Bu günlərdə 96 senator Azərbaycan rəsmilərinə sanksiyaların tətbiq olunması ilə bağlı Dövlət Departamentinə müraciət etmişdi. Bunu Azərbaycan Ordusunun Qarabağda apardığı antiterror tədbirləri ilə əlaqələndirirdilər.
İndi də senatorlar Birləşmiş Ştatların Azərbaycana təhlükəsizlik sahəsində yardımlarının qadağan olunmasını ehtiva edən qanun layihəsini Konqresə təqdim edib. Layihədə qeyd olunur ki, bu qadağa Azərbaycanın ermənilər üzərinə hücum etməyəcəyi qətiləşdirilənədək qüvvədə qalmalıdır. Üstəlik, ABŞ senatoru Harri Piters Azərbaycanın ünvanına həyasızcasına ittihamlar səsləndirib: “Azərbaycan hökuməti aydın şəkildə göstərdi ki, öz hərbi resurslarından Ermənistan xalqına və Dağlıq Qarabağa sərt hücumlar üçün istifadə edə bilər və edəcək. Birləşmiş Ştatlar Azərbaycanın erməni xalqına qarşı zorakılığının iştirakçısı ola bilməz. Biz bu qanunu qəbul etməliyik ki, Azərbaycan regionda öz təcavüzünə son qoyanadək ona əlavə Amerika yardımı bloklansın”.
“Yəhudi lobbisi də belə bir halın baş verməsinə imkan verməz”
Sözügedən məsələ ilə bağlı “Bakı-Xəbər”ə açıqlama verən AMİP funksioneri Əli Orucov hesab edir ki, indiki dövrdə ABŞ-ın Azərbaycana qarşı hansısa sanksiya qəbul edəcəyi real deyil: “Erməni lobbisi bu istiqamətdə bütün imkanlarını səfərbər etsə də nəyəsə nail olacağını düşünmürəm. Bəli, erməni lobbisi bəzi ölkələrdə elektoral gücə malikdir, siyasi dairələrə ictimai fikrin formalaşdırılması vasitəsilə təsir göstərməyi bacarır. Mediaya təsir imkanları, bu kimi platformalarda təsir imkanları var. Amma hazırki siyasi durumda tərəflərin bir-birinə ehtiyacı var, buna görə də ABŞ Konqresi tərəfindən sanksiya paketinin qəbul ediləcəyinə inanmıram. Hazırki dövrdə Birləşmiş Ştatların buna gedəcəyi real görünmür. Çünki ABŞ-ın regionda Azərbaycana ehtiyacı var. O üzdən, ABŞ Konqresi tərəfindən sanksiya paketinin qəbul ediləcəyinə inanmıram. Onsuz da birinci dəfə deyil ki, ermənipərəst konqresmenlər belə təşəbbüslərlə çıxış edirlər, amma nəyəsə nail ola bilmirlər. İndiki dövrdə ABŞ Konqresi Azərbaycan əleyhinə sanksiya paketi qəbul edərsə, bu, Vaşinqtonun Cənubi Qafqazdakı maraqlarına, fəaliyyətinə, Orta Asiya və İranla bağlı strateji hədəflərinə zərər vuracaq. Ağ Ev, Dövlət Departamenti fərqindədir ki, Azərbaycan olmadan ABŞ-ın Cənubi Qafqazda siyasətini həyata keçirmək asan olmayacaq. Bir vaxtlar Qərblə yaxın münasibətlərə malik olan Gürcüstan neçə müddətdir Rusiya ilə yaxınlıq edir. Üstəlik, Azərbaycanın maraqlarını nəzərə alan, bir sıra hallarda müdafiə edən yəhudi lobbisi də belə bir halın baş verməsinə imkan verməz”.
Vidadi ORDAHALLI
