"Rusiya Qarabağ ermənilərini satdı”. Bu bəyanatla Avropa İttifaqının prezidenti Şarl Mişel çıxış edib. Ş.Mişelin bəyanatını şərh edən əməkdaşımız qeyd edib ki, bu həqiqətən şok xəbərdi.
“O mənada ki, Avropa İttifaqının prezidenti Şarl Mişel Azərbaycanın süverenliyinin bərpasını dəstəkləməkdən çox, ermənilərin Qarabağdan köçməsindən təəssüflənir. Prezident Euronews-a müsahibəsində deyib ki, Rusiya Qarabağ ermənilərini satdı. Müsahibənin tam mətni Euronews tərəfindən 3-cü gün yayımlanacaq. Görək Mişel cənabları "erməniləri satdı" deyəndə nəyi nəzərdə tururmuş. Bəlkə demək istəyir ki, ermənilərin Qarabağdakı qondarma rejiminin mövcudluğu saxlanmalı idi?!..” - deyə əməkdaşımızın şərhində bildirilir.
Şarl Mişel bu ifadəni işlətməklə nə demək istəyir?
“Mişel son günlər bir neçə antiazərbaycan bəyanatı verməkdən çəkinmədi”
“Alyans” strateji araşdırmalar mərkəzinin rəhbəri Abutalıb Səmədov “Bakı-Xəbər”ə şərhində “Şarl Mişelin Rusiyanın erməniləri satması barədə verdiyi bəyanatda, əslinə qalsa, qeyri-adi heç nə yoxdur. Avropa İttifaqı Paşinyanın Rusiyaya qarşı tutduğu xətti dəstəkləyib və erməniləri də Paşinyana dəstək verməyə yönətmək istəyib. Bunun üçün də belə bir şüaur ortaya atılır. Əsllində qalsa, bu fikir yanlış da deyil. Rusiya ermənilərin gözlədiyi dəstəyi vermədi. Ermənilər adət etmişdilər ki, Rusiya həmişə onların yerinə vuruşur, onların təhlükəsizliyini təmin edir, onlara havayı silah verir. Bu gün əllələri qandallı Bakıya gələn sermənilərin “liderləri” çox arxayın şəkildə, özlərindən razı bəyanatlar səsləndirirdilər. Bu dəfə o dəstək verilmədi və ermənilər məşhur bir türk deyimi ilə desək, öz boylarının ölçüsünü gördülər. Gördülər ki, Rusiyanın dəstəyi olmadan bunlar heç nəyə qadir olmayan, bacarıqsız, qorxaq insanlardır. Ancaq Paşinyanın tutduğu xətt hələ Ermənistanda arzulanan dəstəyi almayıb. Bu səbəbdən Şarl Mişel belə bir bəyanat verir ki, Paşinyan antirusiya xəttini bundan sonra da davam etdirsin, KTMT-dən çıxsın, Rusiyanın vasitəçiliyindən imtina etsin və Qərbə yaxınlaşdığını açıq şəkildə bildirməkdən çəkinməsin. Çünki yaxın 15 gündə ona bu barədə sual veriləndə demişdi ki, mən Rusiyadan uzaqlaşıb Qərbə üz tutmamışam. Baxmayaraq ki, verilən bəyanatlar bunu göstərirdi, ancaq Paşinyan açıq şəkildə deməyə cəsarət edə bilmədi. Artıq Qərbin istəyi budur ki, Paşinyan Rusiyadan imtina etdiyini və Qərbə üz tutduğunu gizlətməsin və bunu bəyan etsin. Digər tərəfdən, heç kimə sirr deyil ki, Avropa Birliyi prinsipial məsələlərdə Ermənistana dəstək verib. Qarabağ ermənilərinin təhlükəsizliyinin təminatı məsələlərində Ermənistanın tələb etdiyi şərti, yəni beynəlxalq mexanizmlər vasitəsilə təhlükəsziliyin təminatı şərhini ilk dəstəkləyənlərdən biri Şarl Mişel olub” - deyə bildirdi.
A.Səmədovun sözlərinə görə, düzdür, bunu Mişel xahiş şəklində deyib və Azərbaycan hakimiyyətinə müraciət etdi ki, mümkünsə Qarabağ ermənilərinin təhlükəsizliyinin beynəlxalq mexanizmlər vasitəsilə təminatı məsələsini nəzərdən keçirsin. “Mişel son günlər bir neçə antiazərbaycan bəyanatı verməkdən çəkinmədi” deyən A.Səmədov qeyd etdi ki, bu da Brüssel prosesini müəyyən qədər zəiflədəcək və Qranadada (İspaniya) nəzərdə tutulan görüş də hələ sual altındadır, baş tutub-tutmayacağı dəqiq deyil. “Ancaq bir şey aydındır, Paşinyan antirus xəttini tutmaqla Qərbin dəstəyini qazanmağa çalışdı və burada müəyyən qədər istədiyinə nail ola bildi. Həm BMT Təhlükəsizlik Şurasının iclaslarında, həm ondan sonrakı dövrlərdə, həm də son günlərdə Qərb açıq şəkildə Ermənistanı dəstəkləyən ədalətsiz bəyanatlar verdi. Ancaq Ermənistanın gözlədiyi dəstək yoxdur və çox güman ki, olmayacaq. Ancaq mübarizə hələ bitməyib. Azərbaycan son günlər böyük qələbə qazanıb və bu qələbəni sona qədər qorumaq üçün Ermənistan havadarlarına qarşı mübarizəni davam etdirməlidir. Çox təəssüf, reallıq bundan ibarətdir və çox təəssüf ki, biz qazandığımız böyük qələbələrə hələ də sevinə bilmirik. Bunun da əsas səbəblərindən biri Makron kimi, Şarl Mişel kimi erməni havadarlardır, Ermənistanın ədalətsiz mövqeyini müdafiə edənlərdir. Bu insanlara qarşı mübarizənin səmərəli olması üçün hamımız Azərbaycan hakimiyyətinə əlimizdən gələn köməyi göstərməliyik”-deyə A.Səmədov bildirdi.
İradə SARIYEVA
