Fransa heç zaman Azərbaycana qarşı düşmənçiliyindən əl çəkmir. Bu azmış kimi, özü kimi ermənipərəstləri başına yığıb antiazərbaycan təbliğatı aparır, müxtəlif beynəlxalq qurumlardan Azərbaycana qarşı sanksiya tətbiq edilməsini istəyir. Amma Fransanın məkri varsa, Azərbaycanın da səmimi dostları var və biz bu dostların hünərinin tez-tez şahidi oluruq.
“l’Opinion” nəşrinin yazdığına görə, Ermənistan Avropa İttifaqını (Aİ) Azərbaycana qarşı sanksiyalar tətbiq etməyə çağırır.
Nəşrin materialında qeyd olunub: “Ermənistanın Avropa İttifaqındakı səfiri Aİ-yə Azərbaycan neftinin və qazının qiymətlərinin məhdudlaşdırılması, hətta Bakı ilə münasibətlərin möhkəmləndirilməsi üzrə danışıqların dayandırılmasını təklif edib”.
“l’Opinion” diplomatik mənbələrə istinadla xəbər verir ki, “Fransa və Niderland sərt tədbirlərin görülməsi imkanlarının nəzərdən keçirilməsini istəyir, eyni zamanda digər ölkələr, məsələn, Macarıstan və Rumıniya bu təşəbbüsün əleyhinə çıxış edirlər.
Məsələyə şərh verən siyasi şərhçi Azər Həsrət “Bakı-Xəbər”ə “Macarıstan və Rumınya Azərbaycanla çox yaxın dövlətlərdir, onlar dostluqlarını bir daha sübut etdilər. Hər şeydən əvvəl qeyd etməliyik ki, Macarıstan Türk Dövlətləri Təşkilatının müşahidəçi üzvü olmaqla Azərbaycanla eyni qrupda təmsil olunur. Macarıstan Avropanın tam olaraq mərkəzində yerləşməsinə baxmayaraq, bir türk dövlətidir. Özünün türk köklərini xatırlayır, üstəlik də Türk Dövlətləri Təşkilatına çox böyük maraq göstərir və burada müşahidəçi üzv sifətində təmsil olunur. Yəni Macarıstan bizimlə eyni cəbhədədir, Rumıniyaya gəlincə, hətta SSRİ dövründən Azərbaycanla yaxın münasibətləri olub. Ondan savayı müstəqillik dövründə Azərbaycan dövlərti Rumıniya il münasibətləri ən yüksək səviyyədə tutmağı bacarıb. Əlavə olaraq da bilirsiz ki, Rumıniya Avropa Birliyinin ən kasıb ölkələrindən biridir. Bu ölkənin, təəssüflər olsun ki, Avropa Birliyinə qoşulması onun iqtisadi cəhətdən inkişafına elə də imkan vermədi, xalqın rifahının yüksəldilməsinə təkan vermədi. Yenə də Rumıniya üzünü Cənub-Şərqə tutmalı oldu və burada da Azərbaycan hər zaman Rumıniyaya dost əlini uzadıb. Təbii ki, belə olan təqdirdə Rumınya da, Macarıstan da Azərbaycanın bu münasibətlərini heç zaman unutmurlar. Ondan başqa, istər Macarıstanın, istərsə də Rumıniyanın özü bizim bölgədə baş verənləri çox diqqətlə izləyir və onlar buradakılar haqqında gerçəkləri yetərincə yaxşı bilirlər. Bizə qarşı olanlar da gerçəkləri bilir. Məsələn, Fransanın özü hər şeyi çox gözəl bilir. Bu necə ola bilir ki, Fransa Azərbaycana qarşı çıxış edir, amma Macarıstan, Rumıniya kimi dövlətlər bizim tərəfimizdədir? Məsələ ondadır ki, Fransa sadəcə olaraq qeyri-obyektiv, tərəfli yanaşma sərgiləyir, Macarıstan və Rumıniya isə doğrunun, dürüstün yanında yer almağa üstünlük verir. Bu da əxlaq məsələsidir”-deyə bildirdi.
A.Həsrətin sözlərinə görə, burada bir dövlət əxlaqından söhbət gedir, görünür, Fransa dövlətinin əxlaqı yerində deyil ki, hər şeyi gözardı edərək ağa qara deyir, amma Macarıstanla Rumıniyanın dövlət əxlaqı yüksək səviyyədədir ki, onlar hər şeyi öz adı ilə çağıra bilirlər. “Əlbəttə ki, yeri gəlmişkən, Macarıstan və Rumıniya bu cəbhədə tək deyil, Avropada Azərbaycana meylli, rəğbət bəsləyən ölkələr əslinə qalanda az deyil. Sadəcə olaraq, bu elə bir mübarizədir, mücadilıdir ki, burada bir sıra dövlətlər gözləmə mövqeyi tutmaqda qalır. Bunun da səbəblərindən biri çirkin erməni təbliğatına tuş gəlməmək istəyidir. Bilirsiz ki, ermənilər hamıya, hər yerdə şər, böhtan atırlar və bu böhtanlar nəticəsində də bəzən bəzi siyasi xadimləri özlərinin əllərində tuta bilirlər. O siyasi xadimlər də özlərini həqiqətən də ən pis yola qoyurlar. Məsələn, ABŞ-da son vaxtlar müzakirə olunan Menendez olayı hər kəsin diqqətini cəlb etdi. Adamın korrupsioner, qeyri-obyektiv, tərəfli olduğunu biz illərdir deyirdik və dünya ictimaiyyətinin bu və digər şəkildə təsir mərkəzləri bunu qulaqardına vurur. Bu günlərdə bəlli oldu ki, o rüşvət almaqda ittiham olunur. Artıq rəsmi ittiham irəli sürülüb. Üstəlik onun həyat yoldaşı da erməni qadındır və onların ikisi də rüşvət almaqda ittiham olunur. Yəni bu cür şeylərə bulaşmamaq üçün bir sıra dövlətlərin siyasi xadimləri kənarda durmağa çalışırlar. Elə Macarıstanın özünü götürək. Macarıstan Azərbaycanla xoş münasibətlərə, Türk Dövlətləri Təşkilatının müşahidəçi üzvü olduğuna görə daim ermənilərin hədəfindədir. Amma onlar da görünür türk kökənlərindən irəli gələn xarakterlə bu şər-böhtanın qarşısında duruş gətirə bilirlər. İndi bəzi avropalılar macarlar qədər cəsarətli deyil, duruş gətirə bilməyəcəklərini anladıqlarına görə bir qədər təmkinli davranmalı olurlar”-deyə A.Həsrət qeyd etdi.
İradə SARIYEVA
