmasının da lakonik mənası var. Bununla da Ermənistan RF ilə uzun və əzablı bir ayrılıq yoluna qədəm qoyduğunu bur daha bəyan etmiş olacaq”.
Ermənistanın atdığı bu addım isə onun öz himayədarına qarşı xəyanətkar mövqedə dayanmasının göstəricisidir ki, bu da erməni xislətinin bariz nümunələrindən biridir.
Avropa İttifaqı missiyasının regiona gətirilməsi, ABŞ-la hərbi təlimlərin keçirilməsi – ümumiyyətlə, Ermənistanın Qərbyönümlü addımlarına Rusiya öz münasibətini sərt formada bildirib. Bu gün Rusiyanın bütün media orqanları Ermənistanı “vurmaqla” məşğuldur. Rəsmi İrəvan Rusiyaya qarşı düşmən mövqe tutmağın əvəzini çox ağır ödəyəcək. Hansı formada ödəyəcəyi isə yaxın zamanlarda bəlli olacaq.
Məhəmmədəli QƏRİBLİ
